SRH Vs MI : હૈદરાબાદની શાનદાર જીત, મુંબઇને 31 રને હરાવ્યું

MI Vs SRH : પેટ કમિન્સ દ્વારા સુકાની સનરાઈઝર્સ હૈદરાબાદ (SRH) એ ઈન્ડિયન પ્રીમિયર લીગ (IPL) માં ઈતિહાસ રચ્યો છે. આ ટીમે બુધવારે આઈપીએલના ઈતિહાસમાં સૌથી વધુ 277 રન બનાવીને મેચ જીતી લીધી હતી. આ મેચમાં SRH એ હાર્દિક પંડ્યાના સુકાની મુંબઈ ઈન્ડિયન્સ (MI) ને 31 રનથી હરાવ્યું હતું.

મુંબઈની ટીમે 5 વિકેટ ગુમાવીને માત્ર 246 રન બનાવ્યા

મુંબઈને IPL ઈતિહાસમાં 278 રનનો સૌથી મોટો લક્ષ્યાંક મળ્યો હતો, જેના જવાબમાં MI ટીમ 5 વિકેટ ગુમાવીને માત્ર 246 રન જ બનાવી શકી અને સતત બીજી મેચ હારી ગઈ. મુંબઈ માટે તિલક વર્માએ 24 બોલમાં ફિફ્ટી ફટકારી અને ટીમ માટે 34 બોલમાં સૌથી વધુ 64 રન બનાવ્યા.જ્યારે સુકાની હાર્દિક પંડ્યા (24) અને ટિમ ડેવિડ (42 અણનમ)એ અંતમાં કેટલીક સારી ઇનિંગ્સ રમી હતી. પરંતુ તેઓ ટીમને જીત સુધી પહોંચાડી શક્યા ન હતા. સનરાઇઝર્સ ટીમ તરફથી કેપ્ટન પેટ કમિન્સ અને જયદેવ ઉનડકટે 2-2 વિકેટ ઝડપી હતી. શાહબાઝ અહેમદને 1 સફળતા મળી.

મુંબઈ ઈન્ડિયન્સની ઈનિંગ

મુંબઈએ પણ આક્રમક શરૂઆત કરી હતી. ઈશાન કિશન 13 બોલમાં બે ચોગ્ગા અને 4 સિક્સ સાથે 34 રન બનાવી આઉટ થયો હતો. રોહિત શર્મા 12 બોલમાં 26 રન બનાવી પેવેલિયન પરત ફર્યો હતો. નમન ધિરે 14 બોલમાં બે ચોગ્ગા અને બે સિક્સ સાથે 30 રન બનાવ્યા હતા. મુંબઈ ઈન્ડિયન્સ તરફથી તિલક વર્માએ શાનદાર બેટિંગ કરતા અડધી સદી ફટકારી હતી. તિલક વર્મા 34 બોલમાં 6 સિક્સ અને બે ચોગ્ગા સાથે 64 રન બનાવી આઉટ થયો હતો. હાર્દિક પંડ્યા 20 બોલમાં 1 ફોર અને 1 સિક્સ સાથે 24 રન બનાવી આઉટ થયો હતો. ટિમ ડેવિડ 22 બોલમાં 42 અને શેફર્ડ 6 બોલમાં 15 રન બનાવી અણનમ રહ્યાં હતા.

હૈદરાબાદે બનાવ્યો આઈપીએલ ઈતિહાસનો સર્વોચ્ચ સ્કોર

સનરાઇઝર્સ હૈદરાબાદે આજે મુંબઈ સામે આઈપીએલ ઈતિહાસનો સર્વોચ્ચ સ્કોર બનાવ્યો હતો. હૈદરાબાદે 20 ઓવરમાં 277 રન ફટકાર્યા હતા. આ સાથે હૈદરાબાદે 11 વર્ષ જૂનો આરસીબીનો રેકોર્ડ તોડ્યો હતો. આઈપીએલમાં સર્વોચ્ચ સ્કોરનો રેકોર્ડ રોયલ ચેલેન્જર્સ બેંગલોરના નામે હતો. તેણે 2013માં પુણે વોરિયર્સ સામે 20 ઓવરમાં 263 રન ફટકાર્યા હતા.

