PM MODI અમેરિકા અને ઇજીપ્તની મુલાકાતે, વાંચો સમગ્ર યાત્રાનું Scheduled

વડા પ્રધાન શ્રી નરેન્દ્ર મોદી મંગળવાર 20 જૂન, 2023થી યુનાઇટેડ સ્ટેટ્સ ઑફ અમેરિકા અને ઇજિપ્તની પાંચ દિવસની સરકારી મુલાકાતે જશે. પીએમ મોદીના વિદેશ પ્રવાસને લઈને વિદેશ મંત્રાલયે પ્રેસ કોન્ફરન્સ યોજી હતી. દરમિયાન વિદેશ સચિવ વિનય મોહન ક્વાત્રાએ મીડિયાને માહિતી આપી હતી કે અમેરિકી રાષ્ટ્રપતિ જોસેફ બિડેન અને ફર્સ્ટ લેડી ડૉ. જીલ બિડેનના આમંત્રણ પર પીએમ મોદી આ મહિનાની 21 થી 23 તારીખ સુધી અમેરિકાની સત્તાવાર સરકારી મુલાકાત લેશે. વિદેશ સચિવે પીએમ મોદીની મુલાકાત વિશે વિગતવાર માહિતી આપી હતી.

વડાપ્રધાનશ્રી મોદીની મુલાકાત ન્યૂયોર્કમાં શરૂ થશે, જ્યાં તેઓ બુધવારે સંયુક્ત રાષ્ટ્રના મુખ્યાલયમાં 'આંતરરાષ્ટ્રીય યોગ દિવસ'ની ઉજવણીનું નેતૃત્વ કરશે, એમ તેમણે જણાવ્યું હતું. જણાવી દઈએ કે, સંયુક્ત રાષ્ટ્ર મહાસભાએ ડિસેમ્બર 2014માં 21 જૂનને આંતરરાષ્ટ્રીય યોગ દિવસ તરીકે જાહેર કરવાનો ઠરાવ પસાર કર્યો હતો.

વિદેશ સચિવે કહ્યું કે આ પછી વડાપ્રધાનશ્રી મોદી વોશિંગ્ટન ડીસી જશે, જ્યાં ગુરુવારે વ્હાઇટ હાઉસમાં તેમનું ઔપચારિક સ્વાગત કરવામાં આવશે અને ઉચ્ચ સ્તરીય વાતચીત માટે રાષ્ટ્રપતિ બિડેનને મળશે. તેમણે એ પણ માહિતી આપી હતી કે યુએસ પ્રમુખ જો બિડેન અને ફર્સ્ટ લેડી ડૉ. જીલ બિડેન ગુરુવારે સાંજે વડાપ્રધાનના સન્માનમાં સ્ટેટ ડિનરનું આયોજન કરશે.

વિદેશ સચિવે કહ્યું, વડાપ્રધાનશ્રી મોદી 22 જૂને યુએસ કોંગ્રેસની સંયુક્ત બેઠકને સંબોધિત કરશે. તમામ ભારતીયોએ ગર્વ અનુભવવો જોઈએ કે પીએમ મોદી યુએસ કોંગ્રેસને સંબોધશે.  માત્ર થોડા જ વિશ્વ નેતાઓને યુએસ કોંગ્રેસને એક કરતા વધુ વખત સંબોધવાની તક મળી છે.

વિદેશ સચિવે એ પણ માહિતી આપી હતી કે શુક્રવારે વડા પ્રધાન માટે યુએસ વાઇસ પ્રેસિડેન્ટ કમલા હેરિસ અને સેક્રેટરી ઑફ સ્ટેટ એન્ટની બ્લિંકન દ્વારા સંયુક્ત લંચનું આયોજન કરવામાં આવશે.

વિદેશ સચિવે કહ્યું, વડાપ્રધાનશ્રી મોદી પસંદગીના સીઈઓ, પ્રોફેશનલ્સ અને અન્ય હિતધારકોને પણ મળવાના છે. તેઓ પ્રવાસી ભારતીય સભ્યોને પણ મળશે. તેમણે કહ્યું કે, આ મુલાકાત બંને દેશો વચ્ચેના સહયોગમાં એક સીમાચિહ્નરૂપ સાબિત થશે. આવી સ્થિતિમાં આ ખૂબ જ મહત્વપૂર્ણ યાત્રા છે.

આ મુલાકાત વેપાર અને રોકાણ માટે નવા રસ્તા ખોલશે. પીએમ મોદીની આ મુલાકાત પછી, બંને દેશોના સંબંધોને એક નવો પરિમાણ મળશે. તેમણે એમ પણ કહ્યું કે આનાથી સંરક્ષણ ક્ષેત્રમાં એક નવી અને મજબૂત સિસ્ટમ વિકસિત થશે. આ મુલાકાત ખાસ કરીને રક્ષા ક્ષેત્રે ખુબ જ અગત્યની સાબિત થશે.

વિદેશ સચિવે એમ પણ કહ્યું હતું કે વડાપ્રધાનશ્રી મોદીની મુલાકાત એવી છે કે જે યુનાઇટેડ સ્ટેટ્સમાં વાસ્તવિક અને વ્યાપક રસ ધરાવે છે. તેમણે જણાવ્યું હતું કે મુખ્ય ઘટકોમાંનું એક મુખ્ય ઘટક દ્વિપક્ષીય સંરક્ષણ સહયોગ હશે. તેમણે કહ્યું કે સંરક્ષણ ઔદ્યોગિક સહકાર રોડમેપ પીએમ મોદીની યુએસ મુલાકાતનું મહત્વપૂર્ણ પરિણામ હશે.

