PM મોદીએ સાઉદી અરેબિયાના ક્રાઉન પ્રિન્સ સાથે ટેલિફોન પર વાત કરી, આ બાબતો પર થઈ ચર્ચા...

ક્રાઉન પ્રિન્સ સપ્ટેમ્બરમાં ભારતની મુલાકાતે આવ્યા હતા

ભારતના વડા પ્રધાન નરેન્દ્ર મોદીએ મંગળવારે સાઉદી અરેબિયાના ક્રાઉન પ્રિન્સ મોહમ્મદ બિન સલમાન બિન અબ્દુલ અઝીઝ અલ સાઉદ સાથે વાત કરી હતી. બંને નેતાઓએ ભારત અને સાઉદી અરેબિયા વચ્ચે વ્યૂહાત્મક ભાગીદારી અંગે ચર્ચા કરી હતી. બંને નેતાઓ વચ્ચેની ટેલિફોનિક વાતચીતમાં પશ્ચિમ એશિયાની તાજેતરની સ્થિતિ, ખાસ કરીને ઇઝરાયેલ-હમાસ સંઘર્ષ પર પણ ધ્યાન કેન્દ્રિત કરવામાં આવ્યું હતું. પીએમ મોદીએ સોશિયલ મીડિયા પર આ વાતચીતની જાહેરાત કરી હતી.

પોતાના સોશિયલ મીડિયા પ્લેટફોર્મ 'X' પર પોસ્ટ શેર કરતી વખતે, PM મોદીએ લખ્યું, "મોહમ્મદ બિન સલમાન સાથે પશ્ચિમ એશિયાની સ્થિતિ પર વિચારોની આપ-લે કરી. અમે પશ્ચિમ એશિયાની પરિસ્થિતિ પર મંતવ્યોનું આદાનપ્રદાન કર્યું અને આતંકવાદ, હિંસા અને નાગરિકોના જીવ ગુમાવવા અંગેની ચિંતાઓ શેર કરી. બંને નેતાઓ ક્ષેત્રમાં શાંતિ, સુરક્ષા અને સ્થિરતા માટે સાથે મળીને કામ કરવા સંમત થયા હતા.

તમને જણાવી દઈએ કે ઈઝરાયેલ અને હમાસ વચ્ચે છેલ્લા 81 દિવસથી યુદ્ધ ચાલી રહ્યું છે. હાલમાં, બંને દેશો વચ્ચે કોઈ પ્રકારની શાંતિ સમજૂતી થઈ હોય તેવું લાગતું નથી. ઘણા દેશો દ્વારા યુદ્ધવિરામ માટે કરવામાં આવી રહેલા પ્રયાસો હજુ સુધી સફળ થયા નથી. આવી સ્થિતિમાં પીએમ મોદી અને સાઉદી અરેબિયાના ક્રાઉન પ્રિન્સ મોહમ્મદ બિન સલમાન વચ્ચેની વાતચીત પણ ખૂબ જ મહત્વપૂર્ણ માનવામાં આવી રહી છે.

ક્રાઉન પ્રિન્સ સપ્ટેમ્બરમાં ભારતની મુલાકાતે આવ્યા હતા

અગાઉ સપ્ટેમ્બરમાં પણ સાઉદી ક્રાઉન પ્રિન્સ જી-20 બાદ ભારતની સરકારી મુલાકાતે આવ્યા હતા. આ દરમિયાન પીએમ મોદી અને સાઉદી અરેબિયાના ક્રાઉન પ્રિન્સ મોહમ્મદ બિન સલમાન વચ્ચે બે પક્ષીય વાતચીત થઈ. બંને દેશો વચ્ચેની વાતચીતના મુદ્દાઓ ઉર્જા, સુરક્ષા, વેપાર અને રોકાણ, સંરક્ષણ અને સુરક્ષા, આરોગ્ય સંભાળ, ખાદ્ય સુરક્ષા, સંસ્કૃતિ વગેરે સાથે સંબંધિત હતા.

આ પણ વાંચો : Jaipur : ક્રિસમસ પાર્ટીમાં બે કપલ વચ્ચે ઝઘડો, હોટલની બહાર SUV ચડાવીને મહિલાની હત્યા…