VADODARA : ગોવા સ્ટાઇલ ચાલતા દારૂના અડ્ડા પર SMC ના દરોડા

VADODARA : વડોદરા (VADODARA) ના સમા વિસ્તારમાં ખુલ્લેઆમ ચાલતા દારૂના અડ્ડા પર સ્ટેટ મોનીટરીંગ સેલ (STATE MONITORING CELL) દ્વારા દરોડા પાડવામાં આવ્યા છે. આ દરોડામાં દારૂનો જથ્થો પુરો પાડનાર બુટલેગર લાલાને પણ દબોચી લેવામાં આવ્યો છે. સ્ટેટ મોનીટરીંગ સેલ દ્વારા કરવામાં આવેલી કાર્યવાહીને પગલે સ્થાનિક પોલીસ ઉંઘતી ઝડપાઇ છે. તો બીજી તરફ ગેરકાયદેસર દારૂના વેપલામાં સામેલ લોકોમાં ભારે ફફડાટની ફેલાયો છે.

ગોવાની જેમ ખુલ્લેઆમ દારૂની પાર્ટી

રાજ્યમાં કહેવા માટે તો દારૂબંધી છે. પરંતુ તેની અમલવારી કેવી રીતે કરવામાં આવે છે, તે સૌ કોઇ જાણે છે. વડોદરામાં સમયાંતરે દારૂ જુગારની પ્રવૃત્તિઓ પર સ્ટેટ મોનીટરીંગ સેલની ટીમો ત્રાટકતી હોય છે. ગતરોજ વધુ એક વખત સ્ટેટ મોનીટરીંગ સેલની ટીમ દ્વારા દરોડા પાડવામાં આવ્યા હતા. સમગ્ર મામલે પ્રાપ્ત વિગતો અનુસાર, શહેરના સમા વિસ્તારમાં આવેલી નવીનગરીમાં વિદેશી દારૂના અડ્ડા પર સ્ટેટ મોનીટરીંગ સેલની ટીમો ત્રાટકી હતી. ટીમના દરોડા સમયે ગોવાની જેમ ખુલ્લેઆમ દારૂની પાર્ટી થતી હોવાનું મળી આવ્યું હતું. ઘટનાસ્થળના દ્રશ્યો જોઇને સ્ટેટ મોનીટરીંગ સેલના કર્મીઓ પણ ચોકી ઉઠ્યા હતા.

કુખ્યાત બુટલેગર જીતુ મારવાડી ઝબ્બે

દરોડાને પગલે સ્થળ પર નાસભાગના દ્રશ્યો સર્જાયા હતા. આ કાર્યવાહીમાં સ્ટેટ મોનીટરીંગ સેલની ટીમે ગોવા સ્ટાઇલ પાર્ટીમાં દારૂ પુરો પાડનાર કુખ્યાત બુટલેગર જીતુ મારવાડી ઉર્ફે લાલો સહિત 10 ગ્રાહકોને દબોચી લીધા છે. આ કાર્યવાહીમાં રૂ. 3.60 લાખના દારૂ સહિત રૂ. 5.19 લાખનો મુદ્દામાલ કબ્જે કરવામાં આવ્યો છે. સ્ટેટ મોનીટરીંગ સેલની કાર્યવાહીને પગલે સ્થાનિક પોલીસ વધુ એક વખત ઉંઘતી ઝડપાઇ છે.

આ પણ વાંચો -- Rajkot Gamezone : સાગઠીયાએ …હું આપઘાત કરી લઇશ…નું રટણ શરુ કર્યું