World Cup 2023 માં આ ખેલાડીઓને નહી મળે રમવાની તક, એક છે ભારતનો ઓલરાઉન્ડર
ICC વર્લ્ડ કપ 2023 ગુરુવાર 5 ઓક્ટોબરથી શરૂ થવા જઇ રહ્યો છે. આ મેગા ટૂર્નામેન્ટ આ વખતે ભારતમાં યોજાઈ રહી છે. ત્યારે ભારતીય દર્શકોની વર્લ્ડ કપ જીતને લઇને આશા પણ વધુ જોવા મળી રહી છે. આ ટૂર્નામેન્ટ માટે તમામ ટીમોએ...
ICC વર્લ્ડ કપ 2023 ગુરુવાર 5 ઓક્ટોબરથી શરૂ થવા જઇ રહ્યો છે. આ મેગા ટૂર્નામેન્ટ આ વખતે ભારતમાં યોજાઈ રહી છે. ત્યારે ભારતીય દર્શકોની વર્લ્ડ કપ જીતને લઇને આશા પણ વધુ જોવા મળી રહી છે. આ ટૂર્નામેન્ટ માટે તમામ ટીમોએ પોતાના ખેલાડીઓની જાહેરાત કરી દીધી છે પરંતુ ઘણા એવા ખેલાડીઓ પણ છે કે જેઓ આ વર્લ્ડ કપમાં રમી શકશે નહીં. જેઓ કોઇને કોઇ કારણોસર આ મેગા ઈવેન્ટને મિસ કરશે. તો આવો જાણીએ કોણ છે તે ખેલાડીઓ કે જેઓ આ વર્લ્ડ કપમાં નહીં રમી શકે.
વર્લ્ડ કપ રમવા માટે તમામ ટીમો હાલમાં ભારતમાં આવી ચુકી છે. ક્રિકેટની આ સૌથી મોટી ટુર્નામેન્ટની શરૂઆત 5 ઓક્ટોબરે ઈંગ્લેન્ડ અને ન્યૂઝીલેન્ડ વચ્ચેની મેચથી થશે. જો કે ટીમ ઈન્ડિયા તેની પ્રથમ મેચ 8 ઓક્ટોબરે રમશે. આ દરમિયાન ટીમોએ પોતાની ટીમમાં જે ફેરફાર કરવાના છે તે પણ કરી દીધા છે. પરંતુ ચોક્કસપણે થયું છે કે જે ખેલાડીઓની વર્લ્ડ કપમાં ભાગીદારી નિશ્ચિત લાગતી હતી તે હવે તેમાંથી બહાર થઈ ગયા છે. આનાથી ટીમોને મોટો ફટકો પડ્યો છે. જેમા ઘણા એવા પણ ખેલાડીઓ છે જે પોતાના દમ પર પોતાની ટીમને જીત અપાવી શકે છે.
અક્ષર પટેલ
ટીમ ઈન્ડિયાના શાનદાર ખેલાડીઓમાંથી એક અક્ષર પટેલ વર્લ્ડ કપ માટે ભારતીય ટીમની ટીમમાં સામેલ થયો હતો. પરંતુ કોઈને ખબર નહોતી કે બીજું કંઈક થવાનું છે. એશિયા કપમાં બાંગ્લાદેશ સામેની ભારતની સુપર ફોરની મેચ દરમિયાન અક્ષરને ઈજા થઈ હતી અને તે ટીમની બહાર થઇ ગયો હતો. તે પછી તે ટીમમાં પોતાની જગ્યા બનાવી શક્યો નથી. અગાઉ એવી આશા હતી કે તે જલ્દી સ્વસ્થ થઈ જશે, પરંતુ તેમ થયું નહીં અને આખરે BCCI એ અક્ષર પટેલને બાકાત રાખવાનો અને રવિચંદ્રન અશ્વિનનું નામ આ યાદીમાં સામેલ કરવાનો નિર્ણય લેવો પડ્યો. એટલે કે હવે અક્ષર પટેલ વર્લ્ડ કપ 2023 રમી શકશે નહીં.
નસીમ શાહ
ODI વર્લ્ડ કપ પહેલા પાકિસ્તાનને મોટો ફટકો પડ્યો. ટીમના સ્ટાર ફાસ્ટ બોલર નસીમ શાહ વર્લ્ડ કપ ટીમનો ભાગ નથી. 20 વર્ષીય પાકિસ્તાની ફાસ્ટ બોલરને એશિયા કપની સુપર-4 મેચમાં ભારત સામે ખભામાં ઈજા થઈ હતી. ઈજાના કારણે પાકિસ્તાની બોલર શ્રીલંકા સામેની આગામી સુપર-4 મેચમાં ચૂકી ગયો હતો અને ત્યારબાદ તે ટૂર્નામેન્ટમાંથી બહાર થઈ ગયો હતો. જે પછી એવું કહેવામાં આવી રહ્યું હતું કે તે વર્લ્ડ કપ પહેલા ઠીક થઇ જશે પણ તેવું ન થયું અને તે આ મેગા ઈવેન્ટમાંથી બહાર થઇ ગયો.
એનરિક નોર્કિયા
દક્ષિણ આફ્રિકાનો ફાસ્ટ બોલર એનરિક નોર્કિયા પીઠની ઈજાને કારણે ટીમમાંથી બહાર થઇ ગયો છે. આ ખેલાડીને ઓસ્ટ્રેલિયા વિરુદ્ધની ODI શ્રેણીમાં ઈજા થઇ હતી. ફાસ્ટ બોલર એનરિક નોર્કિયાની ઈજાને લઈને ક્રિકેટ સાઉથ આફ્રિકાએ એક નિવેદન જારી કરીને કહ્યું હતું કે, “આફ્રિકન ફાસ્ટ બોલર એનરિક નોર્કિયા પીઠના નીચેના ભાગમાં ઈજાને કારણે ઓસ્ટ્રેલિયા સામેની બાકીની બે વનડે મેચમાંથી બહાર થઈ ગયો છે. જોકે, હવે સમાચાર છે તે મુજબ વર્લ્ડ કપમાં તે રમી શકશે નહીં.
વાનિન્દુ હસરંગા
આ મેગા ઈવેન્ટ પહેલા શ્રીલંકાને મોટો આંચકો લાગ્યો છે. ટીમનો સ્ટાર ઓલરાઉન્ડર વાનિન્દુ હસરંગા આખી ટૂર્નામેન્ટમાંથી બહાર થઈ ગયો છે. હસરંગાને તાજેતરમાં લંકા પ્રીમિયર લીગ (LPL) દરમિયાન ઈજા થઈ હતી. ઈજાના કારણે તે એશિયા કપ 2023માં પણ રમી શક્યો ન હતો. શ્રીલંકા ક્રિકેટ બોર્ડને શ્રીલંકાના વાનિન્દુ હસરંગા વિશે પણ આશા હતી કે તે વર્લ્ડ કપ રમશે, પરંતુ તે પણ રમી શકશે નહીં તે દુર્ભાગ્યપૂર્ણ માનવામાં આવશે.