એક સમયે ચંદ્રયાન-2ને લઇને પાકિસ્તાનના આ મંત્રીએ ઉડાવી હતી મજાક, જાણો આ વખતે શું કહ્યું
ભારત સહિત સમગ્ર વિશ્વ ચંદ્રયાન-3ના સોફ્ટ લેન્ડિંગની આતુરતાથી રાહ જોઈ રહ્યું છે. પાકિસ્તાનના પૂર્વ મંત્રી ફવાદ હુસૈન ચૌધરીએ પણ ચંદ્રયાન-3ના વખાણ કર્યા છે. ફવાદ ચૌધરી એ જ મંત્રી છે જેણે ભારતના મુન મિશન ચંદ્રયાન-2ની મજાક ઉડાવી હતી.ભારતના મૂન મિશન ચંદ્રયાન-2ની મજાક ઉડાવનારા પાકિસ્તાનના પૂર્વ મંત્રી ફવાદ હુસૈન ચૌધરીએ મૂન મિશન ચંદ્રયાન-3ના જોરદાર વખાણ કર્યા છે. ફવાદ ચૌધરીએ આને માનવજાત માટે ઐતિહાસિક ક્ષણ ગણાવી છે.. આ સાથે તેમણે પાકિસ્તાની મીડિયાને ચંદ્રયાન-3ના સોફ્ટ લેન્ડિંગનું જીવંત પ્રસારણ કરવા વિનંતી કરી છે.
ઈમરાન ખાનની સરકારમાં વિજ્ઞાન અને ટેકનોલોજી મંત્રી રહેલા ફવાદ હુસૈન ચૌધરીએ અગાઉ 14 જુલાઈએ પણ ઈસરોને અભિનંદન પાઠવ્યા હતા. 14 જુલાઈએ જ ઈસરોએ મૂન મિશન ચંદ્રયાન-3 સફળતાપૂર્વક લોન્ચિંગ કર્યું હતું. પાકિસ્તાનના ભૂતપૂર્વ વિજ્ઞાન અને ટેક્નોલોજી પ્રધાન ફવાદ ચૌધરીએ મંગળવારે X (અગાઉ ટ્વિટર) પર લખ્યું, "પાકિસ્તાની મીડિયાએ આવતીકાલે સાંજે (એટલે કે આજે) સાંજે ચંદ્રયાન-3નું ચંદ્ર ઉતરણ લાઈવ બતાવવું જોઈએ. સમગ્ર માનવજાત આ એક ઐતિહાસિક ક્ષણ છે. ખાસ કરીને ભારતના લોકો, વૈજ્ઞાનિકો અને અવકાશ સમુદાય માટે. ખૂબ ખૂબ અભિનંદન."
અગાઉ 14 જુલાઈએ જ્યારે ઈસરોએ ચંદ્ર મિશન ચંદ્રયાન-3 લોન્ચ કર્યું હતું. તે સમયે પણ ફવાદ હુસૈને ઈસરોને અભિનંદન પાઠવ્યા હતા. ચંદ્રયાન-3ના સફળ પ્રક્ષેપણ પછી, તેમણે લખ્યું, "ચંદ્રયાન-3ના સફળ પ્રક્ષેપણ માટે ભારતીય અવકાશ અને વિજ્ઞાન સમુદાયને અભિનંદન અને શુભેચ્છાઓ."
એક સમયે ઈસરોની મજાક ઉડાવવામાં આવી હતી
ઈસરોના ચંદ્ર મિશન ચંદ્રયાન-2 દરમિયાન પાકિસ્તાનના પૂર્વ મંત્રી ફવાદ ચૌધરીએ ઈન્ડિયન સ્પેસ રિસર્ચ ઓર્ગેનાઈઝેશન (ઈસરો)ની મજાક ઉડાવી હતી. 2019માં ચંદ્રયાન-2 માટે 900 કરોડ રૂપિયાની બજેટ જોગવાઈ કરવામાં આવી હતી. આ બજેટ પર સવાલ ઉઠાવતા ફવાદ ચૌધરીએ પીએમ મોદી પર નિશાન સાધતા કહ્યું હતું કે અજાણ્યા વિસ્તાર માટે આટલું બજેટ ખર્ચવું શાણપણ નથી. ચંદ્રયાન-2ના સોફ્ટ લેન્ડિંગ દરમિયાન ISROનો વિક્રમ લેન્ડર સાથેનો સંપર્ક તૂટી ગયો હતો. જે બાદ પાકિસ્તાનના પૂર્વ મંત્રીએ ઈસરો અને ભારતની મજાક ઉડાવતા 'ઈન્ડિયા ફેઈલ' હેશટેગ શરૂ કર્યું. 2019 માં, ચંદ્ર મિશન ચંદ્રયાન-2 દરમિયાન, ચંદ્રની સપાટીથી 2.1 કિલોમીટર દૂર વિક્રમ લેન્ડર સાથેનો સંપર્ક તૂટી ગયો હતો. બાદમાં નાસાએ પુષ્ટિ કરી હતી કે વિક્રમ લેન્ડર ચંદ્રની સપાટી પર ક્રેશ થયું હતું.