મહારાષ્ટ્રમાં અજીત પવારના અચાનક જ ભાજપ સાથે મળીને રાજ્યના DYCM બની જવાની ઘટના બાદથી રાજકારણ ગરમાયું છે. આ ઘટના બાદથી જ સૌ કોઇની નજર NCP ના નેતા શરદ પવાર પર છે. ત્યારે આજે દિલ્હીમાં રાષ્ટ્રીય કાર્યકારિણીની બેઠક મળી હતી, જે પૂર્ણ થયા બાદ NCP ના રાષ્ટ્રીય અધ્યક્ષ શરદ પવારે અજીત પવાર પર નિશાન સાધ્યું હતું. તેમણે કહ્યું કે, હું NCPનો અધ્યક્ષ છું. તેમણે તેમના ભત્રીજા અને મહારાષ્ટ્રના નવા ડેપ્યુટી સીએમ અજિત પવારના તમામ દાવાઓને ફગાવી દીધા છે. તેમણે અજિત પવારના ઉમરના નિવેદનનો પણ યોગ્ય જવાબ આપ્યો હતો. તેણે કહ્યું કે, હું 82 વર્ષનો હોઉં કે 92 વર્ષનો, હું હજુ પણ અસરકારક છું.

આજની બેઠકે અમારું મનોબળ વધારવામાં મદદ કરીઃ શરદ પવાર

શરદ પવારે કહ્યું, જે કંઈ પણ થઈ રહ્યું છે તેનાથી હું ખુશ છું કારણ કે જે લોકો તેમના વોટનું વચન આપીને ખોટા રસ્તે ચાલ્યા ગયા તેમને તેની ભારે કિંમત ચૂકવવી પડશે. રાજ્યની સ્થિતિ બદલાશે. ત્યાં મહારાષ્ટ્રના લોકો ઉદ્ધવ ઠાકરેના નેતૃત્વમાં રાષ્ટ્રવાદી કોંગ્રેસ, કોંગ્રેસ અને શિવસેનાને શાસન આપશે. તેમણે વધુમાં કહ્યું કે, મને ખુશી છે કે જેમને હાંકી કાઢવામાં આવ્યા હતા તેઓ સિવાય અન્ય લોકો આટલા ઓછા સમયમાં મીટિંગ માટે આવ્યા હતા. અમારા તમામ સાથીઓની માનસિકતા પક્ષને મજબૂતીથી આગળ લઈ જવાની હતી. મને ખુશી છે કે આજની મીટીંગ આપણી ભાવનાઓને વધારવામાં મદદરૂપ થશે. હું NCPનો અધ્યક્ષ છું, જો કોઈ આવો દાવો કરી રહ્યું છે તો તેમાં કોઈ સત્ય નથી.

શરદ પવાર જૂથની બેઠકમાં આઠ ઠરાવો પસાર કરવામાં આવ્યા હતા

શરદ પવાર જૂથના પીસી ચાકોએ કહ્યું કે, દિલ્હીમાં NCP ની કાર્યકારી બેઠક પૂરી થયા બાદ શરદ પવાર રાષ્ટ્રીય અધ્યક્ષ તરીકે ચૂંટાયા હતા. અમે રાષ્ટ્રીય અધ્યક્ષ હોવાના કોઈના દાવાને ગંભીરતાથી લેતા નથી. તેમણે પ્રેસ કોન્ફરન્સમાં કહ્યું કે, અમારું સંગઠન હજુ પણ એકજૂટ છે અને અમે શરદ પવારની સાથે છીએ. તેમણે જણાવ્યું કે, બેઠકમાં આઠ ઠરાવો પસાર કરવામાં આવ્યા હતા. જેમાં અજીત પવાર સહિત તમામ બળવાખોર ધારાસભ્યોને પાર્ટીમાંથી હાંકી કાઢવાનો નિર્ણય લેવામાં આવ્યો હતો. કાર્યકારી સમિતિ દ્વારા પસાર કરાયેલા ઠરાવોમાં ભારતીય જનતા પાર્ટી (BJP) સરકારના 'અલોકતાંત્રિક અને ગેરબંધારણીય પગલાં' સામે સ્ટેન્ડ લેવાનો પણ સમાવેશ થાય છે. ચાકોએ કેન્દ્ર સરકારની નીતિઓની પણ ટીકા કરી હતી અને આક્ષેપ કર્યો હતો કે મોંઘવારી, બેરોજગારી અને મહિલાઓની દુર્દશા વધી રહી છે.

