એકનાથ અને ફડણવીસ PM Modiને મળશે, કેબિનેટ વિસ્તરણની ચર્ચાની શક્યતા

મહારાષ્ટ્રના મુખ્ય પ્રધાન એકનાથ શિંદે અને નાયબ મુખ્ય પ્રધાન દેવેન્દ્ર ફડણવીસ આજે વડા પ્રધાન નરેન્દ્ર મોદી અને ભાજપના વડા જેપી નડ્ડાને મળવાના છે. કેબિનેટ વિસ્તરણ પહેલા બંનેની દિલ્હી મુલાકાત ઘણી મહત્વની બની રહી છે. ગઈ કાલે તેઓ ગૃહ પ્રધાન અમિત શાહને પણ મળ્યા હતા.

પ્રાપ્ત માહિતી અનુસાર, બંને નેતાઓ આજે રાષ્ટ્રપતિ રામનાથ કોવિંદ અને ઉપરાષ્ટ્રપતિ એમ વેંકૈયા નાયડુ સાથે પણ  સૌજન્ય મુલાકાત પણ કરી શકે છે.

મહારાષ્ટ્રના મુખ્ય પ્રધાન એકનાથ શિંદે અને નાયબ મુખ્ય પ્રધાન દેવેન્દ્ર ફડણવીસે શુક્રવારે રાત્રે ગૃહ પ્રધાન અમિત શાહ સાથે મુલાકાત કરી હતી. તેમણે ભાજપ અને શિંદેની આગેવાની હેઠળના શિવસેના જૂથ વચ્ચે સત્તાની વહેંચણીની ફોર્મ્યુલાના વ્યાપક રૂપરેખા અંગે ચર્ચા કરી હોવાનું માનવામાં આવે છે. અમિત શાહે ટ્વિટર પર કહ્યું કે, મને ખાતરી છે કે નરેન્દ્ર મોદીના માર્ગદર્શન હેઠળ તમે બંને ઈમાનદારીથી લોકોની સેવા કરશો અને મહારાષ્ટ્રને વિકાસની નવી ઊંચાઈઓ પર લઈ જશો.

 શિવસેનાના ઉદ્ધવ ઠાકરે જૂથ દ્વારા કરાયેલી એકનાથ શિંદે અને 15 ધારાસભ્યોને અયોગ્ય ઠેરવવાની અરજી પર 11 જુલાઈએ સુપ્રીમ કોર્ટમાં મહત્વપૂર્ણ સુનાવણી છે. આ પછી જ નવા મંત્રીઓને શપથ ગ્રહણ કરવામાં આવશે.

એકનાથ શિંદેએ દિલ્હીમાં મીડિયાને કહ્યું કે, અમને ન્યાયતંત્રમાં વિશ્વાસ છે. તેમણે કહ્યું કે તેમના નેતૃત્વ હેઠળના જૂથને શિવસેનાના બે તૃતીયાંશ ધારાસભ્યોનું સમર્થન છે.

એકનાથ શિંદેના બળવા પહેલા શિવસેના પાસે 55 ધારાસભ્યો હતા. બળવામાં શિવસેનાના લગભગ 40 ધારાસભ્યોએ શિંદેને સમર્થન આપ્યું હતું. તેમને અપક્ષો અને નાના સંગઠનોના ધારાસભ્યોનું સમર્થન પણ છે. નવા ચૂંટાયેલા સ્પીકર રાહુલ નાર્વેકરના નિર્ણયનો ઉલ્લેખ કરતા તેમણે કહ્યું કે, સ્પીકરે અમને માન્યતા પણ આપી છે.

એકનાથ શિંદેએ 30 જૂને ભાજપના સમર્થનથી મુખ્યમંત્રી તરીકે શપથ લીધા હતા. તેમણે તત્કાલિન મુખ્યમંત્રી ઉદ્ધવ ઠાકરે સામે બળવો કર્યો હતો. મહારાષ્ટ્ર વિકાસ આઘાડી સરકાર શિવસેનાના બહુમતી ધારાસભ્યોની સાથે પડી ગઈ હતી. એકનાથ શિંદેએ 4 જુલાઈના રોજ મહારાષ્ટ્ર વિધાનસભામાં વિશ્વાસ મત જીત્યો હતો.