ગોંડલમાં આખલાએ અડફેટે લેતા દંપતિ થયુ ખંડિત, પતિનું મોત, પત્ની સારવાર હેઠળ

ગોંડલ ઘોઘાવદર રોડ પર બાઈક આડે આખલો આવતા બાઇક પર સવાર દંપતિ પૈકી પતિનું મોત થયું છે. વાછરા ગામે ખાખરાનો ગૃહ ઉદ્યોગ ચલાવતું દંપતી ગોંડલ થી વાછરા જઈ રહ્યું હતું ત્યારે આ અકસ્માત સર્જાયો હતો

ગોંડલ તાલુકાના વાછરા ગામે રહેતા અને ખાખરાનો  ગૃહ ઉદ્યોગ ચલાવી ગુજરાન ચલાવતા પતિ-પત્ની ગુરૂવાર સાંજે ગોંડલથી વાછરા ગામ જઈ રહ્યા હતા. ત્યારે ઘોઘાવદર ચોકમાં બાઈક આડે આખલો ઉતરતા સર્જાયેલા અકસ્માતમાં દંપતી ઘવાતા સારવાર માટે ખાનગી હોસ્પિટલમાં ખસેડાયા હતા જ્યાં હેમરેજના કારણે યુવાનનું મોત નીપજતા પરિવાર શોક મગ્ન બન્યો છે. 

પ્રાપ્ત વિગતો મુજબ વાછરા ગામે રહેતા સંજયભાઈ જયંતીલાલ રાવલ ઉવ 47 અને તેમના પત્ની નેહાબેન ગુરુવારે સાંજે પોતાના બાઈક પર ગોંડલ થી વાછરા ઘરે જઈ રહ્યા હતા ત્યારે ઘોઘાવદર ચોકમાં અચાનક જ આખલો આડે આવતા અકસ્માત સર્જાયો હતો જેમાં દંપત્તિ ગંભીર રીતે ઘવાતા અત્રેની ખાનગી હોસ્પિટલમાં ખસેડવામાં આવ્યા હતા જ્યાં સંજયભાઈનું બ્રેન હેમરેજના કારણે મોત નીપજતા તેમના મૃતદેહને પીએમ માટે સરકારી હોસ્પિટલમાં ખસેડવામાં આવ્યો હતો બનાવના પગલે પરિવાર શોક મગ્ન બન્યો હતો.

સંજયભાઈ બે ભાઈ અને એક બહેનના પરિવારમાં મોટા હતા અને અકસ્માતમાં તેમની અચાનક વિદાયથી દીકરા દીકરીએ પિતાની છત્ર છાયા ગુમાવી દીધી છે. 

આ પણ વાંચોઃ અંજારમાં એક તરફી પાગલ પ્રેમીએ યુવતીનું જીવવું કર્યું હરામ, 14 વખત ફરિયાદ છતાં કોઈ કડક કાર્યવાહી નહી