આ સિવાય વિદેશ સચિવે એ પણ માહિતી આપી કે ઇજિપ્તના રાષ્ટ્રપતિ અબ્દેલ ફતાહ અલ-સીસીના આમંત્રણ પર વડાપ્રધાન મોદી આ મહિનાની 24 થી 25 તારીખ સુધી કૈરોમાં ઇજિપ્તની સરકારી મુલાકાત લેશે. તેમણે કહ્યું કે પીએમ મોદીની આ પ્રથમ ઈજિપ્તની મુલાકાત હશે.

વિદેશ સચિવે કહ્યું કે, રાષ્ટ્રપતિ સીસી સાથેની વાતચીત ઉપરાંત, પીએમશ્રી મોદી ઇજિપ્ત સરકારના વરિષ્ઠ મહાનુભાવો, ઇજિપ્તની કેટલીક અગ્રણી હસ્તીઓ તેમજ ઇજિપ્તમાં ભારતીય સમુદાય સાથે વાતચીત કરશે. તેમણે કહ્યું, પીએમશ્રી મોદી બોહરા સમુદાય દ્વારા નવીનીકરણ કરાયેલ 11મી સદીની અલ-હકીમ મસ્જિદની મુલાકાત લેશે. વિદેશ સચિવ ક્વાત્રાએ જણાવ્યું હતું કે વડા પ્રધાન પ્રથમ વિશ્વ યુદ્ધમાં ઇજિપ્ત માટે સર્વોચ્ચ બલિદાન આપનાર ભારતીય સૈનિકોને શ્રદ્ધાંજલિ આપવા માટે હેલિઓપોલિસ યુદ્ધ કબ્રસ્તાનની મુલાકાત લેશે.

વડાપ્રધાનશ્રી મોદીનો પ્રવાસ 21 જૂને સવારે ન્યૂયોર્કમાં સંયુક્ત રાષ્ટ્ર સચિવાલયમાં આંતરરાષ્ટ્રીય યોગ દિવસની ઉજવણી સાથે શરૂ થશે. આ કાર્યક્રમ ભારત માટે ખૂબ જ મહત્વપૂર્ણ છે, કારણ કે તે વિશ્વને ભારતીય પરંપરાઓ વિશે સંદેશ આપશે. તે જ દિવસે વડાપ્રધાન ન્યૂયોર્કમાં કેટલાક વરિષ્ઠ નેતાઓ અને અધિકારીઓને પણ મળશે. બાદમાં વોશિંગ્ટન માટે રવાના થશે. PM મોદી 21 જૂને જ વોશિંગ્ટનમાં 'સ્કેલિંગ ફોર ફ્યુચર' પર આધારિત એક કાર્યક્રમમાં ભાગ લેશે. એટલું જ નહીં, 21મી જૂને જ અમેરિકાના રાષ્ટ્રપતિ અને વડાપ્રધાન મોદી વચ્ચે ખાનગી મુલાકાત થવાની સંભાવના છે.

22 જૂને વ્હાઇટ હાઉસમાં વડાપ્રધાનશ્રી મોદીનું સ્વાગત કરવામાં આવશે. આ પછી બંને નેતાઓ વચ્ચે પ્રતિનિધિમંડળ સ્તરની દ્વિપક્ષીય બેઠક થશે. દ્વિપક્ષીય બેઠક દરમિયાન સંરક્ષણ અને ટેક્નોલોજી અને કેટલાક મુખ્ય કરારો પર ચર્ચા થવાની અપેક્ષા છે. તે જ દિવસે, પીએમ મોદી હાઉસ ઓફ રિપ્રેઝન્ટેટિવના સ્પીકર કેવિન મેકકાર્થી અને સંસદના બહુમતી નેતા ચક શૂમર સહિત કોંગ્રેસના નેતાઓના આમંત્રણ પર યુએસ કોંગ્રેસને સંબોધિત કરશે. જો બિડેન અને ફર્સ્ટ લેડી તે સાંજે મોદીના સન્માનમાં સ્ટેટ ડિનરનું આયોજન કરશે.

વડાપ્રધાનશ્રી મોદી 23 જૂને કેટલીક કંપનીઓના સીઈઓને મળશે. આ પછી વડાપ્રધાનશ્રી મોદી કેનેડી સેન્ટર ખાતે એક કાર્યક્રમમાં અગ્રણી પ્રોફેશનલ લોકોને મળશે. કેનેડી સેન્ટર ખાતે કાર્યક્રમ બાદ વડાપ્રધાન સમુદાયના નેતાઓને મળશે.

વડાપ્રધાનશ્રી મોદી 24-25 જૂને ઈજિપ્તની મુલાકાતે જશે. પીએમની આ પ્રથમ ઇજિપ્તની મુલાકાત હશે. 1997 પછી ભારતીય વડાપ્રધાનશ્રીની  આ પ્રથમ સત્તાવાર દ્વિપક્ષીય મુલાકાત હશે.

આ પણ વાંચો----વડાપ્રધાન NARENDRA MODI નો અમેરીકાનો પ્રવાસ કેમ આટલો મહત્વનો છે? જાણો