Asia Cup પહેલા ટીમ ઈન્ડિયાને લાગ્યો ઝટકો, આ ખેલાડી પાકિસ્તાન વિરુદ્ધ મેચ નહીં રમે

Asia Cup 2023 ની ટૂર્નામેન્ટ આવતીકાલ 30 તારીખને બુધવારથી શરૂ થઇ રહી છે. આ ટુર્નામેન્ટને લઇને તમામ ટીમોએ ખૂબ જ તૈયારીઓ કરી છે. BCCI એ એશિયા કપ માટે પોતાની ટીમની પણ જાહેરાત કરી દીધી છે. ટીમ ઈન્ડિયા 2 સપ્ટેમ્બરે પોતાના અભિયાનની શરૂઆત કરશે, જ્યાં તેનો મુકાબલો પાકિસ્તાન સાથે થશે. પરંતુ તે પહેલા ટીમ ઈન્ડિયાને એક મોટો ઝટકો લાગ્યો છે.

પાકિસ્તાન વિરુદ્ધ નહીં રમે રાહુલ

એશિયા કપ 2023 પહેલા જે ડર ભારતીય ટીમને સતાવી રહ્યો હતો, હવે ટીમે તેનો સામનો કરવો પડશે. એક રીતે જોઈએ તો આ મોટી ઈવેન્ટ પહેલા ટીમ ઈન્ડિયાને મોટો ઝટકો લાગ્યો છે. ભારતીય ક્રિકેટ ટીમના મુખ્ય પસંદગીકાર અજીત અગરકરના શબ્દો સાચા સાબિત થઇ રહ્યા છે. અગરકરે કહ્યું હતું કે, કેએલ રાહુલ એશિયા કપ 2023ની પ્રથમ કેટલીક મેચો ચૂકી જશે. હવે ટીમ ઈન્ડિયાના મુખ્ય કોચ રાહુલ દ્રવિડે પુષ્ટિ કરી છે કે કેએલ રાહુલ પ્રથમ બે મેચ નહીં રમે. જેનો અર્થ છે કે, રાહુલ પાકિસ્તાન વિરુદ્ધની મેચ નહીં રમી શકે. કોચ દ્રવિડે જણાવ્યું કે, કેએલ રાહુલ હજુ સંપૂર્ણ રીતે ફિટ નથી. તે એશિયા કપ માટે ટીમ સાથે શ્રીલંકા નહીં જાય, હાલ તે એનસીએમાં જ રહેશે.

UPDATE

KL Rahul is progressing really well but will not be available for India’s first two matches – against Pakistan and Nepal – of the #AsiaCup2023: Head Coach Rahul Dravid#TeamIndia

— BCCI (@BCCI) August 29, 2023

શ્રેયસ અય્યર સંપૂર્ણ રીતે ફિટ

રાહુલ દ્રવિડે કહ્યું કે કેએલ રાહુલ હજુ સંપૂર્ણ રીતે ફિટ નથી થયો. કેન્ડીના પલ્લિકેલમાં યોજાનારી મેચોમાં તે ભારતીય ટીમ સાથે હાજર રહેશે નહીં. તેમજ ભારતીય કોચે કહ્યું કે શ્રેયસ અય્યર સંપૂર્ણ રીતે ફિટ છે. બસ તેને રમવા માટે પૂરતી મેચો મળી નથી, પરંતુ મને લાગે છે કે એશિયા કપમાં તે જગ્યાને ભરી દેશે. આ દરમિયાન રાહુલ દ્રવિડે સ્પષ્ટ કર્યું કે, એશિયા કપ બાદ ODI વર્લ્ડ કપ ભારતમાં જ યોજાવાનો છે. આવી સ્થિતિમાં ખેલાડીઓને વધુમાં વધુ તક આપવાનો પ્રયાસ કરવામાં આવશે. આ સિવાય ભારતીય કોચે કહ્યું કે ટીમમાં ફેરફાર વિચારીને કરવામાં આવે છે. ટીમમાં અનુભવી ખેલાડીઓ રાખવાથી ફાયદો થાય છે. ભારતીય ક્રિકેટ ટીમ 2 સપ્ટેમ્બરે પાકિસ્તાન સામે અને 4 સપ્ટેમ્બરે નેપાળ સામે પલ્લિકેલે રમવાની છે.

