બિલાવલ ભુટ્ટોએ લીધા મંત્રી પદના શપથ, બનશે પાકિસ્તાનના આગામી વિદેશ મંત્રી !

પાકિસ્તાનમાં
ભારે ગડમથલ બાદ આખરે ઈમરાન ખાન સરકારને પાડીને શાહબાઝ શરીફે સત્તા હાંસલ કરી લીધી
છે. ત્યારે હવે શાહબાઝ સરકારમાં આજે બિલાવલ ભુટ્ટો ઝરદારીએ પાકિસ્તાનમાં મંત્રી તરીકે શપથ લીધા. બિલાવલ
ભુટ્ટો પાકિસ્તાનના પૂર્વ વડાપ્રધાન બેનઝીર ભુટ્ટો અને પાકિસ્તાનના પૂર્વ
રાષ્ટ્રપતિ આસિફ અલી ઝરદારીના પુત્ર છે. મળતી માહિતી મુજબ બિલાવલે બુધવારે મંત્રી
તરીકે શપથ લીધા. રાષ્ટ્રપતિ આરિફ અલ્વીએ પીપીપી અધ્યક્ષ બિલાવલ ભુટ્ટો ઝરદારીને
પદના શપથ લેવડાવ્યા હતા.

બિલાવલ પાકિસ્તાનના પીએમ
શાહબાઝ શરીફની કેબિનેટનો ભાગ હશે. બિલાવલ પાકિસ્તાનના નવા વિદેશ મંત્રી બને તેવી
પ્રબળ સંભાવના છે. ઈવાન-એ-સદર ખાતે શપથ ગ્રહણ સમારોહ યોજાયો હતો જેમાં વડાપ્રધાન
શાહબાઝ શરીફ પણ હાજર હતા. બિલાવલ પ્રથમ વખત 2018 માં પાકિસ્તાનની નેશનલ
એસેમ્બલીના સભ્ય તરીકે ચૂંટાયા હતા. તેઓ પ્રથમ વખત કેન્દ્રમાં મંત્રી બન્યા છે. જો
કે તેમના વિભાગ વિશે હાલમાં માહિતી આપવામાં આવી નથી. પરંતુ તેમની બહેન બખ્તાવર ભુટ્ટો ઝરદારીએ શપથ લેતા પહેલા ટ્વિટ કરીને
બિલાવલને વિદેશ મંત્રી તરીકે શપથ લેવા બદલ અભિનંદન પાઠવ્યા હતા. બખ્તાવર ભુટ્ટોએ
ટ્વીટ કર્યું છે કે આજે આ એકતા સરકારમાં બિલાવલ ભુટ્ટો ઝરદારી પાકિસ્તાનના વિદેશ
મંત્રી તરીકે શપથ લેશે. અમને તેમના પર ગર્વ છે. તેમણે સંસદમાં તેમની શ્રેષ્ઠતા
સાબિત કરી છે અને હંમેશા તેમના લોકતાંત્રિક મૂલ્યો સાથે ઊભા રહ્યા છે. તેને આગળ
જોવા માટે ઉત્સાહિત.

બિલાવલ ભુટ્ટોએ પોતે પ્રેસ કોન્ફરન્સ દરમિયાન કહ્યું
હતું કે તેઓ મંત્રી તરીકે શપથ લેશે. બહેનના કહેવા પ્રમાણે તેઓ એક રીતે પાકિસ્તાનના
વિદેશ મંત્રી બની ગયા છે. પાકિસ્તાનમાં અત્યાર સુધીમાં 34 મંત્રીઓએ શપથ લીધા છે. પૂર્વ વિદેશ મંત્રી હિના
રબ્બાની ખાર પહેલાથી જ વિદેશ રાજ્ય મંત્રીનું પદ સંભાળી રહી છે. બિલાવલ ભુટ્ટો
સમક્ષ પહેલો પડકાર અમેરિકાથી અલગ થવાનો છે. આ સિવાય તેઓ ભારત સાથેના સંબંધોને કેવી
રીતે આગળ લઈ જાય છે, તે તેમની આવડતની કસોટી હશે. બિલાવલ ભુટ્ટોએ કહ્યું
છે કે આપણે સમજવું જોઈએ કે આ સાદી મિશ્ર સરકાર નથી. પાકિસ્તાનના ઈતિહાસમાં આ
પહેલીવાર છે જ્યારે એકતા સરકાર વિપક્ષી બેંચમાંથી ટ્રેઝરી બેન્ચમાં ગઈ હોય. અમારા
માટે આ એક મોટો પડકાર છે. આપણે બધાએ પોતાની ભૂમિકા ભજવવી જોઈએ અને સાથે મળીને કામ
કરવું જોઈએ.