અગ્નિપથ યોજનાના વિરોધમાં હવે તેજસ્વી પ્રસાદ પણ મેદાને ઉતર્યા

ભારતીય સેનામાં ભરતી માટેની નવી યોજના અગ્નિપથ યોજનાનો દેશભરમાં ઉગ્ર વિરોધ થઈ રહ્યો છે. દેશના ઘણા વિસ્તારોમાં યુવાઓ રસ્તે ઉતરી આ યોજનાનો વિરોધ કરી રહ્યા છે. આ દરમિયાન ઘણા યુવાનોએ ટ્રેનમાં આગ ચાપી હતી અને તોડફોડ પણ કરી હતી. વળી આ યોજનાનો વિરોધ વિપક્ષ પણ પૂરજોરમાં કરી રહ્યું છે. કોંગ્રેસ બાદ હવે RJD પણ આ યોજનાના વિરોધમાં ઉતરી છે. 

અગ્નિપથ યોજનાનો સમગ્ર દેશમાં વિરોધ થઇ રહ્યો છે. આ વચ્ચે હવે તેજસ્વી યાદવ સહિત રાષ્ટ્રીય જનતા દળના સભ્યોએ બિહાર વિધાનસભાથી પટનામાં રાજભવન સુધી કૂચ કરી અને અગ્નિપથ યોજના પાછી ખેંચવાની માંગ કરી. મહત્વનું છે કે, વિપક્ષના નેતા તેજસ્વી યાદવની આગેવાની હેઠળ, RJD અને CPI ML સહિત તમામ ડાબેરી નેતાઓએ વિધાનસભાથી રાજભવન સુધી પગપાળા કૂચ કરી હતી. આ કૂચમાં, તેજસ્વીની સાથે, પૂર્વ મુખ્યમંત્રી રાબડી દેવી, તેજ પ્રતાપ સહિત લગભગ તમામ ધારાસભ્યો, વિધાન પરિષદ અને RJD અને ડાબેરી પક્ષોના પક્ષના નેતાઓએ હાજરી આપી હતી. બાદમાં, તેજસ્વીની આગેવાની હેઠળ 13 સભ્યોનું પ્રતિનિધિમંડળ રાજ્યપાલને મળ્યું હતું અને તેમનું મેમોરેન્ડમ સુપર્ત કર્યું હતું.

મીડિયા સાથે વાત કરતા તેજસ્વી યાદવે કહ્યું કે, જો કેન્દ્ર સરકાર અગ્નિપથ યોજના પાછી નહીં ખેંચે તો તેઓ દિલ્હીમાં રાષ્ટ્રપતિ ભવન સુધી કૂચ કરશે. આ દરમિયાન તેમણે કહ્યું કે, આખા દેશના યુવાનો આ યોજનાથી નારાજ છે. આ યોજના દ્વારા 75 ટકા યુવાનો બેરોજગાર થવાની અપેક્ષા છે. સેના છોડ્યા પછી યુવાનો શું કરશે, આ સૌથી વધુ ચિંતાનો વિષય છે. બીજી તરફ અગ્નિપથ યોજનાને તૈયાર કરનાર લેફ્ટનન્ટ જનરલ અનિલ પુરીએ કહ્યું છે કે આર્મી, એરફોર્સ અને નેવીમાં અગ્નિવીરોની ભરતી શરૂ થઈ ગઈ છે. આ ભરતી તે જ રીતે કરવામાં આવશે જે રીતે અત્યાર સુધી નિયમિત સૈનિકો માટે કરવામાં આવી હતી. મંગળવારે લેફ્ટનન્ટ જનરલ પુરીએ રાજધાનીમાં સેનાની ત્રણેય પાંખના માનવ સંસાધન પ્રમુખો સાથે પ્રેસ કોન્ફરન્સ કરીને ભરતી પ્રક્રિયા સાથે જોડાયેલી તમામ માહિતી શેર કરી હતી.

દરમિયાન, ભારતીય વાયુસેનાએ તેની વેબસાઇટ પર કેન્દ્ર સરકારની 'અગ્નિપથ' યોજના સાથે સંબંધિત વિગતો શેર કરી છે. એરફોર્સમાંથી તેની પસંદગીની પ્રક્રિયા 24 જૂનથી શરૂ થઈ રહી છે. જેમાં લાયકાતના માપદંડ, વય મર્યાદા, શૈક્ષણિક લાયકાત સહિતની અન્ય માહિતી આપવામાં આવી છે. તે જણાવે છે કે, તમામ ભારતીઓ આ યોજના માટે પાત્ર છે, જો કે તેના માટે અરજી કરવા માટે ઉમેદવારની ઉંમર 17.5 વર્ષથી 21 વર્ષની વચ્ચે હોવી જોઈએ. એ પણ જણાવવામાં આવ્યું છે કે, અગ્નિવીરોને એક વર્ષમાં કેટલી રજા આપવામાં આવશે અને તેમને કેટલું વીમા કવચ મળશે. 

આ પણ વાંચો - 'અગ્નિપથ' યોજનાને લઈને ત્રણેય સેના પ્રમુખ PM મોદી સાથે કરશે ખાસ મુલકાત