રાજ્યસભામાં ભાજપના સાંસદોની સંખ્યા 100ને પાર, 1990 પછી પહેલી વખત આવું બન્યું

રાજ્યસભામાં પહેલીવાર ભાજપે સભ્યપદમાં 100નો આંકડો પાર કર્યો
છે. 1988 પછી આ સિદ્ધિ મેળવનારી ભાજપ પ્રથમ પાર્ટી બની છે. ગુરુવારે યોજાયેલી
સંસદના ઉપલા ગૃહની ચૂંટણીના તાજેતરના રાઉન્ડ પછી ભાજપના રાજ્યસભા
સાંસદો હવે 101 છે. ગુરુવારે યોજાયેલી ચૂંટણીમાં આસામ, ત્રિપુરા અને
નાગાલેન્ડમાં એક-એક સીટ જીતીને બીજેપીએ તેના ઈતિહાસમાં પ્રથમ વખત રાજ્યસભામાં 100 સભ્યોનો માઈલસ્ટોન
હાંસલ કર્યો હતો. છ રાજ્યોમાં રાજ્યસભાની 13 બેઠકો માટે તાજેતરમાં યોજાયેલી દ્વિવાર્ષિક ચૂંટણીમાં ભાજપે પંજાબમાંથી એક
બેઠક ગુમાવી હતી, પરંતુ ત્રણ પૂર્વોત્તર રાજ્યો અને હિમાચલ પ્રદેશમાંથી એક-એક બેઠક
મેળવી હતી.

રાજ્યસભામાં ભાજપે 100નો આંકડો વટાવતાં
વિપક્ષો આ વર્ષે ઓગસ્ટમાં યોજાનારી ઉપરાષ્ટ્રપતિની ચૂંટણીની રેસમાંથી બહાર ફેંકાઈ
ગયા છે. આસામમાં રાજ્યસભાની બે અને ત્રિપુરાની એક બેઠક માટે ગુરુવારે મતદાન થયું
હતું. ભાજપના ઉમેદવાર અને તેમની મહિલા પાંખના પ્રદેશ પ્રમુખ એસ ફાંગનોન કોન્યાક
નાગાલેન્ડની એકમાત્ર રાજ્યસભા બેઠક પર બિનહરીફ ચૂંટાઈ આવ્યા હતા, જેના કારણે તેઓ
સંસદના ઉપલા ગૃહમાં બેઠક મેળવનારી રાજ્યની પ્રથમ મહિલા બની હતી.

પંજાબમાં આમ આદમી પાર્ટીએ તમામ પાંચ
બેઠકો જીતી લીધી છે. જ્યારે રાજ્યસભાની વેબસાઈટે હજુ સુધી નવી યાદી જાહેર કરી નથી.
જો નવી ચૂંટણીમાં તેને મળેલી ત્રણ બેઠકો હાલની 97 બેઠકોમાં ઉમેરવામાં આવે તો ભાજપનો
આંકડો 100 સુધી પહોંચી જશે. 2014ની ચૂંટણીમાં વડાપ્રધાન નરેન્દ્ર મોદીએ લોકસભામાં બહુમતી મેળવી
ત્યારથી 245 સભ્યોની રાજ્યસભામાં બહુમતીથી ઘણી ઓછી હોવા છતાં, ભાજપના સભ્યોની
સંખ્યા સતત વધી રહી છે. 2014માં રાજ્યસભામાં ભાજપની સંખ્યા 55 હતી અને ત્યારથી સતત વધી રહી છે કારણ
કે પાર્ટીએ અનેક રાજ્યોમાં સત્તા મેળવી છે.

1990માં છેલ્લી વખત કોઈ પક્ષની ઉપલા ગૃહમાં 100 કે તેથી વધુ બેઠકો
હતી, જ્યારે 1990ની દ્વિવાર્ષિક ચૂંટણીમાં કોંગ્રેસના સભ્યોની સંખ્યા ઘટીને 99 થઈ ગઈ હતી. તત્કાલિન
સત્તાધારી કોંગ્રેસ પાસે અગાઉ 108 સભ્યો હતા. રાજ્યોમાં સત્તા ગુમાવ્યા પછી અને ગઠબંધન યુગની શરૂઆત
પછી કોંગ્રેસનું પતન શરૂ થયું. બીજી તરફ ભગવા પક્ષની પકડ નબળી પડી શકે છે કારણ કે
લગભગ 52 વધુ બેઠકો માટે ટૂંક સમયમાં મતદાન યોજાશે અને તેને આંધ્રપ્રદેશ, છત્તીસગઢ, મહારાષ્ટ્ર, રાજસ્થાન, ઝારખંડ જેવા
રાજ્યોમાં ફટકો પડવાની ધારણા છે. ભાજપને ઉત્તર પ્રદેશમાંથી થોડો ફાયદો થતો જણાય છે
જ્યાં તે 11માંથી ઓછામાં ઓછી આઠ ખાલી જગ્યાઓ જીતી શકે છે. ઉત્તર પ્રદેશના 11 નિવૃત્ત રાજ્યસભા
સભ્યોમાંથી પાંચ ભાજપના છે.