ચેન્નઇની એક IT કંપનીએ 100 કર્મચારીઓને કાર ભેટમાં આપી, કહ્યું- કંપનીની કમાણીમાં તેમનો પણ ભાગ

તમિલનાડુની રાજધાની ચેન્નાઈ સ્થિત IT કંપનીએ તેના કર્મચારીઓને મોટી ભેટ આપવાની જાહેરાત કરી છે. કંપની દ્વારા 100 કર્મચારીઓને નવી કાર ભેટ આપવામાં આવી છે. કંપનીનું નામ Ideas2IT છે. આ કંપનીએ તેના 100 કર્મચારીઓને મારુતિ સુઝુકી ગિફ્ટ કરી છે. કંપની તરફથી કહેવામાં આવ્યું હતું કે આ કાર એવા કર્મચારીઓને ગિફ્ટ કરવામાં આવી રહી છે જેઓ છેલ્લા દસ વર્ષથી સતત કંપની સાથે જોડાયેલા છે. તેમણે કંપનીના વિકાસમાં મહત્વપૂર્ણ યોગદાન આપ્યું છે અને મુશ્કેલ સમયમાં પણ કંપનીની સાથે રહ્યા છે.

કંપનીના માર્કેટિંગ હેડ હરિ સુબ્રમણ્યમે કહ્યું કે અમે માનીએ છીએ કે જે સંપત્તિ કંપનીએ બનાવી છે, તેના કર્મચારીઓનો પણ તેમાં અધિકાર છે. અમારી કંપનીમાં લગભગ 500 કર્મચારીઓ કામ કરે છે. તેમાંથી 100 કર્મચારીઓને કાર ગિફ્ટ કરવામાં આવી રહી છે. આ કર્મચારીઓ છેલ્લા દસ વર્ષથી કંપની સાથે જોડાયેલા છે. Ideas2IT ના સ્થાપક અને અધ્યક્ષ મુરલી વિવેકાનંદને કહ્યું કે આ કર્મચારીઓની મદદથી જ કંપની આ સ્થાને પહોંચી છે. કંપની આ કર્મચારીઓને ગિફ્ટ નથી આપી રહી,  પરંતુ આ કર્મચારીઓએ તેમની મહેનત અને સમર્પણ વડે આ કમાણી કરી છે.

વિવેકાનંદે કહ્યું કે આજથી સાત-આઠ વર્ષ પહેલાં અમે સાથે મળીને વચન આપ્યું હતું કે જો આપણે આપણું લક્ષ્ય હાંસલ કરી લઈશું તો આ સફળતાનો સ્વાદ સાથે મળીને કરીશું. કાર ગિફ્ટ કરવી એ આ દિશામાં પહેલું પગલું છે. અમે આવનારા દિવસોમાં આનાથી પણ વધારે કરવાની યોજના બનાવીએ છીએ.

કંપનીના એક કર્મચારી પ્રશાંતે કહ્યું કે જ્યારે કંપની તરફથી ગિફ્ટ મળે છે ત્યારે તે ખૂબ જ ખુશી થાય છે. કંપની દ્વારા ઘણા લાંબા સમયથી આવી ભેટ આપવામાં આવે છે. અલગ-અલગ તહેવારો પર કંપની તરફથી આઈફોન, સોનાના સિક્કા જેવી મોંઘી ભેટ મળી છે. જો કે, ભેટ તરીકે કાર મેળવવી એ મોટી વાત છે.

IT ફર્મ Ideas2ITની  મુખ્ય ઓફિસ ચેન્નાઈમાં છે. કંપની હાઇ એન્ડ એન્જિનિયરિંગ પ્રોડક્ટ્સનું ઉત્પાદન કરે છે. કંપનીના યુએસ, મેક્સિકો અને ભારતમાં 500 થી વધુ કર્મચારીઓ છે. કંપની Facebook, Bloomberg, Microsoft, Oracle, Motorola, Roche, Medtronic અને અન્ય ઘણી બધી કંપનીઓને નવીનતમ સોફ્ટવેર પ્રોજેક્ટ્સ પહોંચાડવાનું કામ કરે છે. આ કંપનીની શરૂઆત વર્ષ 2009માં કરવામાં આવી હતી. આજે કંપની પાસે યુએસ, મેક્સિકો અને ભારત સહિત ઘણી જગ્યાએ ટેક્નોલોજિસ્ટ છે.

ચેન્નાઈ સ્થિત અન્ય એક IT કંપની Kissflow Inc એ તેના પાંચ કર્મચારીઓને પ્રીમિયમ BMW કાર ભેટમાં આપી છે. દરેક કારની કિંમત 1 કરોડ રૂપિયા છે. કંપનીએ પાંચ વરિષ્ઠ મેનેજમેન્ટના લોકોને આ અદ્ભુત ભેટ આપી છે. તેમની પ્રતિબદ્ધતા અને વફાદારીને ધ્યાનમાં રાખીને આ ભેટ આપવાનું નક્કી કરવામાં આવ્યું છે. કંપનીના સીઈઓ સુરેશ સંબંધમે જણાવ્યું હતું કે આ પાંચ લોકો કંપનીની શરૂઆતથી જ તેની સાથે જોડાયેલા છે. તેણે દરેક સમયે કંપનીને ટેકો આપ્યો અને મુશ્કેલ સમયમાં પણ તેની સાથે ઊભા રહ્યા. કોરોનાને કારણે કંપનીને ઘણું નુકસાન થયું, પરંતુ અમે તેમની મદદ વડે અત્યારે ઉભા છીએ.