આઈપીએલ ઈતિહાસના સર્વોચ્ચ સ્કોર

• SRH 277/3 vs MI in 2024
• RCB 263/5 vs PWI in 2013
• LSG 256/5 vs PBKS in 2023
• RCB 248/3 vs GL in 2016
• CSK 246/5 vs RR in 2010
• KKR 245/6 vs KXIP in 2018
• CSK 240/5 vs KXIP in 2008
• CSK 235/4 vs KKR in 2023

હૈદરાબાદની નવી ઓપનિંગ જોડી

સનરાઇઝર્સે આજે નવી ઓપનિંગ જોડી સાથે શરૂઆત કરી હતી. મયંક અગ્રવાલ અને ટ્રેવિસ હેડ ઈનિંગની શરૂઆત કરવા આવ્યા હતા. ટ્રેવિસ હેડે પ્રથમ બોલથી આક્રમક બેટિંગ કરી હતી. મયંક અગ્રવાલ અને હેડે 4 ઓવરમાં ટીમનો સ્કોર 45 રન પહોંચાડી દીધો હતો. મયંક અગ્રવાલ 11 રન બનાવી આઉટ થયો હતો. હૈદરાબાદે પાવરપ્લેમાં 81 રન ફટકાર્યા હતા.

સનરાઇઝર્સે IPLનો સૌથી મોટો સ્કોર બનાવ્યો

ટોસ હારીને પ્રથમ બેટિંગ કરવા ઉતરેલી સનરાઇઝર્સની ટીમે સારી શરૂઆત કરી હતી અને 3 વિકેટ ગુમાવીને 277 રન બનાવ્યા હતા. આઈપીએલ ઈતિહાસનો આ સૌથી મોટો સ્કોર છે. આ સાથે રોયલ ચેલેન્જર્સ બેંગ્લોર (RCB)નો 11 વર્ષ જૂનો રેકોર્ડ તૂટી ગયો છે. RCBએ 23 એપ્રિલ 2013ના રોજ પુણે વોરિયર્સ સામે 5 વિકેટે 263 રન બનાવ્યા હતા. ત્યારબાદ ક્રિસ ગેલે 66 બોલમાં 175 રનની શાનદાર ઇનિંગ રમી હતી.

ટ્રેવિસ હેડ અને અભિષેક શર્માએ બોલરોની ધોલાઈ કરી

આઈપીએલમાં પ્રથમવાર સનરાઇઝર્સ માટે રમવા ઉતરેલા ટ્રેવિસ હેડે 24 બોલમાં 9 ચોગ્ગા અને 3 સિક્સ સાથે 62 રન ફટકાર્યા હતા. ટ્રેવિસ હેડ આઉટ થયા બાદ અભિષેક શર્માએ ઈનિંગ સંભાળી હતી. અભિષેક શર્માએ માત્ર 16 બોલમાં પોતાની અડધી સદી પૂરી કરી હતી. અભિષેક શર્મા 23 બોલમાં 7 સિક્સ અને 3 ચોગ્ગા સાથે 63 રન બનાવી આઉટ થયો હતો.

મુંબઈ Vs હૈદરાબાદ સામ-સામે

કુલ મેચ: 22
MI જીત્યું: 12
SRH જીત્યો: 10

આ મેચમાં બંને ટીમોની પ્લેઈંગ-11 છે

મુંબઈ ઈન્ડિયન્સ: ઈશાન કિશન (વિકેટકીપર), રોહિત શર્મા, નમન ધીર, તિલક વર્મા, હાર્દિક પંડ્યા (કેપ્ટન), ટિમ ડેવિડ, શમ્સ મુલાની, ગેરાલ્ડ કોએત્ઝી, પીયૂષ ચાવલા, ક્વેના મફાકા અને જસપ્રિત બુમરાહ.

સનરાઇઝર્સ હૈદરાબાદ: ટ્રેવિસ હેડ, અભિષેક શર્મા, એડન માર્કરામ, હેનરિક ક્લાસેન (વિકેટમાં), અબ્દુલ સમદ, શાહબાઝ અહેમદ, પેટ કમિન્સ (સી), ભુવનેશ્વર કુમાર, મયંક માર્કન્ડે અને જયદેવ ઉનડકટ.

આ  પણ  વાંચો - SRH vs Mi : IPL ઈતિહાસનો સૌથી મોટો સ્કોર,આ ટીમનો તોડ્યો રેકોર્ડ

આ  પણ  વાંચો - CSK vs GT : શુભમન ગિલે એવું શું કર્યું કે લાગ્યો રૂપિયા 12 લાખનો દંડ ?

આ  પણ  વાંચો - CSK VS GT : ચેન્નાઈના મેદાને જામશે બે ચેમ્પિયન ટીમ વચ્ચે જંગ, જાણો કોનું પલડું મેચમાં ભારે