રાહુલ ગાંધીને વિદેશ મંત્રીનો જવાબ, રાજકીય ટીકા ટિપ્પણીથી વાંધો નથી, પરંતુ સેનાનું અપમાન ન થવું જોઇએ

કોંગ્રેસ નેતા રાહુલ ગાંધીના નિવેદન પર વિદેશ મંત્રી ડૉ. એસ. જયશંકરે લોકસભામાં પલટવાર કર્યો. તેમણે કહ્યું કે અમને રાજકીય ટીકાથી કોઈ વાંધો નથી, પરંતુ આપણા જવાનોનું અપમાન ન થવું જોઈએ. જ્યારે હું જોઉં છું કે કોણ સલાહ આપી રહ્યું છે, ત્યારે હું ફક્ત નમન કરી શકું છું. મારપીટ શબ્દનો ઉપયોગ જવાનો માટે ન થવો જોઈએ.

તેમણે કહ્યું કે જો અમે ચીન પ્રત્યે ઉદાસીન હોત તો ભારતીય સેનાને સરહદ પર કોણે મોકલી. જો અમે ચીન પ્રત્યે ઉદાસીન છીએ ,તો આજે અમે શા માટે ચીન પર ડી-એસ્કેલેશન અને ડિસ એેંગેજમેન્ટ માટે દબાણ કરી રહ્યા છીએ ? શા માટે અમે જાહેરમાં કહીએ છીએ કે ભારત-ચીન વચ્ચેના સંબંધો સામાન્ય નથી રહ્યા. 

વિદેશ મંત્રી ડૉ. એસ. જયશંકરે કહ્યું કે આપણે આપણા જવાનોની સીધી કે આડકતરી રીતે ટીકા ન કરવી જોઈએ. આપણા સૈનિકો યાંગત્સેમાં 13 હજાર ફૂટની ઉંચાઈ પર ઉભા રહીને આપણી સરહદની રક્ષા કરી રહ્યા છે. તેમનો આદર અને તેમની પ્રશંસા કરવી જોઈએ.

જયશંકરે પાકિસ્તાનના વિદેશ મંત્રી બિલાવલ ભુટ્ટોના ભારતના પીએમ નરેન્દ્ર મોદી વિશેના વિવાદાસ્પદ નિવેદન પર પણ ટિપ્પણી કરી હતી. જયશંકરે કહ્યું કે ભારતને પાકિસ્તાન પાસેથી ક્યારેય મોટી અપેક્ષાઓ નથી. એક કાર્યક્રમમાં વિદેશ મંત્રીએ કહ્યું કે અમને પાકિસ્તાન પાસેથી કોઈ અપેક્ષા નથી. આ પહેલા વિદેશ મંત્રાલયે બિલાવલની ટિપ્પણી પર ભારે નારાજગી વ્યક્ત કરી હતી. મંત્રાલયે કહ્યું હતું કે આ નિવેદન પાકિસ્તાનનું નવું નિમ્ન સ્તર છે.

આ પણ વાંચોઃ  PM મોદી તમે ચીનના રાષ્ટ્રપતિ Xi Jinping થી કેમ આટલા ડરો છો : દિગ્વિજય સિંહ