વડાપ્રધાનશ્રી નરેન્દ્ર મોદી 42 વર્ષથી કરે છે નવરાત્રિ ઉપવાસ, કેવી રીતે રહે છે આટલા એનર્જેટિક

નવરાત્રિ ઉપવાસ અને નરેન્દ્ર મોદીના ઉપવાસને ચાર દાયકા કરતાં પણ વધુ જૂનો સંબંધ છે. નરેન્દ્ર મોદીના નવરાત્રિ પ્રત્યેના આકર્ષણની કહાની પણ  રસપ્રદ છે. વાત છે 1969-70ની, જ્યારે નરેન્દ્ર મોદી મહેસાણા જિલ્લાના તેમના શહેર વડનગરથી અમદાવાદ આવ્યા હતા. એ જ સમયગાળામાં, મોદી રાષ્ટ્રીય સ્વયંસેવક સંઘના તત્કાલીન પ્રાંતીય પ્રચારક લક્ષ્મણરાવ ઇનામદાર ઉર્ફે વકીલ સાહેબના સંપર્કમાં આવ્યા, વકીલ સાહેબને ઉપવાસ કરવાની ખૂબ ટેવ હતી. વકીલ સાહેબની આ આદતથી પી.એમ મોદી પણ ઘણા પ્રભાવિત થયા, ત્યારબાદ પી.એમ મોદીએ પણ નવરાત્રીના  નવ દિવસ ઉપવાસ કરવાનું નક્કી કર્યું. ત્યારથી વર્ષની બે નવરાત્રિના દરમિયાન વડાપ્રધાન મોદી માત્ર હુંફાળું પાણી પી ઉપવાસ કરે  છે, આ 9 દિવસો દરમિયાન તેઓ કંઇ જ ભોજન લેતાં નથી. 

ચાલીસ વર્ષની આ તહેવાર દરમિયાન વડાપ્રધાન મોદીએ તેમના જીવનના ઘણા તબક્કાઓ પણ જોયા. જ્યાં ઉપવાસની શરૂઆત સમયે મોદી સંઘના સામાન્ય પ્રચારક તરીકે રહેતા હતા.  અને આજે તેઓ વિશ્વના સૌથી મોટા લોકશાહી દેશના વડાપ્રધાન છે. પરંતુ છેલ્લાં 4 દાયકા દરમિયાન મોદી વર્ષમાં બે વખત નવરાત્રિ ઉપવાસ કરવાનું ભૂલ્યા નથી હતા. આ દરમિયાન મોદી ગુજરાત ભાજપના મહાસચિવ, રાષ્ટ્રીય સંગઠનના મહાસચિવ અને ગુજરાતના મુખ્યમંત્રી પણ રહી ચૂક્યા છે. જો કે, અહીં એ જાણવું પણ જરૂરી છે કે વડાપ્રધાન મોદીએ આ દરમિયાન ક્યારેય પોતાના કામમાંથી બ્રેક લીધો નથી, પરંતુ વડાપ્રધાન નવરાત્રિ દરમિયાન બેવડા ઉત્સાહ સાથે પોતાનું કામ કરતાં જોવા મળે છે. 

જો કે પીએમ મોદી નવરાત્રિ ઉપવાસ પર વધારે બોલતા નથી, પરંતુ વર્ષ 2012માં તેમણે પહેલીવાર આ અંગે માહિતી આપી હતી, તે સમયે તેઓ ગુજરાતના સીએમ હતા. તેમણે પોતાના બ્લોગમાં જણાવ્યું હતું કે તેઓ છેલ્લા 35 વર્ષથી આ વ્રત કરે છે. તેમના કહેવા પ્રમાણે, તેઓ આ વ્રત આત્માની શુદ્ધિ માટે રાખે છે. તેમના મતે, આ ઉપવાસ તેમને જીવનમાં પ્રેરકબળ અને શક્તિ આપે છે. ઉપવાસ આત્મશુદ્ધિ માટે વ્યાયામ છે, જે દરેક રાતે મા અંબા સાથે વાત કરવાની શક્તિ અને ક્ષમતા પ્રદાન કરે છે.

ભારતના નવા પીએમ માત્ર ગરમ પાણી પીતા હતાઃ વોશિંગ્ટન પોસ્ટ

અમેરિકી અખબાર વોશિંગ્ટન પોસ્ટે લખ્યું હતું કે, ભારતના વડાપ્રધાને પ્રેસિડેન્ટ ઓબામા સાથે ડિનરમાં માત્ર ગરમ પાણી પીધું. મોદી છેલ્લા ઘણાં વર્ષોથી નવરાત્રિ દરમિયાન ઉપવાસ કરે છે.

તે સમયે ભારતીય PMએ વ્હાઇટ હાઉસના ડિનર સમયે પણ નવરાત્રિ ઉપવાસ ભંગ કર્યો નહતો ત્યારે વોલ સ્ટ્રીટ જનરલે લખ્યું કે, "ભારતના વડા પ્રધાન નરેન્દ્ર મોદીએ તત્કાલિન રાષ્ટ્રપતિ ઓબામા સાથે રાત્રિભોજન કર્યું આ દરમિયાન કોઈ મૂંઝવણ ન હતી કારણ કે તેમણે કંઈ ખાધું ન હતું. આવી સ્થિતિમાં આ ઉપવાસ ખૂબ જ અણધાર્યો પડકાર હતો.

બ્રિટિશ અખબાર ધ ગાર્ડિયનએ પણ વડાપ્રધાન નરેન્દ્ર મોદીના નવરાત્રિ ઉપવાસની નોંધ લેતાં લખ્યું હતું કે યુએસ વાઇસ પ્રેસિડેન્ટ બિડેન સાથે લંચ અને પ્રેસિડેન્ટ ઓબામા સાથે ડિનર ખૂબ જ કરકસરભર્યું હશે, કારણ કે ધર્મપ્રેમી વડા પ્રધાન નરેન્દ્ર મોદી નવરાત્રિના ઉપવાસ પર હશે.