રાષ્ટ્રપતિની ચૂંટણી માટે ઉદ્વવ ઠાકરેનો મહત્વનો નિર્ણય, જાણો કોને મત આપશે શિવસેના

શિવસેના પ્રમુખ ઉદ્ધવ ઠાકરેએ રાષ્ટ્રપતિની ચૂંટણીમાં NDA ઉમેદવાર દ્રૌપદી મુર્મૂને સમર્થન આપવાનો નિર્ણય કર્યો છે. 

સૂત્રોના જણાવ્યા અનુસાર, શિવસેનાના કેન્દ્રીય કાર્યાલય તરફથી આ અંગેની સત્તાવાર માહિતી ટૂંક સમયમાં જાહેર કરવામાં આવશે. સૂત્રોએ આ દાવો એવા સમયે કર્યો છે જ્યારે ભારતીય જનતા પાર્ટી અને શિવસેના વચ્ચે બધુ બરાબર નથી. ભૂતકાળમાં રાજકીય ઉથલપાથલના કારણે ભાજપ અને શિવસેના વચ્ચેનું અંતર વધી ગયું છે.

રાષ્ટ્રપતિની ચૂંટણીમાં દ્રૌપદી મુર્મૂને સમર્થન આપવાના ઉદ્ધવના નિર્ણયને કોંગ્રેસ અને એનસીપી માટે આંચકા તરીકે જોવામાં આવી રહી છે. વિપક્ષે પૂર્વ IAS અધિકારી અને પૂર્વ નાણામંત્રી યશવંત સિન્હાને મેદાનમાં ઉતાર્યા છે. ભૂતકાળમાં, શિવસેનાના કેટલાક સાંસદોએ પણ કહ્યું હતું કે પાર્ટીએ રાષ્ટ્રીય લોકતાંત્રિક ગઠબંધનના ઉમેદવાર દ્રૌપદી મુર્મૂને સમર્થન આપવું જોઈએ.

ગયા અઠવાડિયે, પાર્ટીના સાંસદો રાહુલ શેવાલે અને રાજેન્દ્ર ગાવિતે ઠાકરેને પત્ર લખીને મુર્મૂને સમર્થન આપવા વિનંતી કરી હતી. નોંધનીય છે કે શિવસેના, એનડીએના સહયોગી હોવાને કારણે, ભૂતકાળમાં કોંગ્રેસના નેતાઓ પ્રતિભા પાટીલ અને પ્રણવ મુખર્જીના રાષ્ટ્રપતિ પદના ઉમેદવારોને સમર્થન આપી ચુકી છે.

ઉલ્લેખનીય છે કે  ગયા મહિને, શિવસેનાના 55માંથી 40 ધારાસભ્યોએ પાર્ટી નેતૃત્વ સામે બળવો કર્યો હતો, જેના કારણે 29 જૂને ઉદ્ધવ ઠાકરેની આગેવાની હેઠળની મહા વિકાસ અઘાડી સરકારનું પતન થયું હતું. બીજી તરફ રાષ્ટ્રપતિની ચૂંટણીને લઈને એનડીએ દ્વારા બોલાવવામાં આવેલી બેઠકમાં હાજરી આપવા માટે એકનાથ શિંદે જૂથના દીપક કેસરકર દિલ્હી જશે. મહારાષ્ટ્રના ભાજપના ધારાસભ્ય અને મુંબઈ ભાજપના પૂર્વ અધ્યક્ષ આશિષ શેલાર પણ આ બેઠકમાં હાજરી આપશે.