રાજસ્થાનનો રાજકીય ડ્રામા તેજ, નવા મુખ્યમંત્રીને લઈને ઘેરાતું સંકટ

રાજસ્થાનમાં સત્તાની ખેંચતાણ વચ્ચે રાજકીય ઘટનાક્રમ ઝડપથી બદલાઈ રહ્યો છે. રાજસ્થાનમાં નેતૃત્વ પરિવર્તન અંગે વાટાઘાટો ચાલી રહ્યાં છે અને કોંગ્રેસ હાઈકમાન્ડે આ મામલાની પતાવટની જવાબદારી મલ્લિકાર્જુન ખડગે અને અજય માકનને સોંપી છે. રાજસ્થાન કોંગ્રેસ એક સાંધો ત્યાં 13 તુટે તેવી સ્થિતિ સર્જાય છે. રાજસ્થાનમાં કોંગ્રેસના 90થી વધારે ધારાસભ્યોએ સી.પી.જોષીને રાજીનામું આપ્યું છે. મુખ્યમંત્રી પદ માટે ગહેલોત જુથ અને પાયલોટ જુથ વચ્ચે ખેંચતાણ ચાલી રહી છે ત્યારે કોંગ્રેસ હાઈકમાન્ડે મલ્લિકાર્જુન ખડગે અને અજય માકનને આ મામલે આજ રાત સુધીમાં ચિત્ર સ્પષ્ટ કરી દેવા સુચના આપવામાં આવતા ચોક્કસથી રાજસ્થાનમાં આજની રાત હાઈવોલ્ટેજ ડ્રામાવાળી નિર્ણાયક રાત સાબિત થશે.

રાજસ્થાનમાં મોડી રાત સુધી ચાલી રહેલા રાજકિય ઘટનાક્રમ વચ્ચે કોંગ્રેસના નેતા અજય માકને જણાવ્યું કે, અમે અત્યારે દિલ્હી નથી જઈ રહ્યાં. અમને કોંગ્રેસના વચગાળાના અધ્યક્ષ સોનિયા ગાંધીએ રાજસ્થાનના ધારાસભ્ય સાથે વન-ટૂ-વન વાતચીત કરવાની સૂચના આપી છે. અમે આજે રાત્રે તેમને મળશું.

રાજસ્થાનમાં રાજકીય ઘટનાક્રમ ઝડપથી બદલાઈ રહ્યો છે. સૂત્રો અનુસાર, રાજસ્થાનના આગામી મુખ્યમંત્રી કોણ હશે તે નક્કી કરતા પહેલા જ સીએમ અશોક ગેહલોત કેમ્પના 90થી વધુ ધારાસભ્યોએ તેમના પદ પરથી રાજીનામું આપવાની ધમકી આપી છે. ધારાસભ્યો તેમના રાજીનામા વિધાનસભા અધ્યક્ષને સુપરત કરી શકે છે.

અગાઉ સમાચાર આવી રહ્યા હતા કે તમામ ધારાસભ્યો ટૂંક સમયમાં કોંગ્રેસ પક્ષ દ્વારા બોલાવવામાં આવેલી ધારાસભ્ય દળની બેઠકમાં હાજરી આપી શકે છે. ધારાસભ્ય દળની બેઠક પહેલા ગેહલોત કેમ્પના ધારાસભ્યો શાંતિ ધારીવાલના ઘરે મળ્યા હતા. તેની બેઠકમાં લગભગ 56 ધારાસભ્યો પણ સામેલ થયા છે. આ બેઠક બાદ અશોક ગેહલોત કેમ્પના ધારાસભ્યોએ પોતાના કેમ્પમાંથી જ કોઈને મુખ્યમંત્રી બનાવવાની વાત કરી હતી. આ અંગે ઠરાવ પણ પસાર કરવામાં આવ્યો હતો.

સીએમ અશોક ગેહલોત અને બંને સુપરવાઈઝર હોટલમાંથી સીએમ નિવાસ માટે રવાના થઈ ગયા છે. ધારાસભ્ય દળની બેઠક થોડા સમયમાં શરૂ થઈ શકે છે. પૂર્વ ડેપ્યુટી સીએમ સચિન પાયલટ સહિત 25 ધારાસભ્યો સીએમ આવાસ પર હાજર છે. આ તમામ સચિન પાયલટ ગ્રુપ અને અન્ય કેટલાક ધારાસભ્યો છે.