મહિલા નેતાઓ વિરુદ્ધ અપમાનજનક ટિપ્પણી કરી તો હવે ખૈર નહીં : CEC
- મહિલાઓ પર અપમાનજનક ટિપ્પણીઓ માટે CEC નો ચેતવણી
- મહિલા નેતાઓ વિરુદ્ધ અપમાનજનક ટિપ્પણી કરી તો હવે ખૈર નહીં : CEC
- ખાનગી જીવનના કોઈપણ પાસાની ટીકા થવી જોઈએ નહીં : CEC
મુખ્ય ચૂંટણી કમિશનર (CEC) રાજીવ કુમારે શુક્રવારે મહારાષ્ટ્ર વિધાનસભા ચૂંટણી (Maharashtra Assembly Election) પ્રચાર દરમિયાન મહિલાઓ વિરુદ્ધ કરવામાં આવેલી અપમાનજનક ટિપ્પણીઓની નિંદા કરી હતી અને અધિકારીઓને આવી ટિપ્પણી કરનારાઓ સામે કડક પગલાં લેવાનો નિર્દેશ આપ્યો હતો. સૂત્રોએ આ માહિતી આપી હતી.
મહિલાઓ પર વિવાદિત ટિપ્પણી પર CEC એ કરી નિંદા
રાજીવ કુમાર શિવસેના (UBT)ના નેતા અરવિંદ સાવંતની ભાજપ નેતા શાઈના એનસી વિશેની ટિપ્પણી પરના વિવાદ પર પ્રતિક્રિયા આપી રહ્યા હતા. શાઈના એનસી શિંદે સેના જૂથમાં જોડાઈને ચૂંટણી લડી રહ્યા છે. સાવંતની ટિપ્પણી શાઈનાની સંભાવનાઓ વિશે પત્રકાર દ્વારા પૂછવામાં આવેલા પ્રશ્નના જવાબમાં હતી. શાઇના મુંબાદેવી બેઠક પરથી ચૂંટણી લડશે, જે 2009થી કોંગ્રેસના અમીન પટેલના હાથમાં છે. ચૂંટણી કમિશનર જ્ઞાનેશ કુમાર અને સુખબીર સિંહ સંધુ સાથે વીડિયો કોન્ફરન્સ દ્વારા અધિકારીઓની સમીક્ષા બેઠકને સંબોધતા, કુમારે મહિલા નેતાઓને નિશાન બનાવતી અપમાનજનક અને અભદ્ર ટિપ્પણીઓની નિંદા કરી અને અધિકારીઓને આવા કિસ્સાઓમાં પગલાં લેવા જણાવ્યું.
ખાનગી જીવનના કોઈપણ પાસાની ટીકા થવી જોઈએ નહીં : CEC
સૂત્રોએ જણાવ્યું હતું કે પોલીસ કમિશનર, પોલીસ અધિક્ષક, જિલ્લા ચૂંટણી અધિકારી, મ્યુનિસિપલ કોર્પોરેશન કમિશનર અને ચૂંટણી અધિકારીએ અહીં બેઠકમાં હાજરી આપી હતી. ચૂંટણી પંચે અગાઉ રાજકીય પક્ષો અને ઉમેદવારોને મહિલાઓના સન્માન અને ગરિમા માટે હાનિકારક ગણાતા કોઈપણ પગલા, હિલચાલ અથવા નિવેદનથી દૂર રહેવાનો નિર્દેશ આપ્યો હતો. સૂત્રોએ જણાવ્યું કે CEC એ કહ્યું કે ખાનગી જીવનના કોઈપણ પાસાની ટીકા થવી જોઈએ નહીં જે અન્ય રાજકીય પક્ષોના નેતાઓ અથવા કાર્યકરોની જાહેર પ્રવૃત્તિઓ સાથે જોડાયેલ ન હોય. તેમણે "નિમ્ન-સ્તરના" વ્યક્તિગત હુમલાઓ કરનારાઓ સામે કાર્યવાહી કરવાનો નિર્દેશ આપ્યો.
આ પણ વાંચો: DY Chandrachud એ પોતાના યુવા દેખાવા પાછળનું કારણ વકીલોને જણાવ્યું!