વેજલપુરના ધારાસભ્ય અમિત ઠાકરે કર્યો લોકસંપર્ક ,મકરબા વિસ્તારની રહેણાંક સોસાયટીઓના ચેરમેન અને સેક્રેટરીઓ સાથે કરી બેઠક

- ધારાસભ્ય અમિત ઠાકરે લોકસંપર્ક શરૂ કર્યો 

ચૂંટણી પૂર્ણ થયા બાદ ભાજપના ધારાસભ્યો હવે કામે લાગી ગયા છે. વેજલપુર વિધાનસભાના ધારાસભ્ય અમિત ઠાકરે લોકસપર્ક રાઉન્ડ અંતર્ગત મકરબા વિસ્તારની રહેણાંક સોસાયટીઓના ચેરમેન અને સેક્રેટરીઓ સાથે બેઠક કરી હતી. આ બેઠકમાં સ્થાનિક રહીશોએ આ વિસ્તારમાં પાણી ભરાવાની સમસ્યાઓથી માંડીને સલામતી સહિતના મુદ્દે રજૂઆત કરી હતી.

વેજલપુરના ધારાસભ્ય અમિત ઠાકરે ચૂંટણી પૂર્ણ થયા બાદ તરત જ લોકસંપર્ક શરુ કરી દીધો હતો, જેના ભાગરુપે સતત બીજા  રવિવારે તેમણે મકરબા વિસ્તારના સ્થાનિકો સાથે બેઠક કરી હતી. આ બેઠકમાં મળેલી રજૂઆતો અંગે ગુજરાત ફર્સ્ટ સાથેની વાતચીતમાં અમિત ઠાકરે જણાવ્યુ કે, મકરબા વિસ્તાર એ નવો વિકસીત થયેલો વિસ્તાર છે. આ વિસ્તારમાં ઓવરસ્પીડ સાથે દોડતા વાહનો, ચેઈન સ્નેચિંગ જેવી ઘટનાઓ સામે અસલામતીનો અનુભવ, આ પ્રકારની ઘટનાઓ અટકાવવા સીસીટીવી કેમેરા લગાવવાની માગણી પણ ઊઠી છે. 

આ વિસ્તારમાં જે બગીચાઓ બનાવવામાં આવ્યા છે તેમાં લોકો હજુ પણ વધારે સવલતો ઈચ્છી રહ્યા છે અને આ માટે લોકોએ પીપીપી ધોરણે બગીચાઓના વિકાસની તૈયારી પણ દર્શાવી હોવાનું અમિત ઠાકરે જણાવ્યુ હતુ. આ વિસ્તારમાં નોનવેજનુ વેચાણ કરતી કેટલીક દુકાનો અસ્થાયી રીતે ઊભી કરી દેવાઈ હોવાની રજૂઆત પણ મળી છે. ચોમાસામાં મકરબા વિસ્તારમાં નવો રોડ બનાવાના કારણે એક કેચપીટ પાસે પાણી ભરાવાની સમસ્યા અંગે પણ રજૂઆત મળી છે. આ તમામ રજૂઆતો પૈકી ચોમાસામાં પાણી ભરાવાની સમસ્યા અંગે સૌપ્રથમ કામ શરુ કરી દેવાશે. આ માટે અધિકારીઓ સાથે બેઠક પણ કરી છે. ચોમાસાને હજુ પાંચ માસનો સમય છે ત્યારે આ અંગે સૌપ્રથમ કામ કરાશે. સ્વચ્છતા અને ટ્રાફીક મુદ્દે આગામી બે વર્ષમાં કામ પૂર્ણ કરી દેવાની ખાતરી પણ અમિત ઠાકરે આપી હતી. 

આ પણ વાંચોઃ  ધારાસભ્ય અમૂલ ભટ્ટે કર્યો લોકસંપર્ક, લાંભા વોર્ડની સોસાયટીના રહીશો સાથે કરી મુલાકાત