હવે Prime Minister of Bharat, દેશનું નામ બદલવાના વિવાદને મળી હવા...!

છેલ્લા કેટલાક દિવસોથી 'ભારત' અને 'ઇન્ડિયા'ને લઈને ચાલી રહેલા વિવાદની વચ્ચે કેન્દ્ર સરકારે વડાપ્રધાન મોદીની ઈન્ડોનેશિયાની મુલાકાતને લઈને તેની સત્તાવાર નોંધમાં મોટો ફેરફાર કર્યો છે. નવા ફેરફાર હેઠળ વડા પ્રધાન નરેન્દ્ર મોદી (narendra modi)ની ઇન્ડોનેશિયા મુલાકાતની સત્તાવાર નોંધ પર 'ધ પ્રાઇમ મિનિસ્ટર ઑફ ભારત' (Prime Minister of Bharat)લખવામાં આવ્યું છે. તમને જણાવી દઈએ કે પીએમ મોદી 20મી આસિયાન-ઈન્ડિયા સમિટ (ASEAN-India Summit)માં ભાગ લેવા માટે આજે ઈન્ડોનેશિયા જશે.

રાષ્ટ્રપતિ મુર્મુએ તાજેતરમાં જ G20 કોન્ફરન્સમાં ભાગ લેવા માટે દિલ્હી આવેલા મહેમાનોને ભોજન સમારંભ માટે આમંત્રણ આપ્યું હતું. આ આમંત્રણમાં પ્રથમ વખત ભારતના રાષ્ટ્રપતિ લખવામાં આવ્યા હતા. ત્યારથી આ મુદ્દે ચર્ચા શરૂ થઈ હતી. આ આમંત્રણ પત્ર સામે આવ્યાના ચાર દિવસ પહેલા 1 સપ્ટેમ્બરે RSSના સરસંઘચાલક મોહન ભાગવતે પણ દેશના નામ તરીકે ભારત શબ્દનો ઉપયોગ કરવાનો આગ્રહ કર્યો હતો. આ નિવેદનના ત્રણ-ચાર દિવસમાં જ રાષ્ટ્રપતિના આમંત્રણ પત્રમાં આવી જ એક વાત સામે આવતા દેશનું રાજકારણ ગરમાયું છે. આ મુદ્દે પક્ષો અને વિપક્ષના નેતાઓ આમને-સામને આવી ગયા છે.

વડાપ્રધાન નરેન્દ્ર મોદી આસિયાન-ભારત સમિટમાં ભાગ લેવા માટે આજે રાત્રે ઈન્ડોનેશિયા જઈ રહ્યા છે. આ પ્રવાસ માટેની સત્તાવાર નોંધમાં પીએમ મોદીને ભારતના વડાપ્રધાન તરીકે લખવામાં આવ્યા છે. પીએમ મોદી  આવતીકાલે જ ઈન્ડોનેશિયાથી પરત ફરશે. આસિયાનને આ ક્ષેત્રના સૌથી પ્રભાવશાળી જૂથોમાંનું એક ગણવામાં આવે છે અને ભારત અને યુએસ, ચીન, જાપાન અને ઓસ્ટ્રેલિયા સહિતના અન્ય કેટલાક દેશો તેના સંવાદ ભાગીદારો છે.

2 સપ્ટેમ્બરે ગુવાહાટીમાં એક કાર્યક્રમમાં આરએસએસના વડા મોહન ભાગવતે કહ્યું હતું કે લોકોએ ઇન્ડિયા નામનો ઉપયોગ કરવાનું બંધ કરવું જોઈએ અને ભારત નામનો ઉપયોગ કરવો જોઈએ. તેમણે કહ્યું હતું કે, "આપણા દેશનું નામ સદીઓથી ભારત રહ્યું છે. ભાષા ગમે તે હોય, નામ એક જ રહે છે. આપણો દેશ ભારત છે અને આપણે તમામ વ્યવહારિક ક્ષેત્રોમાં 'ઇન્ડિયા' શબ્દનો ઉપયોગ કરવાનું બંધ કરવું પડશે તો જ પરિવર્તન આવશે. આપણે આપણા દેશને ભારત કહેવાનો છે અને બીજાને પણ સમજાવવો પડશે."

આ પણ વાંચો----PARLIAMENT : સંસદની નવી ઇમારતમાં વિશેષ સત્ર યોજાશે