'આસની' વાવાઝોડાનો વધ્યો ખતરો, આંદામાન સહિત અનેક વિસ્તારોમાં ભારે વરસાદની સંભાવના

ચક્રવાતી તોફાન 'આસની'નો ખતરો હવે વધવા લાગ્યો છે. જીહા, પ્રાપ્ત માહિતી અનુસાર, આંદામાન અને નિકોબાર દ્વીપસમૂહના દરિયાકાંઠે તેના પહોંચવાના અંદાજ સાથે, વહીવટીતંત્ર દ્વીપસમૂહમાં પરિસ્થિતિને પહોંચી વળવા માટે જરૂરી વ્યવસ્થા કરી રહ્યું છે, જેમાં નીંચાણવાળા વિસ્તારોમાંથી લોકોને બહાર કાઢવાનો સમાવેશ થાય છે.

ચક્રવાતી તોફાન 'આસની'ને લઈને હાઈ એલર્ટ જારી કરવામાં આવ્યું છે. તે થોડા જ સમયમાં પ્રવેશ કરી શકે છે. આંદામાન સહિત અનેક વિસ્તારોમાં ભારે વરસાદ અને તેજ પવનનું જોખમ વધી ગયું છે. હવામાન વિભાગ (IMD) અનુસાર, ઉત્તર આંદામાન સમુદ્ર પર સર્જાયેલું ઊંડું દબાણ આજે ચક્રવાતી વાવાઝોડામાં ફેરવાઈ શકે છે, તે આવતીકાલે એટલે કે, બુધવારે મ્યાનમારના થાંડવે તટને પાર કરી શકે છે. અગાઉ સોમવારે, તે ઉત્તર આંદામાન સમુદ્ર પર એક ઊંડા ડિપ્રેશનમાં તીવ્ર બન્યું હતું અને 13 કિમી પ્રતિ કલાકની ઝડપે ઉત્તર તરફ આગળ વધી રહ્યું હતું. હવામાન વિભાગના જણાવ્યા અનુસાર, આગામી કેટલાક કલાકો દરમિયાન તે વધુ તીવ્ર બનીને ચક્રવાતી વાવાઝોડામાં ફેરવાય તેવી શક્યતા છે. હવામાન વિભાગનું કહેવું છે કે, તે આંદામાન ટાપુઓથી લગભગ ઉત્તર તરફ આગળ વધવાનું ચાલુ રાખશે અને 23 માર્ચના પ્રારંભિક કલાકો દરમિયાન થાંડવે (મ્યાનમાર)ની આસપાસ 18 ડિગ્રી ઉત્તર અને 19 ડિગ્રી ઉત્તર અક્ષાંશ વચ્ચે મ્યાનમારના દરિયાકાંઠાને પાર કરશે.