MCD ની વોર્ડ સમિતિની ચૂંટણીમાં BJP નો દબદબો, AAP ને લાગ્યો આંચકો
- MCD સ્ટેન્ડિંગ કમિટીની ચૂંટણીમાં BJPનો વિજય, AAPને આંચકો
- BJPએ MCD સ્ટેન્ડિંગ કમિટીની ચૂંટણીમાં 7 ઝોનમાં જીત મેળવી
- AAP ને લાગ્યો આંચકો, 5 ઝોનમાં જ મેળવી જીત
Delhi : દિલ્હી મ્યુનિસિપલ કોર્પોરેશન (MCD) ની વોર્ડ સમિતિની ચૂંટણીમાં ભારતીય જનતા પાર્ટીએ (BJP) 12માંથી 7 ઝોનમાં વિજય મેળવીને પોતાનો દબદબો સાબિત કર્યો છે. આ ચૂંટણીમાં, જે બુધવારે સવારે 10 વાગ્યાથી સાંજે 4 વાગ્યા સુધી ચાલી હતી, તેના પરિણામો સાંજે 6:30 વાગ્યા સુધીમાં જાહેર કરવામાં આવ્યા હતા. આ ચૂંટણીમાં આમ આદમી પાર્ટીને (AAP) આંચકો લાગ્યો હતો, અને તે માત્ર 5 ઝોનમાં જ જીત મેળવી શકી હતી.
MCD ની વોર્ડ સમિતિની ચૂંટણીમાં AAP પાછળ
આ ચૂંટણી દરમિયાન, કાઉન્સિલરોએ 12 ઝોન કક્ષાની વોર્ડ સમિતિઓમાંથી 9 ઝોનમાં પ્રમુખ, ઉપપ્રમુખ અને સ્થાયી સમિતિ (MCD ની સર્વોચ્ચ નિર્ણય લેતી સંસ્થા) ના એક-એક સભ્યને ચૂંટવા માટે મતદાન કર્યું હતું. ત્રણ ઝોનમાં કોઈપણ પક્ષે પોતાના ઉમેદવારો ઉભા ન કર્યા હોવાથી ત્યાં મતદાન યોજાયું ન હતું. આ ચૂંટણીમાં ભારતીય જનતા પાર્ટીએ 7 ઝોનમાં જીત મેળવી હતી, જ્યારે આમ આદમી પાર્ટી માત્ર 5 ઝોનમાં જ પોતાનું પ્રદર્શન સુધારી શકી હતી. આ પરિણામોમાં, BJP એ વધુ પ્રમાણમાં સફળતા મેળવીને પોતાની સ્થિતિ મજબૂત કરી છે, જ્યારે AAPને મોટો ફટકો લાગ્યો છે.
કયા ઝોનમાં કયો પક્ષ જીત્યો
- કેશવપુરમ ઝોન- BJP
- સિટી એસપી ઝોન- AAP
- કરોલ બાગ ઝોન- AAP
- રોહિણી ઝોન- AAP
- નજફગઢ ઝોન- BJP
- શાહદરા ઝોન (દક્ષિણ)- BJP
- પશ્ચિમ ઝોન- AAP
- શાહદરા ઝોન (ઉત્તર)- BJP
- દક્ષિણ ઝોન- AAP
- સિવિલ લાઇન ઝોન- BJP
- મધ્ય ઝોન- BJP
- નરેલા ઝોન- BJP
Delhi MCD Ward Committee Elections | BJP wins the Delhi MCD Ward Committee elections. BJP wins 7 and AAP wins 5 of the total 12 ward committees.
— ANI (@ANI) September 4, 2024
કરોલ બાગ ઝોનના AAP કાઉન્સિલર રાકેશ જોશી બિનહરીફ પ્રમુખ તરીકે ચૂંટાયા હતા જ્યારે જ્યોતિ ગૌતમ અને અંકુશ નારંગ અનુક્રમે ઉપપ્રમુખ અને સ્થાયી સમિતિના સભ્યો તરીકે ચૂંટાયા હતા. ભાજપે અહીં કોઈ ઉમેદવાર ઉભા રાખ્યા નથી.
દિલ્હીના રાજકારણમાં મોટો ફેરફાર થવાનો સંકેત
દિલ્હી મ્યુનિસિપલ કોર્પોરેશન (MCD) ની અંદર ભારતીય જનતા પાર્ટી (BJP) દ્વારા બતાવાયેલી આ સિદ્ધિ દિલ્હીના રાજકારણમાં એક મહત્વપૂર્ણ ફેરફાર લાવી શકે છે. MCD ની સ્થાયી સમિતિ, જે નીતિઓને મંજૂર કરવા અને શહેરની કામગીરીના દેખરેખ માટે જવાબદાર છે, તેમાં હવે ભાજપનો દબદબો હશે. આ બદલાવ આમ આદમી પાર્ટી (AAP) માટે મુશ્કેલીઓ ઊભી કરી શકે છે, કારણ કે પાર્ટીએ લાંબા સમય પછી MCD પર કાબૂ મેળવીને મેયરની નિમણૂક કરી હતી.
આ પણ વાંચો: Haryana Assembly Elections : ભાજપ-કોંગ્રેસને પડકાર આપશે JJP-ASP ગઠબંધન, 19 ઉમેદવારોની યાદી કરી જાહેર