કોણ બનશે દિલ્હીના મેયર? AAP બાદ BJPએ પણ પોતાના ઉમેદવાર ઉતાર્યા

દિલ્હીમાં MCD ચૂંટણી બાદ મેયરની ચૂંટણીને લઈને ચર્ચા તેજ થઈ છે. ભારતીય જનતા પાર્ટીએ આમ આદમી પાર્ટીની યોજનાના મનસૂબા પર પાણી ફેરવી દીધું છે. મેયરની ચૂંટણીમાં એકતરફી જીતની આશા રાખી બેસેલી આમ આદમી પાર્ટી માટે રસ્તો સરળ નહીં રહે. ભાજપે રેખા ગુપ્તાને દિલ્હીના મેયર પદના ઉમેદવાર તરીકે નિયુક્ત કર્યા છે.

કમલજીત સેહરાવત સ્થાયી સમિતિ માટે ભાજપના ઉમેદવાર હશે. જ્યારે ભાજપે ડેપ્યુટી મેયર માટે કમલ બાગરીને તેના ઉમેદવાર જાહેર કર્યા છે. સોમવારે જ ભાજપમાં જોડાયેલા અપક્ષ કાઉન્સિલર ગજેન્દ્ર દરાલ પણ સ્થાયી સમિતિના ભાજપના ઉમેદવાર હશે.

જણાવી દઈએ કે AAPએ પૂર્વ પટેલ નગરના કોર્પોરેટર શેલી ઓબેરોયને પોતાના ઉમેદવાર બનાવ્યા છે. દિલ્હીના ડે. મેયર પદ માટે મટિયા મહલથી ધારાસભ્ય શોએબ ઈકબાલના પુત્ર અને વોર્ડ નં. 76ના કોર્પોરેટર આલે મોહમ્મદ ઈકબાલને ઉમેદવાર બનાવ્યા છે.

15 વર્ષથી MCDમાં રહેલી ભાજપને આ વખતે દિલ્હી મ્યુનિસિપલ કોર્પોરેશનમાં આમ આદમી પાર્ટી સામે હારનો સામનો કરવો પડ્યો છે. એકીકરણ બાદ પ્રથમ વખત 250 વોર્ડમાં યોજાયેલી ચૂંટણીમાં ભાજપે 104 બેઠકો જીતી છે જ્યારે AAPને 134 બેઠકો મળી છે. જ્યારે કોંગ્રેસને માત્ર 9 જ સીટો મળી છે. હાર બાદ ભાજપે મેયરની ચૂંટણી નહીં લડવાનું કહ્યું હતું, પરંતુ હવે ભાજપે આમ આદમી પાર્ટીની રમત બગાડીને પોતાના ઉમેદવારો ઉભા રાખ્યા છે.

આ પણ વાંચો - કોરોનાની નાકની રસી અંદાજે 1 હજાર રુપિયામાં મળશે, જાણો તમામ માહિતી