ઝારખંડમાં વીજળી સંકટ પર સાક્ષી ધોની પણ પરેશાન, ટ્વીટ કરી ઉઠાવ્યા સવાલ

ઝારખંડમાં વીજળીનો અભાવ માત્ર સામાન્ય લોકોને જ નહીં, પરંતુ હવે ખાસ લોકોને પણ પરેશાન કરી રહ્યો છે. ભારતીય ક્રિકેટ ટીમના પૂર્વ કેપ્ટન મહેન્દ્ર સિંહ ધોનીના પત્ની સાક્ષીએ રાજ્યની નબળી પાવર સિસ્ટમ પર સવાલ ઉઠાવ્યા છે.

ભારતીય પુરૂષ ક્રિકેટ ટીમના પૂર્વ કેપ્ટન એમએસ ધોનીની પત્ની સાક્ષી ધોનીએ ઝારખંડમાં વીજળીની સમસ્યાને લઈને સોરેન સરકારને ઘેરી છે. સાક્ષી ધોનીએ ટ્વીટર પર પાવર કટને લઈને ઝારખંડ સરકાર પર સીધો સવાલ કર્યો છે. વળી અન્ય ટ્વિટર યુઝર્સ પણ આ અંગે પોતાનો પ્રતિભાવ આપી રહ્યા છે. ઝારખંડમાં છેલ્લા ઘણા સમયથી વીજળીની સમસ્યા જોવા મળી રહી છે. આ પહેલા પણ સાક્ષી વીજળીની સમસ્યાને લઈને પોતાનો અવાજ ઉઠાવી ચુકી છે. સોશિયલ મીડિયા પર ટ્વીટ કરતા તેમણે સરકારને પૂછ્યું કે, એક કરદાતા તરીકે હું માત્ર એટલું જ જાણવા માંગુ છું કે ઝારખંડમાં આટલા વર્ષોથી વીજળીનું સંકટ કેમ છે? આપણે સભાનપણે ખાતરી કરીએ છીએ કે આપણે ઊર્જા બચાવીએ છીએ. એમએસ ધોનીની જેમ સાક્ષી પણ સોશિયલ મીડિયા પર ઓછી એક્ટિવ રહે છે. 

આ પહેલા વર્ષ 2019માં પણ સાક્ષીએ ટ્વીટ કરીને પાવર કટ અંગે જાણકારી આપી હતી. સાક્ષીએ લખ્યું, "રાંચીના લોકો દરરોજ પાવર કટનો સામનો કરી રહ્યા છે. દરરોજ, અહીં ચારથી સાત કલાકનો પાવર કાપ છે. આજે 19મી સપ્ટેમ્બર 2019ના રોજ છેલ્લા પાંચ કલાકથી વીજળી નથી. આજનું હવામાન સારું છે અને આજે તહેવાર પણ નથી પરંતુ હજુ પણ પાવર કટ છે. મને આશા છે કે સંબંધિત સત્તાવાળાઓ આ સમસ્યાનો ઉકેલ લાવશે." સાક્ષી ધોની દ્વારા અંતિમ ટ્વીટ એક વર્ષ પહેલા કરવામાં આવી હતી. રાજ્યની જનતા સતત લોડશેડિંગથી પરેશાન છે. રાજ્યના મોટાભાગના વિસ્તારોમાં તાપમાન 40 ડિગ્રી સેલ્સિયસને પાર કરી રહ્યું છે. હીટવેવ પશ્ચિમ સિંઘભૂમ, કોડરમા અને ગિરિડીહ જિલ્લાઓને ઘેરી લે છે. 28 એપ્રિલ સુધી રાંચી, બોકારો, પૂર્વ સિંઘભૂમ, ગઢવા, પલામુ અને ચત્રામાં ગરમીની લહેર આવવાની સંભાવના છે.