બાંગ્લાદેશ સામે મિતાલી રાજનો ગોલ્ડન ડક, નોંધાયો શરમજનક રેકોર્ડ

સ્મૃતિ મંધાના અને શેફાલી વર્માએ ICC મહિલા વર્લ્ડ કપમાં બાંગ્લાદેશ સામેની મેચમાં ભારત માટે ઇનિંગ્સની શરૂઆત કરી હતી. બંનેએ પ્રથમ વિકેટ માટે 74 રનની ભાગીદારી પણ કરી હતી. જ્યાં સુધી આ બંને ક્રિઝ પર હતા ત્યાં સુધી એવું લાગતું હતું કે ભારત આ મેચમાં ખૂબ જ આરામથી ઓછામાં ઓછા 250 રન બનાવશે, પરંતુ પછી મેચની આખી વાર્તા પાંચ બોલમાં ફેરવાઈ ગઈ. 14.5 ઓવર સુધી ભારતનો સ્કોર 74/0 હતો, જ્યારે 16 ઓવરના અંતે તે 74/3 થઇ ગયો હતો, ભારતને આ મેચમાં પહેલો ફટકો 15મી ઓવરના છેલ્લા બોલ પર લાગ્યો હતો. મંધાનાએ નાહિદા અખ્તરના બોલ પર ફરગના હકને કેચ આપી દીધો હતો. વળી ઓપનિંગમાં આવેલી શેફાલી વર્મા 42 રને આઉટ થઇ ગઇ હતી. ત્રીજા નંબરે આવેલી યાસ્તિકા ભાટિયા શાનદાર પ્રદર્શન કરતા અડધી સદી કરી હતી. પરંતુ ચોથા નંબર પર આવેલી ટીમ ઈન્ડિયાની કેપ્ટન મિતાલી રાજ કઇ ખાસ કરી શકી નહી અને શૂન્ય પર જ આઉટ થઇ પેવેલિયન પરત ફરી હતી. જણાવી દઇએ કે, મિતાલી રાજ ચાલુ વર્ષમાં સતત સંઘર્ષ કરતી જોવા મળી રહી છે. આજે બાંગ્લાદેશ સામે ગોલ્ડન ડક બાદ તેના નામે એક શરમજનક રેકોર્ડ નોંધાયો છે.