હિઝબુલ ચીફ સલાહુદ્દીન પાકિસ્તાનમાં ખુલ્લેઆમ ફરતો જોવા મળ્યો

આર્થિક સંકટનો સામનો કરી રહેલું પાકિસ્તાન (Pakistan) પોતાની હરકતોથી હટતું નથી. વૈશ્વિક સંસ્થાઓના તમામ પ્રતિબંધો છતાં આતંકવાદીઓ અહીંની સડકો પર ખુલ્લેઆમ ફરતા જોવા મળે છે. તાજેતરનો મામલો હિઝબુલ મુજાહિદ્દીનના વડા સલાહુદ્દીન (Salahuddin)નો સામે આવ્યો છે. મીડિયા રિપોર્ટ્સ પરથી જાણવા મળ્યું છે કે સલાહુદ્દીન પાકિસ્તાનના રાવલપિંડીમાં જાહેર કાર્યક્રમોમાં જોવા મળ્યો છે. હવે ફાઇનાન્શિયલ એક્શન ટાસ્ક ફોર્સ (FATF)ની કડક ટિપ્પણી સામે આવી છે. FATF એ સ્પષ્ટ કર્યું છે કે પાકિસ્તાનની પ્રતિબદ્ધતા અને આતંકવાદના ધિરાણ સામેની કાર્યવાહી સંસ્થાની નજર હેઠળ છે.

FATFએ ગયા વર્ષે ઓક્ટોબરમાં પાકિસ્તાનને ગ્રે લિસ્ટમાંથી બહાર કાઢ્યું હતું. ત્યારે પાકિસ્તાને FATFની બે એક્શન પ્લાન લાગુ કરવાનો દાવો કર્યો હતો. જેમાં આતંકવાદી ફંડિંગ રોકવા અને એન્ટી ટેરરિસ્ટ ફાઇનાન્સિંગ પર અંકુશ લગાવવાની વાત થઈ હતી. તે દરમિયાન FATF એ પાકિસ્તાનને ગ્રે લિસ્ટમાંથી બહાર કાઢ્યું હતું અને કહ્યું હતું કે પાકિસ્તાને આતંકવાદી ફાઇનાન્સિંગ અને મની લોન્ડરિંગ સાથે વ્યવહાર કરવા માટે સિસ્ટમને મજબૂત કરવા માટે કામ કરવાનું ચાલુ રાખવું પડશે. FATF દ્વારા પાકિસ્તાનને બે એક્શન પ્લાન સાથે કુલ 34 એક્શન આઇટમ્સ આપવામાં આવી છે. આ અંગે FATFની ટીમ પાકિસ્તાનની મુલાકાતે પણ ગઈ હતી.

ફાઇનાન્શિયલ એક્શન ટાસ્ક ફોર્સ (FATF)ના અધ્યક્ષ ટી રાજા કુમારે પેરિસમાં મીડિયા સાથે વાતચીત કરી. આ દરમિયાન મીડિયાએ હિઝબુલ ચીફ સલાહુદ્દીન પાકિસ્તાનમાં આઝાદીથી ફરતા હોવા અંગે સવાલો ઉઠાવ્યા હતા. જેના જવાબમાં ટી રાજાએ કહ્યું કે, પાકિસ્તાન પોતાની તમામ પ્રતિબદ્ધતાઓને પૂર્ણ કરે તે જરૂરી છે. હું મીડિયા રિપોર્ટ્સ પર અનુમાન નહીં લગાવીશ, પરંતુ મારે એટલું કહેવું જોઈએ કે એશિયા પેસિફિક ગ્રુપ પાકિસ્તાન દ્વારા ઉઠાવવામાં આવેલા પગલાં પર નજર રાખી રહ્યું છે.

કુખ્યાત આતંકવાદી અને હિઝબુલ મુજાહિદ્દીનનો ચીફ સલાહુદ્દીન ભૂતકાળમાં આતંકવાદી બશીર અહમદ પીરના અંતિમ સંસ્કારમાં સામેલ થયો હતો. આની ઘણી તસવીરો સામે આવી છે. આ માટે પાકિસ્તાનને આંતરરાષ્ટ્રીય સ્તરે ઘણું સાંભળવું પડી રહ્યું છે.

આ પણ વાંચો---બોબી જિંદાલે નિક્કી હેલીનો બચાવ કર્યો, કહ્યું- વંશીય હુમલા યોગ્ય નથી