NCP Vs NCP પર પૃથ્વીરાજ ચવ્હાણે શું કહ્યું ?

મહારાષ્ટ્રના ભૂતપૂર્વ CM અને કોંગ્રેસના વરિષ્ઠ નેતા પૃથ્વીરાજ ચવ્હાણે કહ્યું હતું કે, “અજીત પવારને સાથે લાવવાની રાજનીતિ દિલ્હીમાં જ થઈ હતી. અમારું માનવું છે કે કદાચ 10-11 ઓગસ્ટ પહેલા એકનાથ શિંદે વિરુદ્ધ નિર્ણય લેવો પડશે. કદાચ તેમને સસ્પેન્ડ કરવામાં આવશે કારણ કે બીજો કોઈ રસ્તો નથી. જો 16 ધારાસભ્યો અને મુખ્યમંત્રી બહાર જશે તો નવા CM ની જરૂર પડશે. તે કદાચ અજીત પવારને જવાબદારી સોંપશે. કદાચ ભાજપ હાઈકમાન્ડે અજીત પર ભરોસો મૂક્યો છે.

રાહુલ ગાંધીએ શરદ પવાર સાથે કરી મુલાકાત

વળી, રાષ્ટ્રવાદી કોંગ્રેસ પાર્ટી સંબંધિત સંકટ વચ્ચે કોંગ્રેસના પૂર્વ અધ્યક્ષ રાહુલ ગાંધીએ ગુરુવારે NCP અધ્યક્ષ શરદ પવાર સાથે મુલાકાત કરી હતી. સૂત્રોનું કહેવું છે કે, પવારના નિવાસસ્થાને આ બેઠક દરમિયાન રાહુલ ગાંધીએ તેમની સાથે એકતા વ્યક્ત કરી હતી. પવારના ભત્રીજા અજીત પવાર અને NCPના અન્ય આઠ ધારાસભ્યો શિવસેના અને ભારતીય જનતા પાર્ટી (BJP) ગઠબંધન સરકારમાં જોડાયા અને મંત્રી તરીકે શપથ લીધા. અજીત પવાર નાયબ મુખ્યમંત્રી બન્યા છે. અજીત પવારના જૂથે NCPના નામ અને ચૂંટણી ચિન્હ (ઘડિયાળ) પર પણ દાવો કર્યો છે. આ જૂથનો દાવો છે કે તેને 40થી વધુ ધારાસભ્યોનું સમર્થન છે. મહારાષ્ટ્ર વિધાનસભામાં NCPના 53 સભ્યો છે.

આ પણ વાંચો - કાકા-ભત્રીજા વચ્ચેની લડાઇ પહોંચી દિલ્હી, શરદ પવારની આજે નિર્ણાયક બેઠક

આ પણ વાંચો - Sharad Pawar vs Ajit Pawar : મહારાષ્ટ્રમાં પાવર વૉર, શરદ પવારને NCP અધ્યક્ષ પદેથી હટાવ્યાનો દાવો

ગુજરાત ફર્સ્ટ તમને સમાચારોથી હંમેશા અવગત રાખશે

ગુજરાતની નંબર 1 ગુજરાતી ન્યૂઝ ચેનલ એટલે ગુજરાત ફર્સ્ટ (Gujarat First) – જે ગુજરાતીઓને દરેક સમાચારમાં રાખે છે આગળ. ગુજરાત, રાષ્ટ્રીય, આંતરરાષ્ટ્રીય, ઇલેક્શન, બિઝનેસ, સ્પોર્ટ્સ, મનોરંજન સહિતના દરેક સમાચાર વાંચો ગુજરાત ફર્સ્ટ પર. હવે દરેક સમાચાર આંગળીના ટેરવે આપના મોબાઈલમા, ડાઉનલોડ કરો અમારી લેટેસ્ટ Android અને iOS એપ. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