Jammu-Kashmir માં આતંકીઓ સાથે અથડામણમાં 4 જવાન શહીદ

Jammu-Kashmir : જમ્મુ-કાશ્મીર (Jammu-Kashmir) ના ડોડામાં આતંકવાદીઓ અને સુરક્ષા દળો વચ્ચે અથડામણ ચાલુ છે. જમ્મુ ડિવિઝનના ડોડા જિલ્લાના ધારી ખોટ ઉરારબાગી વિસ્તારના જંગલોમાં સોમવારે એન્કાઉન્ટર શરૂ થયું હતું. સૂત્રોના જણાવ્યા અનુસાર આ અથડામણમાં ચાર જવાન શહીદ થયા છે અને કેટલાક જવાનો ઘાયલ થયાના સમાચાર પણ છે. જમ્મુ-કાશ્મીર પોલીસ અને ભારતીય સેનાના જવાનો આ ઓપરેશનમાં લાગેલા છે. દરમિયાન, ડોડા હાઇવે પણ સંપૂર્ણ હાઇ એલર્ટ મોડ પર મૂકવામાં આવ્યો છે અને સુરક્ષા દળો સમગ્ર વિસ્તારમાં દેખરેખ રાખી રહ્યા છે. આ સાથે જ દરેક વાહનનું ચેકિંગ કરવામાં આવી રહ્યું છે.

જંગલોમાં ઘણા આતંકવાદીઓ છુપાયેલા હોવાના સમાચાર

જમ્મુ ડિવિઝનના ડોડા જિલ્લાના ધારી ખોટ ઉરારબાગી વિસ્તારના જંગલોમાં ઘણા આતંકવાદીઓ છુપાયેલા હોવાના સમાચાર છે. વિસ્તારમાં આતંકવાદીઓ છુપાયા હોવાની માહિતી મળ્યા બાદ સેનાએ જમ્મુ-કાશ્મીર પોલીસ અને CRPF સાથે મળીને ઓપરેશન શરૂ કર્યું હતું. આ પછી આતંકવાદીઓએ ગોળીબાર શરૂ કર્યો, જેના પછી સેનાના જવાનોએ જવાબમાં એન્કાઉન્ટર શરૂ કર્યું.

ગત રાત્રિથી એન્કાઉન્ટર ચાલુ

સેનાના 16 કોર્પ્સ અનુસાર, ડોડાના ઉત્તરમાં સામાન્ય વિસ્તારમાં આતંકવાદીઓ છુપાયા હોવાની બાતમી મળી હતી, ત્યારબાદ ભારતીય સેના અને જમ્મુ-કાશ્મીરના સૈનિકોએ સંયુક્ત ઓપરેશન શરૂ કર્યું હતું. રાત્રે લગભગ 9 વાગ્યે આતંકવાદીઓની ઓળખ થઈ હતી, ત્યારબાદ સુરક્ષા દળોએ સર્ચ ઓપરેશન શરૂ કર્યું હતું. આ પછી આતંકીઓ અને સુરક્ષાદળો વચ્ચે અથડામણ શરૂ થઈ ગઈ. હાલ ઓપરેશન ચાલુ છે અને સમગ્ર વિસ્તારમાં સર્ચ ઓપરેશન હાથ ધરવામાં આવી રહ્યું છે.

શું રાજકીય પક્ષોએ મત માટે આતંકવાદી નેટવર્કનો વિસ્તાર કર્યો?

જ્યાં જમ્મુના ડોડામાં આતંકીઓ અને સુરક્ષાદળો વચ્ચે એન્કાઉન્ટર ચાલી રહ્યું છે. દરમિયાન રાજ્યના ડીજીપી આરઆર સ્વૈને ખુલાસો કર્યો છે કે પંજાબની સરહદેથી આતંકવાદીઓ જમ્મુ-કાશ્મીરમાં ઘૂસણખોરી કરી રહ્યા છે. તે જ સમયે, જમ્મુ અને કાશ્મીરમાં કાર્યરત રાજકીય પક્ષોએ વોટ માટે આતંકવાદી નેટવર્કનો વિસ્તાર કર્યો. આરઆર સ્વૈને કહ્યું, 'આતંકવાદીઓના માર્યા જવા પર તેમના પરિવારો પ્રત્યે સહાનુભૂતિ દર્શાવવી એ ન્યૂ નોર્મલનો ભાગ છે. તેઓ ઘરે જઈને સહાનુભૂતિ વ્યક્ત કરે છે. આતંકવાદને ખતમ કરવાની સરકારની ઝુંબેશને નબળી પાડવાનો પ્રયાસ કરવામાં આવ્યો હતો. ડીજીપી સ્વૈને પોતાના નિવેદનમાં જમાત-એ-ઈસ્લામીનો પણ ઉલ્લેખ કર્યો અને કહ્યું કે આવા સંગઠનો આતંકવાદીઓને ધાર્મિક સમર્થન આપે છે.

સેનાએ અમરનાથ યાત્રા પર હુમલાનું ષડયંત્ર નિષ્ફળ બનાવ્યું

આતંકવાદીઓ અમરનાથ યાત્રાને વિક્ષેપિત કરવાની યોજના બનાવી રહ્યા હતા. ઘૂસણખોરીનો પ્રયાસ કરી રહેલા આતંકવાદીઓએ અમરનાથ યાત્રામાં વિક્ષેપ પાડવાની યોજના બનાવી હતી.સમાર્યા ગયેલા ત્રણ આતંકવાદીઓ ઉચ્ચ પ્રશિક્ષિત અને ભારે હથિયારોથી સજ્જ હતા. જમ્મુ અને કાશ્મીર બ્રિગેડના કમાન્ડર એનઆર કુલકર્ણીએ કહ્યું, 'છેલ્લા કેટલાક અઠવાડિયાથી, કુપવાડા જિલ્લાના કેરન સેક્ટરમાં સ્થિત ઘણા લૉન્ચ પેડમાં આતંકવાદીઓની હાજરી અંગે વિવિધ ગુપ્તચર એજન્સીઓ પાસેથી માહિતી પ્રાપ્ત થઈ છે. અમારા સૈનિકો છેલ્લા કેટલાક અઠવાડિયાથી નિયંત્રણ રેખા પર આક્રમક રીતે વર્ચસ્વ જમાવી રહ્યાં છે. 12 જુલાઈના રોજ, અમારી ગુપ્તચર એજન્સી દ્વારા ચોક્કસ માહિતી પ્રાપ્ત થઈ હતી, જેની જમ્મુ અને કાશ્મીર પોલીસ દ્વારા પુષ્ટિ કરવામાં આવી હતી કે વિદેશી આતંકવાદીઓનું એક જૂથ ગાઢ જંગલો અને નાળાઓનો લાભ લઈને કેરન સેક્ટરમાં ઘૂસણખોરી કરવાનો પ્રયાસ કરી શકે છે. ઘૂસણખોરીના જાણીતા માર્ગો પર સુરક્ષા દળોએ કરેલા સંયુક્ત હુમલામાં ત્રણ આતંકવાદીઓ માર્યા ગયા હતા. સર્ચ ઓપરેશન દરમિયાન મોટી સંખ્યામાં હથિયારો મળી આવ્યા હતા.

આ પણ વાંચો----- ગુજરાતના સંરક્ષણ PRO અને MoDના પ્રવક્તા ગ્રૂપ કેપ્ટન એન. મનિષ વિશિષ્ટ સેવા બાદ IAFમાંથી થયા નિવૃત્ત