દિલ્હી-NCRમાં મોડી રાત્રે પડ્યો ભારે વરસાદ, ઘણા વિસ્તારોમાં વીજળી ગુલ

કાળઝાળ ગરમી બાદ બુધવારે રાત્રે દિલ્હી-NCRમાં ભારે વરસાદ થયો હતો. આ વરસાદથી વાતાવરણ ખુશનુમા બની ગયું છે. બુધવારે મોડી રાત્રે લગભગ 11 વાગ્યાથી વરસાદ શરૂ થયો હતો. આ પછી લગભગ ચાર કલાક સુધી વરસાદ પડ્યો હતો. સવારે 3 વાગ્યાની આસપાસ વરસાદ ધીમો પડ્યો હતો. 

આ દરમિયાન જોરદાર પવન પણ ફૂંકાયો હતો. આ દરમિયાન અનેક વિસ્તારોમાં વીજળી ગુલ થઈ હોવાના અહેવાલ પણ મળી રહ્યા છે. ANIએ વરસાદના કેટલાક વિડીયો અને તસવીરો પણ પોસ્ટ કરી છે જેમાં સારો વરસાદ જોવા મળે છે. એવું કહેવામાં આવ્યું હતું કે, રાત્રે 11 વાગ્યાની આસપાસ વરસાદ શરૂ થયો હતો, જે બપોરે 3 વાગ્યા સુધી ચાલુ રહ્યો હતો. અવિરત વરસાદ અને તેજ પવનને કારણે દિલ્હી-એનસીઆરના ઘણા વિસ્તારોમાં વીજળી પણ ગુલ થઈ ગઈ હતી. ભારતીય હવામાન વિભાગે કહ્યું હતું કે, 15 જૂનની સાંજથી દિલ્હીનું હવામાન બદલાઈ શકે છે. સાંજથી હળવા વરસાદની આગાહી કરવામાં આવી હતી. 

હવામાન વિભાગે અનુમાન જારી કર્યું હતું કે ઉત્તર દિલ્હી, ઉત્તર-પશ્ચિમ દિલ્હી, પશ્ચિમ દિલ્હી (બવાના, મુંડકા), સોનીપત, ખરખોડા (હરિયાણા) અને એનસીઆરના કેટલાક સ્થળોએ ભારે વરસાદ પડશે. આ સિવાય 30-40 કિમી પ્રતિ કલાકની ઝડપે પવન ફૂંકાશે. એવી પણ માહિતી આપવામાં આવી હતી કે ગરમીમાંથી વધુ રાહત મળશે, આગામી ચાર દિવસ દરમિયાન દિલ્હીના અલગ-અલગ ભાગોમાં મધ્યમથી હળવો વરસાદ થવાની સંભાવના છે. હવામાન વિભાગે આ માટે યલો એલર્ટ પણ જાહેર કર્યું છે. હવામાનની આ ગતિવિધિઓને કારણે આગામી પાંચ દિવસમાં મહત્તમ તાપમાનમાં સાત ડિગ્રી સુધીનો ઘટાડો થવાની સંભાવના છે.

આ પણ વાંચો - રાજ્યમાં જલ્દી જ લોકોને મળશે ગરમીથી રાહત, જાણો ક્યારે થશે મેઘમહેર