ગીરથી આવેલા ડાલામથ્થાંનું કિલેશ્વરથી રાણાવાવ વચ્ચે સામ્રાજ્ય

પોરબંદર શહેરની ભાગોળે બબ્બે મહિના સુધી ડણક દઈને હવે બરડાને પોતાનો કાયમી નિવાસ બનાવનારા સાવજ સમ્રાટ' હવે બરડા ડુંગરમાં કિલેશ્વરથી રાણાવાવ સુધી મુક્તપણે વિહરી રહ્યો છે.અહીં સમ્રાટ માટે પીવાના પાણીની પૂરતી સુવિધાઓ જંગલ ખાતા દ્વારા ઊભી કરવામાં આવી છે.અહીં સાવજ માટે શિકાર પણ પૂરતાં પ્રમાણમાં છે.સમ્રાટ પણ તેના નામને જાણે કે સાર્થક કરતો હોય તેમ કિલેશ્વરથી રાણાવાવ સુધીના વિસ્તારમાં પોતાનું સામ્રાજ્ય જમાવી ચૂક્યો છે. આમ,ગીરથી પહેલાં માધવપુરની દરિયાઈ પટ્ટી અને ત્યાંથી બરડા સુધીની સફર ખેડનારા સાવજ સમ્રાટના પગલે અન્ય વનરાજો પણ બરડા તરફ આવી શકે તેવું જંગલ ખાતાના સૂત્રો જણાવી રહ્યા છે.

પોરબંદરના ઓડદર-રતનપર વિસ્તારમાં દિવાળીના તહેવારો દરમિયાન એક સાવજ માધવપુરની દરિયાઈ પટ્ટીથી આવી પહોંચ્યો હતો અને તેણે લગભગ બે માસથી પણ વધુ સમય સુધી ઓડદર-રતનપર તથા છાંયા વિસ્તારમાં ધામા નાંખ્યા હતા. આ સાવજે કેટલાંક સ્થાનિક લોકોના પશુઓના મારણ પણ કર્યા હતા, જેથી પ્રજામાં પણ ભય ફેલાયો હતો. જોકે, આ સાવજ કાયમી ધોરણે વસી જાય તેવી બહોળી લાગણી પણ પ્રજાએ વ્યક્ત કરી હતી. આ લાગણીને જાણે કે વધાવી લેતો હોય તેમ આ સાવજ ફરતો-ફરતો આખરે તેના સદી પુરાણા નિવાસસ્થાન બરડા પંથકમાં પહોંચી ગયો હતો અને હવે તેણે આ વિસ્તારને પોતાનું કાયમી નિવાસસ્થાન બનાવી લીધું છે.

આપણ  વાંચો- મહિલા મિત્રને મળવા ગયેલા યુવકનો નગ્ન વીડિયો ઉતારી માર મરાયો, જાણો શું છે મામલો