વ્યાજદરમાં રાહત મળવાના હાલ કોઇ અણસાર નહીં, MPCની બેઠકમાં આપ્યો સંકેત

મોંઘવારી દરમાં નરમાઈ હોવા છતાં, આરબીઆઈ વ્યાજ દરોના મોરચે રાહત આપવા માંગતી નથી. કેન્દ્રીય બેંકના ગવર્નર શક્તિકાંત દાસે બુધવારે જાહેર કરાયેલી મોનેટરી પોલિસી કમિટી (MPC)ની વિગતોમાં આ વાતનો સંકેત આપ્યો હતો. વિગતો અનુસાર, દાસે કહ્યું કે દરમાં વધારો ટૂંક સમયમાં સમાપ્ત થવાનો નથી. તેમણે કહ્યું કે, જો લિક્વિડિટી ઘટાડવાના પ્રયાસના ભાગરૂપે કરવામાં આવી રહેલ વધારો યોગ્ય સમય પહેલા અટકાવવામાં આવે તો તે નુકસાનકારક સાબિત થઈ શકે છે. 

ડિસેમ્બરના પ્રથમ સપ્તાહમાં મળેલી RBIની MPCની બેઠકમાં રેપો રેટમાં 0.35 ટકાનો વધારો કરવામાં આવ્યો હતો.વધારાને યોગ્ય ઠેરવતા દાસે કહ્યું, "હું માનું છું કે નાણાકીય નીતિની કાર્યવાહીમાં આ વિરામ આ સમયે એક મોટી નીતિગત ભૂલ સાબિત થશે." અત્યારે ભવિષ્યની સ્થિતિ અત્યંત અનિશ્ચિત છે. આવી સ્થિતિમાં વ્યાજદરમાં વધારો અટકાવવાથી એવી સ્થિતિ સર્જાઈ શકે છે, જેમાં મોંઘવારીનું દબાણ વધુ વધી શકે છે. જ્યારે આવું થાય છે, ત્યારે અમને વધુ કડક નીતિગત નિર્ણયો લેવાની ફરજ પડી શકે છે.

ડેપ્યુટી ગવર્નર માઈકલ દેબબ્રત પાત્રાએ જણાવ્યું હતું કે આવનારી માહિતી એ દર્શાવતી નથી કે ફુગાવામાં સાધારણ ઘટાડો ટકાઉ છે. તેથી, ફુગાવાના લક્ષ્યાંકને હાંસલ કરવા માટે, MPCએ યોગ્ય પ્રતિસાદ આપવા માટે તૈયાર રહેવું જોઈએ.

MPCના સભ્ય જયંત આર વર્માએ રેપો રેટમાં 0.35% વધારાના વિરોધમાં મતદાન કર્યું હતું. તેમણે કહ્યું હતું કે, હું માનું છું કે 6.25%નો રેપો રેટ આર્થિક વૃદ્ધિ માટે જોખમી છે. ઉદાર વલણ પાછું ખેંચવાથી નરમ વૃદ્ધિના દૃષ્ટિકોણને નુકસાન થઈ શકે છે.

આ પણ વાંચોઃ  ભારત બનશે મોટું નિકાસકાર, ઓપન ઈન્ટરનેટથી ફાયદો : સુંદર પિચાઈ