ભારતીય ક્રિકેટરના આ 5 ધુઆધાર ક્રિકેટરોના છે જન્મદિવસ,જાણો પાંચેય ખેલાડીના રેકોર્ડ

આજે  6 ડિસેમ્બરે ભારતના કુલ 5 ક્રિકેટર તેમનો જન્મદિવસ ઉજવી રહ્યા છે. જો કે, આજે વિશ્વભરના કુલ 11 ક્રિકેટરોનો જન્મદિવસ છે, જેમને જોડીને બર્થડે પ્લેઈંગ ઈલેવન બનાવી શકાય છે, પરંતુ તે ઈલેવનમાં માત્ર 5 ભારતીય છે. આજે શ્રેયસ અય્યર, રવિન્દ્ર જાડેજા, જસપ્રિત બુમરાહ, કરુણ નાયર અને ભૂતપૂર્વ ભારતીય ક્રિકેટર આરપી સિંહનો પણ જન્મદિવસ છે. ભારતના આ તમામ ક્રિકેટરો આજે પોતાનો જન્મદિવસ ઉજવી રહ્યા છે.

શ્રેયસ અય્યર

ભારતીય ટીમનો મિડલ ઓર્ડર બેટ્સમેન શ્રેયસ અય્યર આજે 29 વર્ષનો થઈ ગયો છે. તેણે નવેમ્બર 2017માં આંતરરાષ્ટ્રીય ક્રિકેટમાં ડેબ્યૂ કર્યું હતું. અત્યાર સુધી આ ખેલાડીએ 10 ટેસ્ટ મેચમાં 44.40ની એવરેજથી 666 રન, 58 ODI મેચમાં 49.59ની એવરેજથી 2331 રન અને 51 T20 મેચમાં 30.66ની એવરેજથી 1104 રન બનાવ્યા છે. શ્રેયસ અય્યરે તાજેતરમાં પૂરા થયેલા વર્લ્ડ કપમાં શાનદાર બેટિંગ કરી હતી, અને 4 નંબર પર રમતી વખતે વર્લ્ડ કપમાં 500 રન બનાવનાર પ્રથમ ખેલાડી બન્યો હતો.

રવિન્દ્ર જાડેજા

ભારતીય ક્રિકેટ ઓલરાઉન્ડર રવિન્દ્ર જાડેજા આજે 35 વર્ષનો થઈ ગયો છે. જાડેજાનું ડેબ્યૂ ફેબ્રુઆરી 2009માં થયું હતું. અત્યાર સુધીમાં, તેણે 67 ટેસ્ટ, 197 ODI અને 64 T20 મેચ રમી છે, જેમાં તેણે અનુક્રમે 2804 રન અને 275 વિકેટ, 2756 રન અને 220 વિકેટ, 457 રન અને 51 વિકેટ ઝડપી છે.

જસપ્રીત બુમરાહ

ભારતીય ક્રિકેટ ટીમનો મુખ્ય ફાસ્ટ બોલર જસપ્રીત બુમરાહ આજે 30 વર્ષનો થઈ ગયો છે. તેણે જાન્યુઆરી 2016માં આંતરરાષ્ટ્રીય ક્રિકેટમાં પ્રવેશ કર્યો હતો. બુમરાહે અત્યાર સુધીમાં કુલ 30 ટેસ્ટ, 89 વનડે અને 62 ટી20 મેચ રમી છે. આ સમયગાળા દરમિયાન, તેણે અનુક્રમે 128 વિકેટ, 149 વિકેટ અને 74 વિકેટ લીધી છે.

કરુણ નાયર

ટીમ ઈન્ડિયાનો ટોપ ઓર્ડર બેટ્સમેન કરુણ નાયર આજે 32 વર્ષનો થઈ ગયો છે. આ ખેલાડીનું ડેબ્યૂ જૂન 2016માં થયું હતું. તેણે અત્યાર સુધીમાં 6 ટેસ્ટ મેચ રમી છે, જેમાં તેણે 62.33ની એવરેજથી કુલ 374 રન બનાવ્યા છે, જેમાં ટ્રિપલ સેન્ચુરીનો સમાવેશ થાય છે. તેણે પોતાની ત્રીજી ટેસ્ટ મેચમાં જ 303 રનની અણનમ ઇનિંગ રમી હતી અને વીરેન્દ્ર સેહવાગ પછી ટ્રિપલ સેન્ચુરી કરનારો તે માત્ર બીજો ભારતીય ખેલાડી બન્યો હતો. તેણે 2 ODI મેચ પણ રમી છે, જેમાં તેણે માત્ર 46 રન બનાવ્યા છે. ત્યારથી કરુણ નાયર આંતરરાષ્ટ્રીય ક્રિકેટમાં પુનરાગમન કરવા માટે સંઘર્ષ કરી રહ્યો છે.

આરપી સિંહ

આ યાદીમાં ભૂતપૂર્વ ભારતીય ફાસ્ટ બોલરનું નામ પણ સામેલ છે. આરપી સિંહ આજે 38 વર્ષના થયા છે. તેણે સપ્ટેમ્બર 2005માં આંતરરાષ્ટ્રીય ક્રિકેટમાં પ્રવેશ કર્યો હતો. તેણે તેની કારકિર્દીમાં કુલ 14 ટેસ્ટ, 58 ODI અને 10 T20 મેચ રમી હતી. જેમાં તેણે અનુક્રમે 40, 69 અને 15 વિકેટ ઝડપી હતી. આરપી સિંહે 2007 T20 વર્લ્ડ કપમાં ભારતને ચેમ્પિયન બનાવવામાં બોલથી મહત્વની ભૂમિકા ભજવી હતી.

આ  પણ  વાંચો -રોહિત શર્મા પછી આ બે યુવા ખેલાડી બની શકે છે ટેસ્ટ ટીમના કેપ્ટન! પૂર્વ ક્રિકેટરે બતાવ્યા મજબૂત દાવેદાર