RBI બાદ હવે અમદાવાદ એરપોર્ટને ઉડાવી દેવાની ધમકીભર્યો ઇ-મેઇલ મળ્યો, પોલીસ દોડતી થઈ

અમદાવાદ એરપોર્ટને બોમ્બથી ઉડાવી દેવાની ધમકીભર્યો ઇ-મેઇલ પોલીસને મળતા પોલીસ વિભાગ દોડતું થયું હતું. આ ધમકીભર્યા ઇ-મેઇલ બાદ પોલીસ અને બોમ્બ ડિસ્પોઝલ સ્કવોડની ટીમે સર્ચ ઓપરેશન હાથ ધર્યું હતું. જો કે પ્રાથમિક તપાસમાં એરપોર્ટ પર બોમ્બ હોવાની વાત માત્ર એક અફવા હોવાનું સામે આવ્યું છે. આ મામલે પોલીસે વધુ તપાસ હાથ ધરી છે.

બુધવારે અમદાવાદ એરપોર્ટને ઉડાવી દેવીની ધમકી આપતો એક ઇ-મેઇલ શહેર પોલીસને મળ્યો હતો. આ ઇ-મેઇલ આવ્યા બાદ પોલીસે ત્વરિત કાર્યવાહી હાથ ધરીને બોમ્બ ડિસ્પોઝલ સ્કવોડની ટીમ સાથે સર્ચ ઓપરેશન હાથ ધર્યું હતું. જો કે , પ્રાથમિક તપાસમાં એરપોર્ટ પર કોઈ શંકાસ્પદ વસ્તુ મળી આવી નથી. આ મામલે હવે એરપોર્ટ પોલીસે અફવાને લઈને ફરિયાદ નોંધી છે.

અગાઉ RBI ને ઉડાવી દેવાની ધમકી મળી હતી

આ ઇ-મેઇલ કોના દ્વારા કરવામાં આવ્યો? કયા હેતુંથી આ ઇ-મેઇલ કરવામાં આવ્યો? આ તમામ સવાલોના જવાબ શોધવા માટે પોલીસે તપાસ હાથ ધરી છે. જો કે, અત્યાર સુધી આ મામલે કોઈની ધરપકડ કરવામાં આવી નથી. જણાવી દઈએ કે, આ પહેલા આરબીઆઈને બોમ્બથી ઉડાવી દેવાની ધમકી મળી હતી. જે મામલે વડોદરામાંથી 3 યુવકોની અટકાયત કરવામાં આવી હતી. મુંબઇ ક્રાઇમ બ્રાન્ચ અને મહારાષ્ટ્ર ATS દ્વારા સંયુક્ત ઓપરેશન હાથ ધરી આ કાર્યવાહી કરવામાં આવી હતી.

આ પણ વાંચો - રાજ્યભરમાં ઠંડીનો ચમકારો, અમદાવાદ, રાજકોટ, સુરતમાં વહેલી સવારે ધુમ્મસની ચાદર છવાઈ