અમદાવાદ પૂર્વની આરટીઓ કચેરીમાં હેડ કેશિયરે કેવું કૌભાંડ આચર્યું? જાણો

અમદાવાદ પૂર્વ આરટીઓમાં થયેલી કરોડો રૂપિયાની ઉચાપત થતા સરકારી તંત્ર હરકતમાં આવ્યુ છે.આરટીઓના હેડ કેશિયર એમ.એન.પ્રજાપતિએ કાવતરું રચી સરકારી રકમની ઉચાપત કરી છે.આરોપીએ 1 એપ્રિલ 2021 થી શરૂ કરી 5 ફેબ્રુઆરી 2022 સુધીમાં એક કરોડ ૮૩ લાખ થી વધુ ની ઉચાપત કરી હતી.જોકે ઓડિટ સમયે આ હકીકત સામે આવતા ટુકડે ટુકડે 94 લાખથી વધુની રકમ ભરપાઈ કરી છે તેમ છતાં 89 લાખ રૂપિયા ન ભરતા ફરિયાદ નોંધવામાં આવી હતી. મહત્વનું છે કે ફરિયાદ થાય તે પહેલા જ આરોપી ફરાર થઇ ગયો છે.જેથી પોલીસે તેની ધરપકડ માટે કાર્યવાહી હાથ ધરી છે.

આરોપી હેડ કેશિયર એમ.એન પ્રજાપતિની મોડસ ઓપરેન્ડી પર નજર કરીએ, તો આરોપી એક દિવસમાં આરટીઓની કુલ ૩૫ થી ૪૦ જેટલી ટેક્સની રસીદ બનાવતા હતા પરંતુ સરકારી ચોપડે માત્ર ૨૦ રસીદ બતાવી અન્ય રૂપિયા પોતાના ખિસ્સામાં ભરતા હોવાનું બહાર આવ્યું છે.ફરિયાદીએ તપાસ કરતા ઓડિટ સમયમાં આવા ૨૮ જેટલા રિપોર્ટ સામે આવ્યા છે. જેમાં આરટીઓ ટેક્ષની ઓછી આવક સરકારી ચોપડે બતાવી ઉચાપત કરવામાં આવી હતી, જેથી પોલીસે હેડ કેશિયર વિરુદ્ધ ગુનો નોંધી સરકારી નાણાંની ઉચાપત કરનાર આરોપીની શોધખોળ હાથ ધરી છે.