VADODARA : કોર્પોરેટ જોબ જેટલી આવક મેળવતા ખેડૂત

VADODARA : વડોદરા જિલ્લા (VADODARA DISTRICT) ના પાદરા (PADRA - VADODARA) તાલુકાના નરસિંહપુરા ગામના ઈશ્વરભાઈ ફુલાભાઈ પઢિયાર ઉર્ફે અમરસિંહ ફુલસિંહ છેલ્લા સાત વર્ષથી પ્રાકૃતિક ખેતી કરી વર્ષે રૂપિયા ૧૦ લાખની આવક મેળવી રહ્યા છે.ઈશ્વરભાઈ પોતાની સાત વીઘા જમીન પર વિવિધ પ્રકારના શાકભાજીની ખેતી કરે છે અને તેમના વિસ્તારના આઠથી દસ ખેડૂતોને કુદરતી ખેતીની પદ્ધતિઓ અપનાવવા માટે તાલીમ આપી રહ્યા છે, જેથી આવનારી પેઢીઓ માટે તંદુરસ્ત ભવિષ્ય આપી શકાય છે.

આવક સામે ચાલીને ખેડૂત પાસે આવે છે

વ્યવસાયે ખેડૂત ઈશ્વરભાઈ સાત વર્ષ પહેલા કુદરતી ખેતી તરફ વળ્યા હતા. ત્યારથી, તે આ પ્રકારની ખેતીમાંથી આરોગ્ય અને કમાણીની દ્રષ્ટિએ સમૃદ્ધ લાભો મેળવી રહ્યો છે.તેઓ કહે છે કે,પ્રાકૃતિક ખેતી અપનાવવાથી આવક સામે ચાલીને ખેડૂત પાસે આવે છે શોધવા જવી પડતી નથી.

જૂની કલેક્ટર કચેરીના કેન્દ્રમાં વેચાણ

ઈશ્વરભાઈ કહે છે કે, પ્રાકૃતિક ખેતી વિશે અખબારો અને જાહેરાતોમાંથી માહિતી મેળવી અને બાદમાં ૨૦૧૮-૨૦૧૯માં રાજ્ય સરકારના ATMA પ્રોજેક્ટમાં જોડાયો. તેઓએ રીંગણ, ગોળ (ગલકા), કારેલા જેવા વિવિધ પ્રકારના મોસમી શાકભાજીની પ્રાકૃતિક ખેતી કરે છે. તુરિયા અને કાચા કેળાની વર્ષમાં ત્રણવાર ઉત્પાદન મેળવે છે.પ્રાકૃતિક ખેતી ઉપજ અને કમાણી બંનેમાં વધારો કરે છે. માત્ર રૂ.૬૦ હજારનો ખર્ચ કરી કુદરતી ઉપજમાંથી લગભગ રૂ.દસ લાખની કમાણી કરું છું.પ્રાકૃતિક ખેત પેદાશોનું પાદરા અને વડોદરાની જૂની કલેક્ટર કચેરીના કેન્દ્રમાં વેચું છું તેમ તેમણે ઉમેર્યું હતું.

પુત્રોની પિતાને મદદ

પ્રાકૃતિક કૃષિ માટે રાજ્યપાલ આચાર્ય દેવવ્રતજીનો તેમને સતત માર્ગદર્શન માટે આભાર માનતા તેમણે કહ્યું કે, રાજ્યપાલશ્રીનું આ મિશન ખેડૂતો માટે પ્રેરણાદાયી છે. જે સારા સ્વાસ્થ્ય,પ્રદૂષણ મુક્ત ખેતી અને જમીનની ઉત્પાદકતા જાળવી રાખે છે. તેમના બંને પુત્રો, કરણસિંહ પઢિયાર અને ધરમસિંહ પઢિયાર બજારમાં શાકભાજી વેચવામાં પણ મદદ કરે છે. ૫૦ વર્ષની ઉંમરે ઈશ્વરભાઈ પઢિયાર એક યુવાનની જેમ સ્વસ્થ છે અને તંદુરસ્ત જીવન જીવી રહ્યા છે.

ગામડાઓમાં તાલીમ સત્રોનું આયોજન

તેઓ એક ખેડૂત તેમજ ટ્રેનર છે.પાદરા તાલુકાના નરસિંહપુરા,વડુ, પાવડા, મહમદપુરા અને ડબકા ગામના ખેડૂતોને કુદરતી ખેતી પદ્ધતિઓ અપનાવવા માટે તાલીમ આપી છે. કુદરતી ખેતીના ફાયદાઓ વિશે ખેડૂતોમાં જાગૃતિ લાવવા માટે તેઓ ગામડાઓમાં તાલીમ સત્રો પણ યોજે છે. ઈશ્વરભાઈ પઢિયાર જેવા ખેડૂતો પ્રાકૃતિક ખેતી કરી અન્ય ખેડૂતો માટે પ્રેરણાદાયી બની રહ્યા છે.

આ પણ વાંચો -- VADODARA : જિલ્લા અને તાલુકા કક્ષાના "સ્વાગત ફરિયાદ નિવારણ" કાર્યક્રમની તારીખો જાહેર