લોકડાયરામાં યુવકે હવામાં કર્યું ફાયરિંગ, ભાજપ પ્રદેશ અધ્યક્ષ પાટીલની ઉપસ્થિતિ પૂર્વે બની ઘટના

લોકડાયરો આપણી સંસ્કૃતિની ગાથા વર્ણવે છે. રાજ્યમાં અવાર-નવાર સામાજીક કે ધાર્મિક પ્રસંગોએ લોકડાયરાનું ઓયાજન થતું રહ્યું છે. ત્યારે હવે એક વિડિયો વાયરલ થયો છે જે આપણી આ સંસ્કૃતિ પર કલંક સમાન બની ગયો છે. 

આ વિડિયો ભરૂચ જિલ્લાના પાનોલીનો હોવાનું કહેવાઇ રહ્યું છે, જ્યાં લોકડાયરો ચાલી રહ્યો હતો, તે દરમિયાન એક યુવક હવામાં ફાયરિંગ કરતો હોય તેવો વિડીયો વાયરલ થઇ રહ્યો છે. જણાવી દઇએ કે, આ ઘટના ભાજપના પ્રદેશ અધ્યક્ષ સી.આર.પાટીલના ઉપસ્થિતિ પહેલા જ બની હતી. આ ડાયરામાં હજારોની જનમેદની ઉમટી હતી. વળી આ વિડિયોમાં ફાયરિંગ કરી રહેલા શખ્સની બાજુમાં એક યુવક હવામાં રુપિયા ઉડાવતો પણ જોવા મળી રહ્યો છે. સૂત્રોની માનીએ તો અહીં ચાલી રહેલા ડાયરાથી આ યુવક એટલો ખુશ દેખાયો કે તેણે ખિસ્સામાંથી બંદૂક કાઢી અને હવામાં  ફાયરિંગ કરવાનું શરૂ કરી દીધું હતું. આ વિડીયો હવે સોશિયલ મીડિયામાં ખૂબ વાયરલ થઇ રહ્યો છે. આ લોકડાયરામાં રાજ્યના ખ્યાતનામ કલાકાર કીર્તિદાન ગઢવી સહિતના કલાકારોએ સંતવાણીના સૂરો લહેરાવ્યા હતા. 

સમગ્ર ઘટના બાદ પોલીસે આ યુવકની તપાસ હાથ ધરી છે. આ યુવક પાસે આ બંદૂક કેવી રીતે આવી તે પણ એક મોટો સવાલ બની રહ્યો છે. વળી આ વિડીયોમાં તમે જોયું જ હશે કે યુવકે ફાયરિંગ કર્યું તે બાદ બંદૂકમાંથી ધૂમાડો નીકળ્યો હતો એટલે આ ગન એરગન હોવાની શક્યતાઓ નહીંવત્ છે.