મલ્ટીપર્પઝ હેલ્થવર્કર ભરતીમાં મહેસામાં જિલ્લાના 48 ઉમેદવારોનાં સર્ટી શંકાસ્પદ

મલ્ટી પર્પઝ હેલ્થવર્કર પુરુષ (MPHW) વર્ગ-3ની જગ્યાની ભરતી (Recruitment) માટે અરજી કરનાર મહેસાણા જિલ્લાના 48 ઉમેદવારોના પ્રમાણપત્ર શંકાસ્પદ જણાઈ આવ્યા છે.  દરમિયાન શંકાસ્પદ પ્રમાણપત્રોની ખરાઈ તેમજ ઉમેદવારોએ અભ્યાસ કરેલ ખાનગી ITIમાં તપાસ કરવાનો પંચાયત સેવા પસંદગી મંડળના સચિવ દ્વારા જિલ્લા વિકાસ અધિકારીને આદેશ કરાયો છે.

જે ખાનગી સંસ્થાના પ્રમાણપત્ર રજૂ કરવામાં આવ્યા છે તે સંસ્થા પાસે જરૂરી ફેસિલિટી ઉપલબ્ધ નહીં હોવાની વિગત સામે આવતા પ્રમાણપત્ર સામે સવાલ ઉભા થયા છે. ગુજરાત પંચાયત સેવા પસંદગી બોર્ડે ગત તારીખ મેં 2022માં મલ્ટી પર્પઝ હેલ્થ વર્કર પુરુષ વર્ગ-3ની જગ્યાની ભરતી માટે જાહેરાત પ્રસિદ્ધ કરી હતી. 26 જૂન 2022ના રોજ સ્પર્ધાત્મક પરીક્ષા લીધા બાદ તેનું રિવાઇઝ પ્રોવિઝનલ મેરિટ લિસ્ટ 9 સપ્ટેમ્બરના રોજ બહાર પાડ્યું હતું. ત્યાર બાદ પંચાયત મંડળ દ્વારા ઉમેદવારોના પ્રમાણપત્રોની ચકાસણી હાથ ધરાઇ હતી.

જેમાં કેટલાક ઉમેદવારોએ ખાનગી ITIના ડિપ્લોમા ઇન હેલ્થ સેનેટરી ઇન્સ્પેક્ટર, ડિપ્લોમા ઇન સેનેટરી ઇન્સ્પેક્ટરના પ્રમાણપત્રો અને માર્કશીટ રજૂ કરી હતી. આ ભરતી માટે આ પ્રમાણપત્રો માન્ય રાખવા કે કેમ? તે માટે 16 નવેમ્બરના રોજ ઉમેદવારો દ્વારા જે સ્વરનિર્ભર આઈટીઆઈના પ્રમાણપત્રો રજૂ કરાયાં છે તેને કેટલાક ચોક્કસ મુદ્દાઓને આધિન ચકાસણી કરવાનું મંડળ દ્વારા નક્કી કરાયું હતું.

જે અંતર્ગત મહેસાણા જિલ્લાના 48 ઉમેદવારો  ખાનગી ITI સરસ્વતી ઇન્સ્ટિટ્યૂટ પ્રમાણપત્રો રજૂ કર્યા છે અને જે પ્રથમ દ્રષ્ટિએ શંકાસ્પદ જણાય છે.તેવા 48 ઉમેદવારોનું પ્રમાણપત્રો સાથેનું લિસ્ટ પંચાયત સેવા પસંદગી મંડળના સચિવે મહેસાણા જિલ્લા વિકાસ અધિકારીને મોકલી આપવામાં આવ્યા છે તો આ મામલે જિલ્લા વિકાસ અધિકારીને સૂચના આપવામાં આવી છે કે સંસ્થાની તપાસ કરી તેને હેલ્થ સેનેટરી ઇન્સ્પેક્ટરના અભ્યાસની પ્રાથમિક મંજૂરી આપવામાં આવી છે કે નહીં?  સંસ્થા દ્વારા તાલીમ આપતી વખતે સુવિધાઓ પણ અપાઇ છે કે નહીં તેની તપાસ કરી મંડળને રિપોર્ટ આપવા જણાવ્યું હતું.

