કુલદીપની ફીરકી સામે બાંગ્લાદેશી ટીમ પાંદડાની જેમ વિખેરાઈ, ભારતે 188 રનથી જીતી પ્રથમ ટેસ્ટ મેચ

ભારત અને બાંગ્લાદેશ (IND vs BAN) વચ્ચે રમાયેલી પ્રથમ ટેસ્ટ મેચમાં ટીમ ઈન્ડિયાએ જોરદાર પ્રદર્શન કર્યું અને બાંગ્લાદેશને 188 રનથી હરાવ્યું છે. આ મેચમાં પ્રથમ બેટિંગ કરતા ભારતીય ટીમે 404 રનનો જંગી સ્કોર બનાવ્યો હતો જેના જવાબમાં બાંગ્લાદેશ 150 રન જ બનાવી શકી અને ઓલ આઉટ થઇ ગઇ હતી. આ પછી ભારતીય ટીમે બીજી ઇનિંગમાં જોરદાર બેટિંગ કરતા 258 રન પર ઇનિંગ ડિકલેર કરી હતી અને બાંગ્લાદેશને 572 રનનો ટાર્ગેટ આપ્યો હતો. જેનો પીછો કરતા ટીમ પાંદડાની જેમ વિખેરાઈ ગઈ અને માત્ર 324 રન બનાવી શકી. ટીમ ઈન્ડિયાની જીતનો હીરો કુલદીપ યાદવ રહ્યો હતો જેણે તેની ફીરકીથી બાંગ્લાદેશના બેટ્સમેનોને હેરાન કરી દીધા હતા. 

ભારત અને બાંગ્લાદેશ વચ્ચે બે મેચની ટેસ્ટ શ્રેણીની પ્રથમ મેચ ચટ્ટોગ્રામમાં રમાઈ હતી. આ મેચના પાંચમા દિવસે ભારતે બાંગ્લાદેશને 188 રનથી હરાવ્યું છે. ભારત તરફથી ચેતેશ્વર પૂજારા અને શુભમન ગીલે શાનદાર સદી ફટકારી હતી. જ્યારે કુલદીપ યાદવે બંને ઇનિંગ્સમાં કુલ 8 વિકેટ ઝડપી હતી. આ જીત બાદ ભારત શ્રેણીમાં 1-0થી આગળ છે. આ સાથે જ ભારતીય ટીમ WTCના પોઈન્ટ ટેબલ પર ત્રીજા નંબર પર પહોંચી ગઈ છે. મહત્વનું છે કે, ભારતે ટોસ જીતીને પ્રથમ બેટિંગ કરવાનો નિર્ણય લીધો હતો. ચેતેશ્વર પૂજારા (90), શ્રેયસ અય્યર (86) અને આર અશ્વિને (58) પ્રથમ ઇનિંગમાં અડધી સદી ફટકારી હતી. ભારતે પ્રથમ ઇનિંગમાં 404 રન બનાવ્યા હતા. બાંગ્લાદેશની પ્રથમ ઇનિંગ 150 રનમાં સમેટાઈ ગઇ હતી. પ્રથમ ઇનિંગમાં કુલદીપ યાદવે 16 ઓવરમાં 40 રન આપીને 5 વિકેટ લીધી હતી. મોહમ્મદ સિરાજે પણ સારી બોલિંગ કરી, 13 ઓવરમાં 3 વિકેટ લઇને 20 રન આપ્યા હતા.

બીજી ઇનિંગમાં ચેતેશ્વર પૂજારા (102) અને શુભમન ગિલ (110)એ સદી ફટકારી હતી. ભારતે તેની બીજી ઇનિંગ 258 રન પર ડિકલેર કરી હતી. બાંગ્લાદેશની બીજી ઇનિંગમાં નજમુલ હુસૈન (67) અને ઝાકિર હસન (100)ની ઓપનિંગ જોડીએ શાનદાર શરૂઆત કરી હતી. બંનેએ પ્રથમ વિકેટ માટે 124 રન જોડ્યા હતા, પરંતુ આ જોડી તૂટતાં જ બાંગ્લાદેશ ટીમ એકવાર ફરીથી વિખેરાઈ ગઇ હતી. પાંચમાં દિવસની રમત શરૂ થઈ ત્યારે ભારત જીતથી 4 વિકેટ દૂર હતું. કુલદીપ યાદવે 2, મોહમ્મદ સિરાજ અને અક્ષર પટેલે 1-1 વિકેટ ઝડપી હતી. ભારતે પ્રથમ ટેસ્ટ 188 રને જીતી હતી.

આ પણ વાંચો - રોમાંચથી ભરેલી મેચમાં 7 રને હાર્યું ભારત, આ ઓસ્ટ્રેલિયન ખેલાડીએ મચાવ્યું ગદર