ગેરકાયદેસર હથિયારો અને કારતૂસોનો તાળો મેળવવા ATS Gujarat ની મથામણ

ATS Gujarat : અન્ય રાજ્યોના બોગસ હથિયાર પરવાના કૌભાંડ (Gun Licence Scam) માં ગુજરાત એન્ટી ટેરરિઝમ સ્કવૉડે એક સાથે 108 આરોપીઓ સામે ફરિયાદ નોંધી ઇતિહાસ સર્જી દીધો છે. રાજ્યવ્યાપી હથિયાર પરવાના કૌભાંડ (Gun Licence Scam in Gujarat) ના તાર ક્યાં અને કોને અડશે તે આગામી દિવસોમાં જાણવા મળશે. હાલ ATS Gujarat ની કસ્ટડીમાં રહેલા 7 નામચીન શખ્સોની કુંડળી અને કારનામા તપાસવા અદાલતમાંથી 10 દિવસના રિમાન્ડ મેળવવામાં આવ્યા છે. ATS Gujarat પકડાયેલા આરોપીઓ પૈકીના કેટલાંક શખ્સોના નહીં નોંધાયેલા હથિયારો તેમજ સંખ્યાબંધ ગુમ થયેલા કારતૂસોની સંખ્યાનો તાળો મેળવવામાં લાગી છે. આ ચકચારી કેસના તપાસ અધિકારી પીઆઈ બી. એમ. પટેલ (PI B M Patel) છે.

કઈ-કઈ કલમો હેઠળ નોંધાઈ છે FIR

તારીખ 7 એપ્રિલ 2025ના રોજ ATS Gujarat ના ચોપડે હથિયાર પરવાના કૌભાંડની ફરિયાદ નોંધવામાં આવી છે. ATS Gujarat ના અધિકારીએ સરકાર તરફે નોંધાવેલી ફરિયાદ BNS કલમ 336(2), 337, 338, 339, 341 અને આર્મ્સ એક્ટ (Arms Act) ની કલમ 25(1બી)(એ) 27, 29 અને 30 હેઠળ નોંધી છે. એટલે કે, આરોપીઓએ કાવતરૂં રચીને ખોટા બનાવાયેલા દસ્તાવેજોને સાચા તરીકે ઉપયોગ કરી હથિયારધારાનો ભંગ કર્યો છે.

ATS Gujarat એ કેમ 14 દિવસના રિમાન્ડ માગ્યા ?

ગુજરાત આખામાં ફેલાયેલા હથિયાર પરવાના કૌભાંડ (Gun Licence Scam in Gujarat) માં શરૂ થયેલી તપાસમાં ATS Gujarat એ સાત આરોપીઓની ધરપકડ કરી છે. મુકેશ બાંભા, વિશાલ પંડ્યા, સેલા બોળીયા, અર્જુન અલગોતર, ધૈર્ય જરીવાલા, બ્રિજેશ મહેતા ઉર્ફે બીટ્ટુ અને સદ્દામહુસેન રંગરેજને ગઈકાલે અદાલતમાં રજૂ કરાયા હતા. ATS Gujarat એ તમામ આરોપીઓના 14 દિવસના રિમાન્ડ મેળવવા અરજી કરી હતી. રિમાન્ડના કારણોમાં હરિયાણાની ટોળકીને પરવાના મેળવવા માટે મોકલવામાં આવેલા રૂપિયાનો હિસાબ મેળવવાનો છે. બીજા કેટલાં શખ્સોને મણીપુર - નાગાલેન્ડથી લાયસન્સ અપાવ્યા છે. આરોપીઓએ વેપનનો ઉપયોગ કોઈ ગુનામાં કર્યો છે કે કેમ ? હથિયાર પરવાના મેળવનારા શખ્સો મણીપુર કે નાગાલેન્ડ ગયા નથી તો ત્યાંના કોઈ સરકારી અધિકારીની સંડોવણીથી વેપન લાયસન્સ મેળવવામાં આવ્યા છે કે કેમ ?

