તિસ્તા સેતલવાડ અને શ્રીકુમારને ન મળી રાહત, કોર્ટે જામીન આપવાનો કર્યો ઇનકાર

ગુજરાતની
એક અદાલતે સામાજિક કાર્યકર્તા તિસ્તા સેતલવાડ અને ભૂતપૂર્વ ડીજીપી આરબી
શ્રીકુમારને 2002ના રમખાણોના કેસો સંબંધિત પુરાવાઓ
બનાવવા બદલ જામીન આપવાનો ઇનકાર કર્યો છે. સેતલવાડ અને શ્રીકુમારની ગુજરાત પોલીસની ક્રાઈમ
બ્રાન્ચે લગભગ એક મહિના પહેલા ધરપકડ કરી હતી. ત્યારથી બંને જ્યુડિશિયલ કસ્ટડીમાં
છે.

કોર્ટે
અગાઉ શુક્રવારે આદેશ જાહેર કરવાનો હતો પરંતુ તેને શનિવાર સુધી મુલતવી રાખ્યો હતો.
કોર્ટે આ અઠવાડિયામાં ત્રીજી વખત આવું કર્યું છે. બંને આરોપીઓએ કેસની તપાસ માટે
રચાયેલી સ્પેશિયલ ઇન્વેસ્ટિગેશન ટીમ (SIT) દ્વારા લગાવવામાં આવેલા આરોપોને નકારી કાઢ્યા છે. સેતલવાડ, શ્રીકુમાર અને પૂર્વ ભારતીય પોલીસ સેવા
(આઈપીએસ) અધિકારી સંજીવ ભટ્ટની અમદાવાદ ક્રાઈમ બ્રાન્ચે ગયા મહિને ધરપકડ કરી હતી.

ક્રાઈમ
બ્રાન્ચે ભારતીય દંડ સંહિતાની કલમ 468 (છેતરપિંડી કરવાના ઈરાદાથી બનાવટી બનાવવી) અને 194 (ગુનેગાર સાબિત કરવાના ઈરાદાથી ખોટા
પુરાવા આપવા અથવા બનાવટ કરવા) હેઠળ ત્રણેયની ધરપકડ કરી હતી. એસઆઈટીએ કોર્ટને
જણાવ્યું હતું કે સેતલવાડ અને શ્રીકુમાર ગુજરાતના તત્કાલિન મુખ્યમંત્રી નરેન્દ્ર
મોદીની આગેવાની હેઠળની ભારતીય જનતા પાર્ટી (ભાજપ) સરકારને અસ્થિર કરવા માટે
કોંગ્રેસના દિવંગત નેતા અહેમદ પટેલના ઈશારે મોટા ષડયંત્રનો ભાગ હતા.

SITએ આરોપ મૂક્યો હતો કે 2002માં ગોધરાકાંડ પછીના રમખાણો બાદ
સેતલવાડને પટેલના કહેવા પર 30 લાખ
રૂપિયા મળ્યા હતા, જેનો ઉપયોગ આ હેતુ માટે કરવામાં આવ્યો
હતો. શ્રીકુમાર એક અસંતુષ્ટ સરકારી અધિકારી હતા જેમણે સમગ્ર ગુજરાત રાજ્યના
ચૂંટાયેલા પ્રતિનિધિઓ, નોકરશાહી અને પોલીસ પ્રશાસનને બદનામ
કરવા પ્રક્રિયાનો દુરુપયોગ કર્યો હતો.'