સુશાંતસિંહ રાજપૂતને ડ્રગ્સની આદત લગાડવામાં આવી હોવાનો આરોપ

સુશાંત સિંહ રાજપૂત ડ્રગ્સ કેસમાં ચોંકાવનારો ખુલાસો થયો છે. રિયા ચક્રવર્તી હજુ પણ નાર્કોટિક્સ કંટ્રોલ બ્યુરો (NCB)ના રડાર હેઠળ છે. NCBએ ડ્રગ્સ કેસમાં આરોપોની ચાર્જશીટ તૈયાર કરી છે.જેમાં રિયા અને અન્ય 34 આરોપીઓ પર હાઈ સોસાયટી અને બોલિવૂડના લોકોને ડ્રગ્સ સપ્લાય કરવાનો આરોપ છે. સુશાંતને ડ્રગ્સની લત લગાડવાનો પણ આરોપ છે.

NCBનો આરોપ છે કે રિયાએ સુશાંત સિંહ રાજપૂત માટે ડ્રગ્સ ખરીદ્યું હતું અને તેના માટે પૈસા ચૂકવ્યા હતા. આ કેસમાં 35 આરોપીઓ સામે કુલ 38 આરોપ છે. NCBએ તેના ચાર્જ ડ્રાફ્ટમાં દાવો કર્યો છે કે રિયાએ સેમ્યુઅલ મિરાન્ડા, શોવિક ચક્રવર્તી, દિપેશ સાવંત અને અન્યો પાસેથી ઘણી વખત ગાંજો લીધો હતો. ગાંજાની ડિલિવરી લીધા બાદ રિયાએ તેને સુશાંત સિંહ રાજપૂતને આપ્યો હતો.

રિયાએ માર્ચ 2020 થી સપ્ટેમ્બર 2020 દરમિયાન ગાંજાની આ ડિલિવરી માટે ચૂકવણી કરી. ડ્રાફ્ટ અનુસાર, રિયાએ NDPS એક્ટ 1985ની કલમ 8[c] હેઠળ 20[b][ii]A, 27A,28, 29 અને 30 સાથે ગુનો કર્યો છે.

આ કેસમાં તમામ 35 આરોપીઓ સામે આરોપ મુકવામાં આવેલા ડ્રાફ્ટ મુજબ, તે તમામ માર્ચ 2020 થી ડિસેમ્બર 2020 દરમિયાન ગુનાહિત કાવતરામાં સામેલ થયા હતા. આ સમય દરમિયાન, એકબીજા સાથે અથવા જૂથોમાં માદક દ્રવ્યોની ખરીદી, વેચાણ, આંતર-શહેર પરિવહન ઉપરાંત, તેઓએ બોલીવુડ સહિત ઉચ્ચ સમાજના લોકોને પણ તેનું વિતરણ કર્યું. 

રિયાના ભાઈ શોવિક સામે લાગેલા આરોપો દર્શાવે છે કે તે ડ્રગ પેડલર્સ સાથે સતત સંપર્કમાં હતો. તે ગાંજા, ચરસ,હશિશની ડિલિવરી માટે ઓર્ડર આપતો હતો. શોવિકે અબ્દેલ બાસિત, કૈઝાન ઈબ્રાહિમ, કર્મજીત સિંહ આનંદ અને સૂર્યદીપ મલ્હોત્રા સહિત અન્ય લોકો પાસેથી ગાંજાની ડિલિવરી લીધી અને સુશાંતને આપી દીધી. કેટલીકવાર તેણે તે ડિલિવરી માટે ચૂકવણી કરી હતી અને કેટલીકવાર રિયા ચક્રવર્તી દ્વારા માર્ચ 2020 થી સપ્ટેમ્બર 2020 ના સમયગાળા દરમિયાન ડ્રગ પેડલર્સને ચુકવણી કરાઇ હતી.

આ સાથે સુશાંતના ખાસ મિત્ર સિદ્ધાર્થ પિઠાનીની મુશ્કેલીઓ પણ વધી ગઈ છે. NCBનો આરોપ છે કે પિઠાણી ડ્રગ્સ,ગાંજાની ખરીદી માટે આરોપી સેમ્યુઅલ મિરાન્ડા, શોવિક, દિપેશ સાવંત, રિયા અને સુશાંત સાથે સીધા સંપર્કમાં હતો. આ દવાઓ/ગાંજા જાન્યુઆરી 2020 થી ઓગસ્ટ 2020 દરમિયાન સુશાંત અને બાકીના લોકોના વપરાશ માટે ખરીદવામાં આવ્યા હતા. પિઠાણી સુશાંતની કોટક એપનો ઉપયોગ કરતો હતો. સુશાંતના બેંક એકાઉન્ટનો ઉપયોગ કરીને ગાંજા સહિતની અન્ય દવાઓ ખરીદવામાં આવી હતી અને તેને બેંક ટ્રાન્ઝેક્શનમાં પૂજા સામગ્રી તરીકે દર્શાવવામાં આવી હતી. આ રીતે સુશાંત નશાની લત તરફ ધકેલાઈ ગયો. જેને NCBએ ગુનો ગણ્યો છે.

ઉલ્લેખનીય છે કે  સુશાંત સિંહ રાજપૂત 14 જૂન 2020ના રોજ તેના ઘરમાં મૃત હાલતમાં મળી આવ્યો હતો. સુશાંતના આકસ્મિક નિધનથી સમગ્ર દેશને આઘાત લાગ્યો હતો. સુશાંતના પરિવારે અભિનેતાના મૃત્યુ માટે રિયા ચક્રવર્તીને જવાબદાર ઠેરવી હતી. સુશાંત કેસની તપાસ ઘણી તપાસ એજન્સીઓ દ્વારા કરવામાં આવી છે પરંતુ મૃત્યુનું કારણ આજ સુધી બહાર આવ્યું નથી. સુશાંતના ચાહકો હજુ પણ તેના માટે ન્યાયની વિનંતી કરી રહ્યા છે.