Madhya Pradesh Crime : ઉજ્જૈનમાં BJP નેતા અને તેમની પત્નીની હત્યા, પોલીસે તપાસ શરૂ કરી...

મધ્ય પ્રદેશ (Madhya Pradesh)ના ઉજ્જૈનમાં શંકાસ્પદ લૂંટારાઓએ સ્થાનિક ભાજપ નેતા અને તેમની પત્નીની તેમના નિવાસસ્થાને હત્યા કરી. માહિતી મળતાં જ પોલીસે ઘટનાસ્થળે પહોંચીને ઘટનાની તપાસ હાથ ધરી હતી. આ ઘટનાની તપાસ માટે પોલીસની સ્પેશિયલ ઈન્વેસ્ટિગેશન ટીમ (SIT)ની રચના કરવામાં આવી છે. પોલીસના જણાવ્યા અનુસાર આ ઘટના શનિવારે સવારે બની હતી. અધિક પોલીસ અધિક્ષક (SP) ગુરુ પ્રસાદ પરાશરે જણાવ્યું કે ભૂતપૂર્વ સરપંચ રામનિવાસ કુમાવત અને તેમની પત્ની મુન્નીબાઈની ઉજ્જૈનના દેવાસ રોડ પર આવેલા પિપલોડા ગામમાં તેમના ઘરમાં તીક્ષ્ણ હથિયાર વડે હત્યા કરવામાં આવી હતી. ASP એ કહ્યું કે એવી આશંકા છે કે લૂંટના પ્રયાસ દરમિયાન અજાણ્યા શખ્સોએ આ ઘટનાને અંજામ આપ્યો હશે, હાલ પોલીસ આ મામલે તપાસમાં વ્યસ્ત છે.

બે લોકો સિવાય ઘરમાં બીજું કોઈ નહોતું

બીજેપી નેતા અને તેમની પત્ની સિવાય ઘરમાં કોઈ નહોતું. આ દરમિયાન તેના ઘરની પાછળના ભાગેથી કેટલાક લોકો ઘૂસ્યા હતા. બદમાશોએ પહેલા બીજેપી નેતાની પત્નીની હત્યા કરી, પછી બીજેપી નેતાની પણ હત્યા કરી. માહિતી બાદ પોલીસ અધિકારીઓ ટીમ સાથે ઘટનાસ્થળે પહોંચી ગયા હતા અને તપાસ કરી હતી.

ઘરવખરીનો સામાન અસ્તવ્યસ્ત પડેલો હતો

ફોરેન્સિક ટીમને પણ સ્થળ પર બોલાવવામાં આવી હતી. ઘરવખરીનો સામાન અસ્તવ્યસ્ત પડેલો હતો. લોકર, ગોડાઉન અને સ્ટોરરૂમ સલામત છે, જ્યારે CCTV સ્ક્રીન તૂટેલા જોવા મળ્યા હતા. પોલીસને ઘટના સ્થળેથી કોઈ ગોળીઓ મળી ન હતી. પ્રાથમિક દ્રષ્ટિએ એવું કહેવામાં આવી રહ્યું છે કે આ હત્યા ચાકુ વડે કરવામાં આવી છે. પોસ્ટમોર્ટમ રિપોર્ટ બાદ જ સમગ્ર મામલો જાણી શકાશે.

ઘટના અંગે પોલીસ અધિક્ષકે શું કહ્યું?

પોલીસ અધિક્ષક (SP) સચિન શર્માએ કહ્યું કે આ મામલાની તપાસ માટે SIT ની રચના કરવામાં આવશે. નારવર પોલીસ સ્ટેશનના ઈન્ચાર્જ મુકેશ ઈઝરદારે જણાવ્યું કે કુમાવતને બે પુત્રો છે, પરંતુ તેમાંથી કોઈ પણ તેની સાથે ગામમાં રહેતું નથી. સ્થાનિક લોકોએ જણાવ્યું કે મૃતકો ભારતીય જનતા પાર્ટી (BJP) સાથે સંકળાયેલા હતા. તમને જણાવી દઈએ કે ઉજ્જૈન મધ્યપ્રદેશ (Madhya Pradesh)ના મુખ્યમંત્રી મોહન યાદવનો હોમ જિલ્લો છે.

પૂર્વ મુખ્યમંત્રી કમલનાથે આ ઘટના પર સવાલ ઉઠાવ્યા છે

પૂર્વ સીએમ કમલનાથે આ ઘટના પર સવાલ ઉઠાવ્યા છે. તેમણે મુખ્ય પ્રધાન મોહન યાદવ પાસે માંગ કરી છે કે તેઓ કાયદો અને વ્યવસ્થા સુનિશ્ચિત કરવા અર્થપૂર્ણ પગલાં લે અને ગુનેગારોને કડક સજા આપે. તેણે સોશિયલ મીડિયા પર પોસ્ટ કર્યું. તેમણે વધુમાં લખ્યું છે કે છિંદવાડા અને સિઓનીમાં પોલીસ કર્મચારીઓની હત્યા અને રતલામના પોલીસ સ્ટેશનમાંથી ટીઆઈની જીપની ચોરી પછી હવે મુખ્યમંત્રીના ગૃહ વિસ્તારમાં ભાજપના નેતાની હત્યા રાજ્યની સ્થિતિ વિશે વાત કરે છે. હું મુખ્યમંત્રીને વિનંતી કરીશ કે રાજ્યમાં કાયદો અને વ્યવસ્થા સુનિશ્ચિત કરવા અર્થપૂર્ણ પગલાં ભરે અને ગુનેગારોને કડક સજા આપીને મધ્યપ્રદેશ (Madhya Pradesh)ને દરેક માટે સુરક્ષિત રાજ્ય બનાવવાની દિશામાં કામ કરે.

આ પણ વાંચો : Bihar: ભાજપના નેતા પહોંચ્યા રાજભવન, કાલે થઈ શકે છે નવી સરકારનું શપથ ગ્રહણ