કેએલ રાહુલની પસંદગી પર ઉઠ્યા સવાલ

ભારતીય ટીમની જાહેરાત બાદ જ ક્રિકેટના ઘણા દિગ્ગજોએ કેએલ રાહુલની પસંદગી પર સવાલો ઉઠાવ્યા હતા. અનુભવીઓએ કહ્યું કે જો કેએલ રાહુલ સંપૂર્ણ રીતે ફિટ નથી તો તેને ટીમમાં શા માટે સામેલ કરવામાં આવ્યો છે. રાહુલ દ્રવિડે કહ્યું કે, કેએલ રાહુલે સારી બેટિંગ કરી છે. તે વિકેટકીપિંગ પણ કરી રહ્યો છે. વર્લ્ડ કપને ધ્યાનમાં રાખીને તેને પ્રથમ બે મેચમાં આરામ આપવામાં આવશે. અમને આશા છે કે તે જલ્દી જ સંપૂર્ણ રીતે ફિટ થઈ જશે અને ટીમમાં યોગદાન આપશે.

કેએલ રાહુલ વર્લ્ડ કપ 2023 માટે મહત્વપૂર્ણ 

ટીમ ઈન્ડિયા એશિયા કપ 2023 બાદ વર્લ્ડ કપની તૈયારીઓ પણ શરૂ કરશે. કેએલ રાહુલ વર્લ્ડ કપ 2023 માટે ટીમ ઈન્ડિયા માટે જરૂરી છે. તે ઓપનર તરીકે તેમજ મિડલ ઓર્ડરમાં ODIમાં શાનદાર બેટિંગ કરી શકે છે. આ સિવાય તે વિકેટકીપર તરીકે પણ ટીમ ઈન્ડિયામાં યોગદાન આપી શકે છે. આવી સ્થિતિમાં વર્લ્ડ કપ 2023ને જોતા કેએલ રાહુલ ટીમ ઈન્ડિયાની મહત્વની કડી બની શકે છે.

કેવુ રહ્યું છે રાહુલનું કરિયર ?

કેએલ રાહુલે ટીમ ઈન્ડિયા માટે મહત્વની ભૂમિકા ભજવી છે. છેલ્લા કેટલાક સમયથી તે ટીમ ઈન્ડિયા માટે ત્રણેય ફોર્મેટમાં શાનદાર પ્રદર્શન કરી રહ્યો છે. રાહુલે ભારત માટે 47 ટેસ્ટ મેચોમાં 33.44ની એવરેજથી 2642 રન બનાવ્યા છે. આ સિવાય 54 વનડેમાં આ બેટ્સમેને 45.14ની એવરેજથી 1986 રન બનાવ્યા છે, જ્યારે 72 T20 મેચમાં રાહુલે 37.75ની એવરેજથી 2265 રન બનાવ્યા છે.

એશિયા કપ માટે ભારતીય ટીમ

રોહિત શર્મા (કેપ્ટન), શુભમન ગિલ, કેએલ રાહુલ, વિરાટ કોહલી, શ્રેયસ અય્યર, સૂર્યકુમાર યાદવ, તિલક વર્મા, ઈશાન કિશન, હાર્દિક પંડ્યા, રવીન્દ્ર જાડેજા, અક્ષર પટેલ, શાર્દુલ ઠાકુર, મોહમ્મદ શમી, મોહમ્મદ સિરાજ, જસપ્રીત બુમરાહ, ક્રિષ્ના ફેમસ કુલદીપ યાદવ.

આ પણ વાંચો - ODI World Cup 2023 માટે આ ખેલાડીઓને મળી શકે છે તક, જાણો ક્યારે થશે ટીમની પસંદગી

આ પણ વાંચો - ક્રિકેટ ઈતિહાસમાં પહેલીવાર રેડ કાર્ડનો કરાયો ઉપયોગ, જાણો કોને મળ્યું Red Card

આ પણ વાંચો – World Athletics Championship : ગોલ્ડન બોય Neeraj Chopra એ રચ્યો ઈતિહાસ, સુવર્ણ અક્ષરે લખાયું નામ

ગુજરાત ફર્સ્ટ તમને સમાચારોથી હંમેશા અવગત રાખશે

ગુજરાતની નંબર 1 ગુજરાતી ન્યૂઝ ચેનલ એટલે ગુજરાત ફર્સ્ટ (Gujarat First) – જે ગુજરાતીઓને દરેક સમાચારમાં રાખે છે આગળ. ગુજરાત, રાષ્ટ્રીય, આંતરરાષ્ટ્રીય, ઇલેક્શન, બિઝનેસ, સ્પોર્ટ્સ, મનોરંજન સહિતના દરેક સમાચાર વાંચો ગુજરાત ફર્સ્ટ પર. હવે દરેક સમાચાર આંગળીના ટેરવે આપના મોબાઈલમા, ડાઉનલોડ કરો અમારી લેટેસ્ટ Android અને iOS એપ. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ.