એક Nasrallah ઠાર તો નવા 100 Nasrallah પેદા થયા....

• ઇઝરાયલી હવાઇ હુમલામાં હિઝબુલ્લાના વડા નસરાલ્લાહની હત્યા થયા બાદ નવો ટ્રેન્ડ
• ઇરાકમાં 100 થી વધુ નવજાત બાળકોના નામ 'નસરાલ્લાહ' રાખવામાં આવ્યા
• તેમના મૃત્યુ બાદ તેમનું નામ નવી પેઢી માટે પ્રેરણાસ્ત્રોત બની રહ્યું છે
• આરબ દેશોમાં 'નસરાલ્લાહ' નામનું હંમેશા વિશેષ મહત્વ
• શરૂ થયેલા આ સંઘર્ષના વારસાને આગળ ધપાવવાની નિશાની

Hezbollah chief Nasrallah : ઇઝરાયલી હવાઇ હુમલામાં હિઝબુલ્લાના વડા નસરાલ્લાહ (Hezbollah chief Nasrallah)ની હત્યા થયા બાદ મધ્ય પૂર્વમાં ખળભળાટ મચી ગયો છે તો બીજી તરફ ઇરાકમાં 100 થી વધુ નવજાત બાળકોના નામ 'નસરાલ્લાહ' રાખવામાં આવ્યા છે. તેમના નામની લોકપ્રિયતા ઝડપથી વધી રહી છે. નસરાલ્લાહને ઈઝરાયેલ સામે સંઘર્ષ અને પ્રતિકારનું પ્રતીક માનવામાં આવતા હતા. હવે તેમના મૃત્યુ બાદ તેમનું નામ નવી પેઢી માટે પ્રેરણાસ્ત્રોત બની રહ્યું છે.

ઈઝરાયેલના હવાઈ હુમલામાં હસન નસરાલ્લાહ માર્યા ગયા

ઈઝરાયેલે 27 સપ્ટેમ્બર 2024ની રાત્રે એક હવાઈ હુમલામાં હિઝબુલ્લાના ચીફ હસન નસરાલ્લાહને મારી નાખ્યા હતા. આ હુમલો બેરૂતના દહીયેહ વિસ્તારમાં થયો હતો, જે હિઝબુલ્લાહનો ગઢ માનવામાં આવે છે. ઈઝરાયેલે અહીં હવાઈ હુમલો કરીને હિઝબુલ્લાહના હેડક્વાર્ટરને નષ્ટ કરી દીધું. નસરાલ્લાહ આ 6 માળની ઈમારતની નીચે બનેલા બંકરમાં હતા. તેમના મૃત્યુને માત્ર હિઝબુલ્લાહ માટે જ નહીં પરંતુ સમગ્ર આરબ વિશ્વ માટે એક મોટો આંચકો માનવામાં આવી રહ્યો છે. ઇઝરાયલે આ હુમલાને તેની સૌથી મોટી ઉપલબ્ધિ તરીકે જોયો. પરંતુ આ ઘટના બાદ નસરાલ્લાહની લોકપ્રિયતા અને તેમના પ્રત્યેના આદરમાં એક નવું સ્વરૂપ આવ્યું છે. આ જ કારણ છે કે આરબ દેશોના લોકો તેમના નવજાત બાળકોનું નામ 'નસરાલ્લાહ' રાખી રહ્યા છે.

આ પણ વાંચો----હિઝબુલ્લાનો ચીફ હસન નસરાલ્લાહ મિસાઇલ હુમલામાં માર્યો ગયો

'નસરાલ્લાહ' નામનું હંમેશા વિશેષ મહત્વ

આરબ દેશોમાં 'નસરાલ્લાહ' નામનું હંમેશા વિશેષ મહત્વ રહ્યું છે. તેનો અર્થ 'ભગવાનનો વિજય' થાય છે અને આ નામ સંઘર્ષ અને પ્રતિકારની ભાવના સાથે સંકળાયેલું છે. હસન નસરાલ્લાહને કારણે આ નામ વધુ લોકપ્રિય બન્યું હતું. તેમના મૃત્યુ બાદ ઈરાકમાં 100થી વધુ બાળકોનું નામ 'નસરાલ્લાહ' રાખવામાં આવ્યું છે.

ઇરાકના વિવિધ વિસ્તારોમાં 100 નવજાત શિશુઓના નામ નસરાલ્લાહ તરીકે નોંધ્યા

ઈરાકના સ્વાસ્થ્ય મંત્રાલયે કહ્યું છે કે હસન નસરાલ્લાહના મૃત્યુ બાદથી લગભગ 100 નવજાત બાળકોના નામ 'નસરાલ્લાહ' રાખવામાં આવ્યા છે. સ્થાનિક મીડિયાના અહેવાલો અનુસાર, મંત્રાલયે ઇરાકના વિવિધ વિસ્તારોમાં 100 નવજાત શિશુઓના નામ નસરાલ્લાહ તરીકે નોંધ્યા છે. આ એક સંકેત છે કે નસરાલ્લાહના મૃત્યુ પછી પણ તેમનું નામ ઊંડી છાપ છોડી રહ્યું છે.

નસરાલ્લાહના નામકરણનો હેતુ

અહેવાલો અનુસાર, નસરાલ્લાહ નામ રાખનારા માતા-પિતા તેને માત્ર એક નામ નથી માનતા પરંતુ તેમના માટે તે હિંમત, પ્રતિકાર અને ધાર્મિક પ્રતિબદ્ધતાનું પ્રતીક છે. તેમના મતે, આ નામ હસન નસરાલ્લાહ પ્રત્યે આદર દર્શાવવાની તેમની રીત છે. તે એમ પણ માને છે કે આ નામથી તેના બાળકો નસરાલ્લાહના વિચારો અને તેના નેતૃત્વથી પ્રભાવિત થશે. એવું લાગે છે કે કેટલાક આરબ દેશોમાં આ નામ હવે નવા યુગ માટે પ્રતિકાર અને સંઘર્ષની ઓળખ બનવા તરફ આગળ વધી રહ્યું છે.

આ પણ વાંચો---Hezbollahને ખતરનાક સંગઠન બનાવનાર નસરાલ્લાહ રૂઢિચુસ્ત ઇસ્લામવાદી નેતા ન હતા...

અરેબિયામાં શરૂ થયેલા આ સંઘર્ષના વારસાને આગળ ધપાવવાની નિશાની

આ નામકરણ માત્ર હસન નસરાલ્લાહને શ્રદ્ધાંજલિ નથી, પરંતુ અરેબિયામાં શરૂ થયેલા આ સંઘર્ષના વારસાને આગળ ધપાવવાની નિશાની પણ છે. તેમના નામના કારણે આ બાળકો હસન નસરાલ્લાહ અને તેમની વિચારધારાનો ઉલ્લેખ દાયકાઓ સુધી જીવંત રાખશે. જ્યારે પણ તેમનું નામ લેવામાં આવશે અથવા ત્યાં બોલાવવામાં આવશે, ત્યારે તે નસરાલ્લાહના સંઘર્ષ, પ્રતિકાર અને ભૂમિકાની યાદ અપાવશે. હસન નસરાલ્લાહનું નામ એક પેઢીથી બીજી પેઢી સુધી સાચવવાનો પણ એક માર્ગ છે, જેથી ભવિષ્યમાં તેને સંઘર્ષના પ્રતીક તરીકે જોવામાં આવે.

હસન નસરાલ્લાહ કોણ હતા?

હસન નસરાલ્લાહે 1992માં હિઝબુલ્લાહનું નેતૃત્વ સંભાળ્યું હતું. લોકો તેમને એક પ્રભાવશાળી નેતા માનતા હતા જે ઇઝરાયેલ સામે પ્રતિકારના મજબૂત ચહેરા તરીકે ઉભરી આવ્યા હતા. તેમણે લેબનોનમાં હિઝબુલ્લાહને મજબૂત લશ્કરી અને રાજકીય દળ તરીકે સ્થાપિત કર્યું. તેમની વ્યૂહરચના અને ભાષણો આરબ વિશ્વમાં ખૂબ પ્રભાવશાળી હતા. તેમની લોકપ્રિયતા સતત વધતી રહી. હવે તેમના મૃત્યુ પછી પણ તેમના સમર્થકો તેમને હીરો તરીકે યાદ કરી રહ્યા છે.

નસરાલ્લાહ શા માટે મહત્વપૂર્ણ છે?

હસન નસરાલ્લાહ માત્ર હિઝબુલ્લાહનો મુખ્ય અને નેતા ન હતા, પરંતુ આરબ વિશ્વમાં તેમની મજબૂત ઓળખ પણ બની ગઈ હતી. તેમના નેતૃત્વ હેઠળ હિઝબુલ્લાએ ઈઝરાયેલ સામે સતત સંઘર્ષ કર્યો અને નસરાલ્લાહે આ સંઘર્ષને ધર્મ અને રાષ્ટ્ર પ્રત્યેની ફરજ તરીકે રજૂ કર્યો. આ જ કારણ છે કે તેમના મૃત્યુ બાદ મુસ્લિમ દેશોમાં તેમનું નામ અપનાવવાનો નવો ટ્રેન્ડ જોવા મળી રહ્યો છે.

નસરાલ્લાહ, આરબ વિશ્વના સૌથી પ્રશંસનીય નેતા

2008માં કરાયેલા એક સર્વે મુજબ નસરાલ્લાહને આરબ વિશ્વના સૌથી લોકપ્રિય નેતા માનવામાં આવતા હતા. તેમની લોકપ્રિયતાનો આધાર તેમની નેતૃત્વ ક્ષમતા જ ન હતી, પરંતુ ઇઝરાયલ સામેના તેમના કડક વલણ અને સંઘર્ષે પણ તેમાં મોટી ભૂમિકા ભજવી હતી. તેમની છબીએ તેમને આરબ લોકોમાં એક આદર્શ નેતા તરીકે સ્થાપિત કર્યા.

નસરાલ્લાહના નિધનથી એક તરફ મધ્ય પૂર્વની રાજનીતિમાં મોટો બદલાવ આવ્યો

હસન નસરાલ્લાહના નિધનથી એક તરફ મધ્ય પૂર્વની રાજનીતિમાં મોટો બદલાવ આવ્યો છે, તો બીજી તરફ તેમના નામના પ્રતીકાત્મક ઉપયોગ દ્વારા તેમની છબીને વધુ મજબૂત કરવાના પ્રયાસો થઈ રહ્યા છે. નામ રાખવાની પહેલ પરથી સમજી શકાય છે કે આરબ વિશ્વમાં નસરાલ્લાહ નામ હજુ પણ સંઘર્ષ, પ્રતિકાર અને આદરનું પ્રતીક છે. ઇરાકમાં નવજાત બાળકોનું નામ નસરાલ્લાહ રાખવાનું પગલું પણ આ તરફ ઇશારો કરે છે. તે જ સમયે, તે એ પણ સંકેત છે કે ત્યાંના લોકો તેના વિચારો અને તેના વારસાને આવનારી પેઢીઓમાં જીવંત રાખવાનો પ્રયાસ કરી રહ્યા છે.

આ પણ વાંચો---Israeli Airstrikeમાં મોતને ભેટેલી ઝૈનબ કોણ ?