જેતપુર તાલુકા પંચાયતમાં રેઢા રાજ, ૧૦:૩૦ના સમય છતાં ૧૨ વાગ્યા સુધી કર્મચારીઓ ડોકાતા નથી

જેતપુર તાલુકા પંચાયતમાં અત્યારે રેઢા રાજ હોય તેવો ઘાટ સર્જાયો છે. તેનું કારણ એ છે કે જેતપુર તાલુકા પંચાયતમાં કર્મચારીઓનો ઓફિશિયલ ટાઈમ ૧૦:૩૦ છે, આમ છતાં અનેક કર્મચારીઓ ૧૨ વાગવા છતાં કર્મચારીઓ આવતા નથી. જેના કારણે ગ્રામ્ય વિસ્તારમાંથી આવતા અરજદારો હેરાન થઇ રહ્યા છે. આ કર્મચારીઓને કોઈ કહેવાવાળું છે કે નહીં તેવા સવાલો ઉઠી રહ્યા છે. આ અંગે અવાર નવાર રજૂઆતો કર્યા છતાં પણ કર્મચારીઓ બાર સુધી ફરજ પર નથી આવતા.

જેતપુર તાલુકા પંચાયતનું તંત્ર ક્યાં સુધી આવું રહેશે તે એક મોટો સવાલ છે. આ પંચાયતમાં પ્રજાની સેવા માટે કર્મચારીઓને ખુરશી ઉપર બેસાડ્યા છે,  ત્યારે ખુદ કર્મચારીઓ જ આવતા નથી. પ્રજા ખુદ સ્વીકારી રહી છે કે પ્રજાએ ચૂંટીને જેતપુર તાલુકા પંચાયતમાં બેસાડ્યા છે તે પ્રતિનિધિ આ કર્મચારીઓને છાવરી રહ્યા છે. શું આ અધિકારીઓ અને પ્રતિનિધિઓ વચ્ચે કોઇ સાંઠગાંઠ છે કે કેમ? તેવા સવાલોની ચર્ચા થઇ રહી છે. આ અંગે ઉચ્ચ અધિકારીઓ પણ આંખ આડા કાન કરી રહ્યા છે. જવાબદાર તમામ અધિકારીઓ સામે તાલુકા અને જિલ્લા વિકાસ અધિકારી યોગ્ય કાર્યવાહી કરશે કે પછી આ લોકોને છાવરવામાં આવશે તે બાબતે અનેક સવાલો ઉઠવા પામ્યા છે.

તાલુકા પંચાયતની કચેરીમાં સ્ટાફ ન હોવાથી આવનાર લોકોને ભારે મુશ્કેલીનો સામનો કરવો પડી રહ્યો છે. એક તરફ સરકાર વીજળી બચાવવાની વાતો કરે છે, તેની સામે આ કચેરીમાં કોઈ અધીકારી ન હોવા છતાં તમામ રૂમની લાઈટો તેમજ પંખાઓ ચાલુ જોવા મળે છે. આ બાબતે તાલુકા વિકાસ અધિકારીએ એન. ડી. કુંગશિયાએ જણાવ્યું હતું કે, અન્ય 2થી 3 કર્મચારીઓને ચાર્જ આપવામાં આવ્યો હોવાથી નથી આવ્યા. જ્યારે અન્ય બેથી ત્રણ કર્મચારીઓ બહારથી આવતા હોઈ જેને લીધે તેમને મોડું થઈ રહ્યું છે. આવા તમામ અધિકારીઓને કારણ દર્શક નોટિસ આપી હાજર ન હતા તેની તપાસ કરાવીશ.