જેને પગલે ડીડીઓ ડૉ. ઓમ પ્રકાશ દ્વારા 3 સભ્યોની સ્પેશિયલ ટીમ બનાવી ઉમેદવારોના પ્રમાણપત્રોની ખરાઇ, સંસ્થાની તપાસ કરવા તજવીજ હાથ ધરાઇ છે. જેને પગલે ખાનગી સંસ્થાના પ્રમાણપત્રો અને માર્કશીટ રજૂ કરનારા ઉમેદવારોમાં હલચલ મચી ગઇ છે. જિ.પં.ની સ્પેશિયલ ટીમ આ ખાનગી સંસ્થામાં ક્લાસરૂમ, લેબ, ઉમેદવારની બેઠક વ્યવસ્થા, ફર્નિચર અને ફેકલ્ટી સહિતની સુવિધા અંગે તપાસ કરશે.જિલ્લા વિકાસ અધિકારી દ્વારા બનાવાયેલી અધિક જિલ્લા આરોગ્ય અધિકારી, એપેડેમિક મેડિકલ ઓફિસર અને ક્વોલિટી એન્સ્યોરન્સ મેડિકલ ઓફિસર સહિતના 3 સભ્યોની બનેલી જિલ્લા પંચાયતની સ્પેશિયલ ટીમ પંચાયત સેવા પસંદગી મંડળના કહ્યા મુજબ પ્રમાણપત્ર આપનાર ખાનગી સંસ્થાની રૂબરૂ મુલાકાત લઇ તેની પાસે કેટલી જગ્યા ઉપલબ્ધ છે, ક્લાસરૂમ અને લેબ સુવિધા છે કે નહીં, કેટલા ઉમેદવારની બેઠક વ્યવસ્થા છે, ફર્નિચર અને ફેકલ્ટી વિગેરે ઉપલબ્ધ છે કે નહીં? આ તમામ મુદ્દાઓની તપાસ કરી રિપોર્ટ સોંપવામાં આવશે 

આ આદેશને પગલે શોપિંગમાં ચાલતી ખાનગી આઈટીઆઈ સરસ્વતી ટેકનીકલ ઇન્સ્ટિટયૂટ શંકાના દાયરામાં આવી ગઈ છે. ઓનલાઇન ભરતીમાં ઉમેદવારો દ્વારા રજૂ કરવામાં આવેલા પ્રમાણપત્રમાં ખાનગી સંસ્થાઓના સરનામાં જે લખવામાં આવ્યાં છે તે શોપિંગ કોમ્પ્લેક્સ અને નાની દુકાનોમાં હોય એ પ્રકારનાં હોવાથી પંચાયત મંડળને શંકા જતાં પ્રમાણપત્રોની સાથે તે આપનાર ખાનગી સંસ્થાઓની પણ તપાસ કરવાનો આદેશ કરાયો છે તો બીજી તરફ મોટેભાગે એક જ ખાનગી સંસ્થાનાં પ્રમાણપત્રો રજૂ થયાં છે.

મહેસાણા જિલ્લાના જે 48 ઉમેદવારો દ્વારા ઓનલાઇન ભરતી માટે પ્રમાણપત્રો રજૂ કરાયાં છે તે મોટેભાગે એક જ સંસ્થાનાં છે. શહેરના નાગલપુર હાઇવે ગાયત્રી મંદિર પાસે શંકર એસ્ટેટમાં આવેલી સરસ્વતી ટેકનિકલ ઇન્સ્ટિટયૂટ નામની ખાનગી સંસ્થાના પ્રમાણપત્રો હોવાનું બહાર આવ્યું છે તો રૂબરૂ મુલાકાતમાં આઈટીઆઈનું કાર્યાલય કોમ્પલેક્ષ માં અને શિક્ષણ બંધ સ્કૂલના બે રૂમમાં આપવામાં આવતું હોવાનું બહાર આવ્યું છે.

પ્રાથમિક વિગત મુજબ સરસ્વતી  આઈટીઆઈ શોપિંગ કોમ્પ્લેક્સમાં ચાલે છે અને બંધ સ્કૂલના બે રૂમ માં શિક્ષણ આપવાની વાત પણ  પોકળ લાગી છે,,કારણ કે ઇન્સ્ટિટ્યૂટના બંને રૂમમાં સફાઈ વિના બંધ હાલતમાં પડ્યા હોય એવું સ્પષ્ટ દેખાતું હતુ અને તાત્કાલિક સફાઈનું કામ શરૂ કર્યું હતું..જોકે સ્થળ ઉપર આઇટીઆઈમાં એક પણ વિદ્યાર્થીના હોવા છતાં સંચાલક દ્વારા 72 વિદ્યાર્થીઓ અભ્યાસ કરતા હોવાનો દાવો કરાયો છે.  જો આ સર્ટી બોગસ સાબિત થશે તો 48 પરીક્ષા પાસ કરનાર ઉમેદવાર નું શુ? બોગસ સર્ટિને કારણે હાલ તો 48 પરિક્ષાર્થી નું ભવિષ્ય દાવ પર લાગ્યું છે.

આ પણ  વાંચો - વિજાપુર APMCની ચૂંટણીમાં ભાજપમાં આંતરિક વિખવાદ, ભાજપ V/S ભાજપની સ્થિતિ ઉભી થઇ