યુક્રેનના રાષ્ટ્રપતિએ રશિયાને વાતચીતની કરી અપીલ, સાથે ચેતવણી પણ આપી

રશિયાએ યુક્રેનમાં પહેલા જ દિવસે લડાઈમાં જબરદસ્ત તબાહી મચાવી છે. રશિયન સૈનિકોએ ગુરુવારે ચેર્નોબિલ પરમાણુ પ્લાન્ટ કબજે કર્યો. યુક્રેનના રાષ્ટ્રપતિ વોલોડિમિર ઝેલેન્સકીના સલાહકાર માયહેલો પોડોયકે એક નિવેદનમાં આની પુષ્ટિ કરી છે.

આપને જણાવી દઇએ કે, યુક્રેનના રાષ્ટ્રપતિ વોલોડિમિર ઝેલેન્સકીએ હમણા જ યુક્રેનિયન નાગરિકોને સંબોધિત કર્યા છે. ફેસબુક પર જાહેર કરાયેલા એક વિડીયોમાં તેમણે કહ્યું કે, વહેલા કે મોડા રશિયાએ યુક્રેન સાથે આ યુદ્ધને કેવી રીતે સમાપ્ત કરવું તે અંગે વાત કરવી પડશે. આ પહેલા ઝેલેન્સકી વતી ફ્રાંસના રાષ્ટ્રપતિ મેક્રોને પણ પુતિન સાથે વાત કરી હતી. રાષ્ટ્રપતિએ કહ્યું કે, રશિયાએ વહેલા કે મોડા અમારી સાથે વાત કરવી પડશે. લડાઈને કેવી રીતે સમાપ્ત કરવી અને આ આક્રમણને કેવી રીતે રોકવું તે વિશે વાત કરવી જ પડશે. આ વાતચીત જેટલી વહેલી શરૂ થશે, રશિયાને નુકસાન એટલું ઓછું થશે.