વેપન અને કાર્ટિઝનો તાળો મળતો નથી

• વિશાલ પંડ્યા પાસે નાગાલેન્ડનું હથિયાર લાયસન્સ છે તેમજ ટ્વેલ બોર ગન અને પિસ્તોલ છે. વિશાલ પાસેથી ગનના 10 કારતૂસ તથા પિસ્તોલના 44 કારતૂસ મળી આવ્યા છે. લાયસન્સમાં હથિયાર ક્યાંથી ખરીદવામાં આવ્યા તેની નોંધ નથી. આ ઉપરાંત 13 ફેબ્રુઆરી 2024ના રોજ .45ના 100 કારતૂસ આરોપીએ ખરીદ્યા છે, પરંતુ 56 કારતૂસ ગાયબ હોવાથી તાળો મળતો નથી. તેણે આ કારતૂસ વાપર્યા છે કે કોઈને વેચી માર્યા છે ?
• અર્જુન અલગોતર પાસે નાગાલેન્ડનું લાયસન્સ છે તેમજ એક ટ્વેલ બોર ગન અને રિવોલ્વર છે. આરોપી પાસેથી ગનના 20 કારતૂસ અને રિવોલ્વરના 6 કારતૂસ કબજે કરાયા છે. લાયસન્સમાં રિવોલ્વર ખરીદીની નોંધ છે, પરંતુ બાર બોરની ગનની નોંધ નથી. ટ્વેલ બોર ગન ક્યાંથી ખરીદી તેમજ ગત 6 જાન્યુઆરીના રોજ 100 કારતૂસ ખરીદ્યા છે તો બાકીના 80 કાર્ટિઝ ક્યાં છે ?
• ધૈર્ય જરીવાલા પાસે મણીપુરનું લાયસન્સ છે તેમજ એક ટ્વેલ બોર ગન અને પિસ્તોલ છે. ગનના 40 અને પિસ્તોલના 15 કારતૂસ કબજે લેવાયા છે. ગત 24 ફેબ્રુઆરીના રોજ ગન અને પિસ્તોલના 50-50 કાર્ટિઝ ખરીદ કર્યા છે તો બાકીના 10-35 કારતૂસ ક્યાં છે ?

આ  પણ  વાંચો -ગુજરાતમાં ચાલતા બોગસ હથિયાર લાયસન્સ કૌભાંડમાં ATS ફરિયાદની માહિતી કેમ છુપાવે છે ?

મુકેશ પાસેથી માત્ર વેપન લાયસન્સની ફોટોકોપી જ મળી

બોગસ ગન લાયસન્સ રેકેટના સૂત્રધાર પૈકીના એક મુકેશ રણછોડભાઈ બાંભા (Mukesh Bambha) પાસેથી ATS Gujarat ને હથિયાર લાયસન્સની ફોટોકોપી એટલે કે, ઝેરોક્ષ મળી આવી છે. ઉત્તરપ્રદેશના એટા જિલ્લાના ડીસ્ટ્રીક્ટ મેજીસ્ટ્રેટના રાઉન્ડ સીલ મારેલી હથિયાર લાયસન્સની ફોટોકોપી એટીએસએ કબજે લીધી છે. આ ઉપરાંત તેની પાસેથી તેના નામ અને ફોટાવાળું એક ઓળખપત્ર પણ મળ્યું છે. જેના ઉપર એટા જિલ્લાના ડીસ્ટ્રીક્ટ મેજીસ્ટ્રેટનો રાઉન્ડ સીલ લગાવેલો છે. ATS Gujarat ને પ્રાથમિક દ્રષ્ટીએ આ બંને દસ્તાવેજ બનાવટી હોવાનું જણાઈ આવ્યું છે.

