નાથન લિયોન અને અશ્વિન વચ્ચે 'નંબર-1ના તાજ માટે આકરી ટક્કર

ભારત અને ઓસ્ટ્રેલિયા વચ્ચે ચાર ટેસ્ટ મેચની શ્રેણીની પ્રથમ મેચ 9 ફેબ્રુઆરીએ રમાશે. બંને ટીમો નાગપુરના વિદર્ભ ક્રિકેટ એસોસિએશન સ્ટેડિયમમાં રમશે. આ શ્રેણી વિશ્વ ટેસ્ટ ચેમ્પિયનશિપમાં ભારતના ભાગ્યનો નિર્ણય કરશે. જો ટીમ ઈન્ડિયા બે-ત્રણ ટેસ્ટ જીતીને સિરીઝ જીતી લેશે તો ફાઈનલમાં પહોંચી જશે. આ દરમિયાન મેદાન પર વિશ્વના બે દિગ્ગજ બોલરો વચ્ચે જંગ પણ જોવા મળશે.

ભારતના અનુભવી સ્પિનર રવિચંદ્રન અશ્વિન  અને ઓસ્ટ્રેલિયાના ખતરનાક સ્પિનર નાથન લિયોન વચ્ચે ટક્કર જામી છે. બંને વચ્ચે ભારત-ઓસ્ટ્રેલિયા સિરીઝમાં સૌથી વધુ વિકેટ લેવાની સ્પર્ધા થશે. આ મામલે પૂર્વ ભારતીય કેપ્ટન અનિલ કુંબલે  ટોચ પર છે. તેણે 20 મેચમાં 111 વિકેટ લીધી હતી. લિયોને 22 મેચમાં 94 અને અશ્વિને 18 મેચમાં 89 વિકેટ ઝડપી છે. આવી સ્થિતિમાં બંને પાસે કુંબલેનો રેકોર્ડ તોડવાની તક હશે. લિયોનને ભૂતપૂર્વ ભારતીય સુકાનીને પાછળ છોડવા માટે 18 વિકેટની જરૂર છે. આ સાથે જ અશ્વિને 23 વિકેટ લેવી પડશે.

અશ્વિન અને લિયોન પાસે ભૂતપૂર્વ ઓફ સ્પિનર હરભજન સિંહને પાછળ છોડવાની પણ તક હશે. હરભજને 18 મેચમાં 95 વિકેટ લીધી હતી. લિયોનને બે અને અશ્વિનને સાત વિકેટની જરૂર છે.

ભારતનો સ્ટાર ઓલરાઉન્ડર રવિન્દ્ર જાડેજા આ સીરીઝમાંથી વાપસી કરી રહ્યો છે. ગયા વર્ષે એશિયા કપ દરમિયાન તે ઈજાગ્રસ્ત થયો હતો. આ કારણે જાડેજા ટી-20 વર્લ્ડ કપમાં પણ રમી શક્યો નહોતો. તે ઓસ્ટ્રેલિયા સામેની શ્રેણીમાંથી શાનદાર વાપસી કરવા ઈચ્છશે. તેણે ઓસ્ટ્રેલિયા સામે અત્યાર સુધી 12 ટેસ્ટમાં 63 વિકેટ ઝડપી છે. તેની પાસે પૂર્વ કેપ્ટન કપિલ દેવને પાછળ છોડવાની તક મળશે. કપિલ દેવે 20 ટેસ્ટમાં 79 વિકેટ લીધી હતી. જાડેજાને તેનાથી આગળ નીકળવા માટે 17 વિકેટ લેવી પડશે.

ખેલાડી   -             મેચ       ઇનિંગ   વિકેટ    ઇનિંગમાં સર્વશ્રેષ્ઠ       મેચમાં સર્વશ્રેષ્ઠ

અનિલ કુંબલે          20        38      111           8/141             13/181

હરભજન સિંહ        18         35      95            8/84                15/217

નાથન લ્યોન           22        41      94            8/50                12/286

રવિચંદ્રન અશ્વિન     18        34      89            7/103               12/198

કપિલ દેવ              20       38      79            8/106               8/109

રવિન્દ્ર જાડેજા         12        22      63            6/63                 9/178

ઝહીર ખાન           19        34       61            5/91                 8/137

ઈશાંત શર્મા           25        46      59            4/41                 7/117

એરાપલ્લી પ્રસન્ના    13       24       57            6/74                 10/174

બિશન સિંહ બેદી    12        23      56             7/98                10/194

આ પણ વાંચોઃ નાગપુર ટેસ્ટ પહેલા ખુશ છે રવીન્દ્ર જાડેજા, દિલ ખોલીને કહી આ વાત