VADODARA : BMW હિટ એન્ડ રન કેસમાં 33 માં દિવસે કાર કબ્જે, FSL તપાસ કરાશે

VADODARA : વડોદરા (VADODARA) ના અમિત નગર વિસ્તારમાં લક્ઝુરીયસ BMW કાર દ્વારા સર્જેલા હિટ એન્ડ રન (BMW HIT AND RUN CASE - VADODARA) માં ઠક્કર પરિવારના મોભીનું મોત નિપજ્યું હતું. આ મામલે હરણી પોલીસ મથક (HARNI POLICE STATION) ના પીઆઇ દ્વારા રહેમનજર દાખવતા તેની ટ્રાન્સફર કરી દેવામાં આવી હતી. અને સમગ્ર મામલાની તપાસને એસીપીને સોંપવામાં આવી હતી. અકસ્માતની ઘટનાના 33 દિવસ બાદ ફરી કાર કબ્જે કરવામાં આવી છે. દરમિયાન કારનું સમારકામ થયું હોવાનું પ્રાથમિક દ્રષ્ટિએ સામે આવી રહ્યું છે. આ મામલાની તપાસમાં એફએસએલ પણ જોડાઇ છે.

મામલાની તપાસ એસીપી - એચ ડિવિઝનને સોંપવામાં આવી

વડોદરાના અમિત નગર વિસ્તારમાં આવેલા પુરૂષોત્તમ નગરમાં રહેતા 73 વર્ષિય કાંતિલાલ ઠક્કર વહેલી સવારે કચરો નાંખવા નીકળ્યા હતા. તે દરમિયાન BMW કારના ચાલક અને બિલ્ડર પુત્ર પિનાંક સોરઠિયાએ તેઓને અડફેટે લઇ ફંગોળતા તેઓનું મોત નિપજ્યું હતું. બાદમાં કાર ચાલક નાસી છુટ્યો હતો. આ મામલે હરણી પોલીસ મથકના પીઆઇએ આરોપી પર રહેમનજર દાખતા મોડે મોડે તેની ધરપકડ કરી હતી. અને આરોપીની ધરપકડ બાદ તે ગણતરીના સમયમાં જ છુટી ગયો હતો. આ મામલો સપાટી પર આવતા જ પોલીસના ઉચ્ચ અધિકારીઓ હરકતમાં આવ્યા હતા. અને હરણી પોલીસ મથકના પીઆઇની બદલી કરીને લિવ રીઝર્વમાં મુકાયા હતા. આ સાથે સમગ્ર મામલાની તપાસ એસીપી - એચ ડિવિઝન જી. બી. બાંભણીયાને સોંપવામાં આવી હતી.

આરોપીનું લાયસન્સ રદ્દ થાય તેવા પ્રયાસો

આ મામલે 33 દિવસ બાદ વધુ એક વખત હિટ એન્ડ રનના આરોપી પિનાંક સોરઠિયાની BMW કાર કબ્જે કરવામાં આવી છે. દરમિયાન આ કારનું સમારકામ થયું હોવાનું પ્રાથમિક રીતે જાણવા મળ્યું છે. હાલ આ કારની તપાસ એફએસએલ દ્વારા શરૂ કરવામાં આવી હોવાનું સુત્રો જણાવી રહ્યા છે. આ મામલે આકરી કાર્યવાહી કરતા હિટ એન્ડ રન કેસના આરોપી પિનાંક સોરઠિયાનું ડ્રાઇવીંગ લાયસન્સ રદ્દ કરવા સુધીની કાર્યવાહી માટે તંત્રએ કમર કસી છે. અને ટુંક સમયમાં તેનું લાયસન્સ રદ્દ થાય તેવા પ્રયાસો હાલ કરવામાં આવી રહ્યા છે. હવે આ મામલે આગળ શું થાય છે તેના પર સૌ કોઈની નજર રહેશે.

આ પણ વાંચો -- VADODARA : વિશ્વામિત્રી નદીમાં પૂર નિવારણ માટેનો ખર્ચ ત્રણ ઘણો પહોંચશે, વાંચો વિગતવાર