ગુજરાત ATSના જાબાઝ અધિકારીઓની ઇરાદાઓને દરિયાના મોજા પણ હલાવી શક્યા નહીં, 5 દિવસ સુધી ચાલેલા દિલ ધડક ઓપરેશનની વાતો

ગુજરાત એટીએસ અને ઇન્ડિયન કોસ્ટ ગાર્ડ દ્વારા સૌપ્રથમ વખત ડ્રગ્સની સાથે હથિયારો પણ કબજે કરી લેવામાં આવ્યા છે. ગુજરાતની દરિયાઈ સીમમાં ઓખાના દરિયા કાંઠેથી 40 કિલો હેરોઇનના જથ્થા સાથે 10 પાકિસ્તાનીઓની ધરપકડ કરી લીધી છે. ઉપરાંત આ તમામ આરોપીઓ પાકિસ્તાનના પસની બંદરેથી અલ-સોહેલી બોટમાં આવ્યા હતા અને બોટમાંથી ગુજરાત એટીએસે ઇટાલિયન મેઇડની સેમી ઓટોમેટિક 06 પીસ્ટલ, 12 મેગેઝીન તથા 120 કારતૂસ પણ મળી આવ્યા છે. હાલ આ તમામ પાકિસ્તાનીઓની સત્તાવાર ધરપકડ ગુજરાત એટીએસ દ્વારા કરી લેવામાં આવી છે.

ગુજરાત એટીએસ અને ઇન્ડિયન કોસ્ટગાર્ડ દ્વારા જે સંયુક્ત ઓપરેશન પાર પાડવામાં આવ્યું અને આ ઓપરેશન દરમિયાન ગુજરાત એટીએસના અધિકારીઓને દરિયામાં ઓપરેશન પાર પાડતી વખતે કેટલી મુસીબતોનો સામનો કરવો પડ્યો તે વિષય પર રાજ્ય પોલીસવડા આશિષ ભાટિયા સાથે ગુજરાત ફર્સ્ટ ન્યૂઝ દ્વારા ખાસ વાતચીત કરવામાં આવી હતી. 

પાકિસ્તાનના હાજી સલીમ બલોચ વાળો નામના ડ્રગ્સ માફિયા દ્વારા સોહેલી નામની બુટમાં 40 કિલો હેરોઈન અને હથિયાર સાથે દસ જેટલા પાકિસ્તાનીઓને ભારતીય જળસીમામા મોકલ્યા હોવાનું સામે આવ્યું છે. આ તમામ ડ્રગ્સ કાર્ટલ અને હથિયાર સ્મગલિંગનો પર્દાફાશ ગુજરાત એટીએસ દ્વારા કરવામાં આવ્યો છે. ભારતીય જળ સીમામાં 140 નોટિકલ અંદર જઈને આ ઓપરેશન ઇન્ડિયન કોસ્ટ ગાર્ડની મદદથી પાર પાડવામાં આવ્યું હતું. 

ઉલ્લેખનીય છે કે, વર્ષ 1992ના દાયકામાં ડ્રગ્સની સાથે હથિયારોની હેરાફેરી દરિયાઈ માર્ગે કરવામાં આવતી હતી. ફરી એક વખત વર્ષ 2022 માં સૌ પ્રથમ વખત ડ્રગ્સની સાથે હથિયારો પણ લાવવામાં આવ્યા છે. પરંતુ ગુજરાત એટીએસે નાપાક પાકિસ્તાનની મેલી મુરાદોને નિસ્તો નાબુદ કરી નાખી છે અને 10 જેટલા પાકિસ્તાનીઓની ડ્રગ્સ અને હથિયારના જથ્થા સાથે ધરપકડ પણ કરી લીધી છે.