સરકાર પસ્ત બુટલેગરો મસ્ત? ગુજરાતના ગૃહ વિભાગની ઉંઘ ક્યારે ઉડશે!

ગુજરાતમાં દારૂબંધી છે, તેવું ભલે કહેવામાં આવતું હોય પરંતુ જેટલો દારુ રાજ્યમાં છુપાઈને વેચવામાં કે પીવામાં આવે છે તે જાણીને સૌ કોઇ ચોંકી જશે. ગુજરાતમાં હવે બુટલેગરોનું રાજ ચાલવા લાગ્યું છે, તેઓને હવે પોલીસનો પણ ભય ન રહ્યો હોય તેવો એક બનાવ તાજેતરમાં સામે આવ્યો છે. દાહોદમાં ધાનપુરમાં પાંચીયાશાળમાં વિજિલન્સની ટીમ પર બુટલેગરો દ્વારા હુમલો કરવામાં આવ્યો છે. જાણકારી મુજબ વિજિલન્સની ટીમ દારૂની બાતમી મળ્યા બાદ રેડ પાડવા માટે ગઇ હતી, આ દરમિયાન ટીમ પર બુટલેગરો બેફામ બનતા ફાયરિંગ શરૂ કરી દીધું હતું. જોકે, તેનો પોલીસે વળતો જવાબ આપતા સામે ફાયરિંગ કર્યું હતું. 

રાજ્યનો લગભગ કોઇ ખૂણો બાકી નહીં હોય કે જ્યા દારૂ ન મળતો હોય. પોલીસ ભલે દારૂબંધીને સફળ બનાવવાની વાતો કરતી હોય પરંતુ સચ્ચાઇ શું છે તે સૌ કોઇ જાણે છે. રાજ્યનું માન્ચેસ્તર અમદાવાદ હોય કે રાજ્યનું પાટનગર ગાંધીનગર આ તમામ જિલ્લાઓમાં દારૂબંધી માત્ર નામની જ છે. જનમુખે ચર્ચાતું આવ્યું છે કે, બુટલેગરોનું ઉપર સુધી સેટિંગ હોય છે, એટલે જ તેમને ક્યારે કોઇ તકલીફ નથી પડતી. વળી ઘણીવાર તો બુટલેગરો પાસે ગ્રાહક દારૂ લેવા માટે આવે છે તો તે સામેથી કહે છે કે, કોઇ પોલીસવાળા હેરાન કરે તો મારુ નામ આપી દેવાનું. આ બુટલેગરો અનેક કિમિયા અપનાવી રાજ્યના ખૂણે ખૂણા સુધી દારૂ કેવી રીતે પહોંચાડવો તે માટે અનેકો પ્રકારના કિમિયા અપનાવી બેફામ બન્યા છે. 

બુટલેગરો આટલા બિંદાસ્ત થઇને કેવી રીતે દારુ વેચી શકે છે, ઘણીવાર સામાન્ય માણસ વિચારતો હોય છે. પરંતુ કહેવાય છે ને ચોકીદાર જ ચોર હોય તો શું થાય.. આવું જ કઇંક ગુજરાતમાં થઇ રહ્યું છે. જે રીતે બુટલેગરો પોતાનો ધંધો વિકસાવી રહ્યા છે તે જોતા લાગે છે કે સરકાર આવા લોકો પર એક્શન લેવામાં પસ્ત થઇ છે જ્યારે બુટલોગરો મસ્ત થયા છે. લોકો હવે રાહ જોઇ રહ્યા છે કે દિવસેને દિવસે જે રીતે બુટલેગરો બેફામ બન્યા છે તે જોતા ગુજરાતના ગૃહ વિભાગની ઉંઘ ક્યારે ઉડશે તે એક મોટો સવાલ બન્યો છે.

આ પણ વાંચો - અમદાવાદમાં બુટલેગરો દ્વારા પોલીસ પર હુમલાનો મામલો, પોલીસે આરોપીઓનું સરઘસ કાઢ્યું