કચ્છના RTO તંત્રએ આ શું કર્યું કે વાહન ચાલકો ફફડી ગયા ?

કચ્છ (Kutchh)ના આરટીઓ (RTO) તંત્રએ ગત જાન્યુઆરી મહિનામાં રાજ્યભરમાં મોખરાનું સ્થાન મેળવ્યું છે.૯૯.૭૧ લાખની માતબર આવક થવા પામી છે

છેલ્લા બે દાયકા દરમ્યાન કચ્છમાં વિકાસના પગલે ખાનગી કોમર્શિયલ બન્ને મુસાફર વાહનોની સંખ્યા અનેકગણી વધી છે. વાહનોની સંખ્યામાં વધારો થવાની સાથે માર્ગ પરિવહન વિભાગ (આરટીઓ)ની કામગીરીનું ભારણ પણ વધ્યું છે તેમ છતાં આરટીઓ તંત્રએ ગત જાન્યુઆરી મહિનામાં રાજ્યભરમાં મોખરાનું સ્થાન મેળવ્યું છે.

આ અંગે મળતી વિગતો મુજબ વર્ષ ર૦ર૩ના પ્રથમ મહિનામાં આરટીઓ તંત્રએ કચ્છ જિલ્લામાં ઓવરલોડ વાહનો પર રીતસર ધોંસ બોલાવી હતી. માત્ર એક માસમાં ઓવરલોડ વાહનોના ૬૦પ જેટલા મેમો ફાટયા હતા. ઓવરલોડ વાહનો પર દંડનીય કામગીરીમાં કચ્છનું આરટીઓ તંત્ર રાજ્યભરમાં સૌથી મોખરે રહ્યું હતું. કચ્છના પ્રવેશદ્વાર સમા સામખિયાળીથી છેક લખપત સુધીના વિસ્તારમાં કોર્મશિયલ વાહનો મોટી સંખ્યામાં દોડે છે. જેમાં નમક, બોકસાઈટ, સિમેન્ટ વિગેરેનું પરિવહન કરતા વાહનો ઓવરલોડ દોડતા રહે છે. આરટીઓ તંત્રએ જાન્યુઆરી માસમાં ૬૦પ કેસ કરી દંડનીય કામગીરી કરી હતી. જેના પેટે આરટીઓ તંત્રની તિજોરીને રિકવરી પેટે ૯૯.૭૧ લાખની માતબર આવક થઈ હતી અને સંપૂર્ણ રિકવરી થયા બાદ આ આંક હજુ વધુ ઉંચો જશે.

જાન્યુઆરી મહિનામાં ઓવરલોડ વાહનોના ૬૦પ મેમો ઉપરાંત પીયુષી, ઈન્સ્યુરન્સ, લાયસન્સ વિગેરે જેવા અન્ય મેમોની સંખ્યા ૧૮રર રહી હતી. જેના આધારે રિકવરી પેટે અંદાજીત પર લાખની આવક થઈ ચુકી છે અને વધુ વસુલાત થયા બાદ તેનો પણ આંક ઉંચો જશે. આમ જાન્યુઆરી માસમાં આરટીઓ તંત્રએ ર૪ર૭ મેમો ઈસ્યુ કરી સપાટો બોલાવ્યો હતો અને દંડ પેટે ૧.પ૧ કરોડની વસુલાત થઈ હતી. ચાલુ ફેબ્રુઆરી માસમાં ઓવરલોડ વાહનો પર ૪૦૦ જેટલા મેમો ઈસ્યુ થયા છે અને અંદાજે રૂા. ૭૦ લાખ જેટલી આવક થઈ છે. કામગીરીમાં સતત ભારણ વચ્ચે આરટીઓ તંત્રએ ધાક બેસાડતી કામગીરી કરી કચ્છમાં ઓરવલોડ પરિવહન કરતા લોકોમાં ફફડાટ ફેલાયો છે. હાલ ફ્રેબ્રુઆરી મહિનામાં પણ દંડકીય કાર્યવાહીમાં વધારો થવાની શકયતા છે.

આ પણ વાંચો---અદાણી ગૃપમાં રોકાણથી LICને લાગ્યો મોટો ઝટકો, 50 દિવસમાં થયું આટલું નુકશાન