સાત પૈકી 4 આરોપીઓનો ગુનાહિત ઇતિહાસ

• વિશાલ પંડ્યા (Vishal Pandya aka VP) સામે વર્ષ 2016માં મારામારીનો ગુનો વટવા જીઆઈડીસી પોલીસ સ્ટેશન (Vatva GIDC Police Station) માં નોંધાયો હતો. આ ઉપરાંત વર્ષ 2019માં સાયબર ક્રાઈમ બ્રાંચે બોગસ કોલ સેન્ટર (Fraudulent Call Center) નો ગુનો નોંધી ધરપકડ કરી હતી.
• સેલા બોળીયા (Sela Boliya) સામે આણંદના આંકલાવ પોલીસ સ્ટેશન (Anklav Police Station) માં ફાયરિંગનો ગુનો વર્ષ 2019-20માં નોંધાયો હતો. આ ઉપરાંત વિરમગામમાં વર્ષ 2019-20માં એક હત્યા કેસ પણ નોંધાયો હતો.
• અર્જુન અલગોતર (Arjun Algotar) સામે વર્ષ 2015માં અડાલજ પોલીસ સ્ટેશન (Adalaj Police Station) માં ધાડનો ગુનો, વર્ષ 2021માં અમદાવાદ ક્રાઈમ બ્રાંચ (Crime Branch Ahmedabad) ખાતે ક્રિકેટ સટ્ટાનો કેસ તેમજ અમદાવાદના આનંદનગર પોલીસ સ્ટેશન (Anandnagar Police Station) માં વર્ષ 2019-20માં મારામારીનો કેસ થઈ ચૂક્યો છે.
• મુકેશ બાંભા (Mukesh Bambha) સામે વર્ષ 2022-23માં અમદાવાદ ગ્રામ્યના બોપલ પોલીસ સ્ટેશન (Bopal Police Station) માં લોખંડના સળિયા ચોરી કરવાનો તેમજ વર્ષ 2024માં વડોદરાના નંદેસરી પોલીસ સ્ટેશન (Nandesari Police Station) માં મારામારીનો ગુનો નોંધાયો હતો.

આ  પણ  વાંચો -આસામના ગર્વનર સાથે ફોટો સેશન કરાવનારા શખ્સને Gujarat ATS કેમ શોધી રહી છે ?

પકડાયેલા આરોપીઓના નામ-સરનામા

1. વિશાલ મુકેશભાઈ પંડ્યા (ઉ.37) રહેવાસી - નારાયણ બંગ્લોઝ, માધવ ફાર્મ પાછળ, વસ્ત્રાલ રિંગ રોડ, અમદાવાદ
2. અર્જુન લાખુભાઈ અલગોતર (ઉ.33) રહેવાસી - એન 1504, ઈસ્કોન પ્લેટિનિયમ, એસ.પી. રિંગ રોજ, બોપલ, અમદાવાદ
3. ધૈર્ય હેમંતભાઈ જરીવાલા (ઉ.27) રહેવાસી - 3, નૂતન શક્તિ સોસાયટી, ઉત્તમનગ બગીચા પાસે, મણિનગર, અમદાવાદ
4. સેલા વેલાભાઈ બોળિયા/ભરવાડ (ઉ.45) રહેવાસી - 202, કૃષ્ણનગર લસતાણા ગામ, તા. કામરેજ, સુરત મૂળ રહે. દરોડ, તા. ચુડા, સુરેન્દ્રનગર
5. સદ્દામહુસેન હારૂનભાઈ રંગરેજ (ઉ.28) રહેવાસી - બી/3 અલફારૂક સોસાયટી, રસુલાબાદ, શાહેઆલમ, અમદાવાદ
6. મુકેશ રણછોડભાઈ બાંભા/ભરવાાડ (ઉ.37) રહેવાસી - શિવશક્તિ નગર, ભરવાડ વાસ, નાના ચિલોડા, અમદાવાદ
7. બ્રીજેશ યજ્ઞેશકુમાર મહેતા ઉર્ફે બીટ્ટુ (ઉ.31) રહેવાસી - ઈ/304 વૃંદાવન વિહાર ફલેટ, RAF કેમ્પની સામેે, વસ્ત્રાલ, અમદાવાદ